قىرعىزستاننىڭ وش وبلىسىنداعى نووكات اۋدانىندا وسىنداي قايعىلى جاعداي ورىن الدى. ءىىب دەرەگىنە سۇيەنسەك، شىلدەنىڭ 2 كۇنى نووكات اۋدانىنىڭ بەل اۋىلىنىڭ توڭىرەگىنەن ازاپتاپ ولتىرىلگەن 22 جاستاعى قىزدىڭ مۇردەسى تابىلدى. ەكسپەرتيزانىڭ ايتۋىنشا، قىزدىڭ سۋدا جاتقانىنا 10-12 كۇن بولعان. كۇدىكتى رەتىندە قايتىس بولعان قىزدىڭ اناسى مەن تۋعان اعاسى ۇستالدى.

"قىزدىڭ باسى جارىلعان، اياعى بايلاۋلى بولعان. اناسى قىزىن ولتىرگەنىن مويىنداپ وتىر. قىزىن قورقىتپاقشى بولعان ول قىزىن كانالعا لاقتىرعان ەكەن» دەيدى باسپا ءسوز قىزمەتى.

پوليسيانىڭ دەرەگىنە كەلەر بولساق، مارقۇم بولعان قىز ۇستىمىزدەگى جىلدىڭ مامىر ايىندا نەكەسىز بالا تۋعان. بوسانعاننان كەيىن نارەستەنى باسقا ءبىر وتباسىعا اسىراۋعا بەرىپتى. ءبىراق جاقىندارى وتباسىنى ۇياتتى ەتكەن قىزدى كەشىرە الماعان.

قولىن قىزىنىڭ قانىنا بوياعان انا 47 جاستاعى مەكتەپتىڭ ءمۇعالىمى بولىپ شىقتى. كۇيەۋىمەن اجىراسىپ كەتكەن. دەگەنمەن وتباسى سىرت كوزگە تاتۋ-بەرەكەلى بولىپ كورىنگەن. مارقۇمنىڭ 24 جاستاعى اعاسى دا جالعىز قارىنداسىنىڭ ۇياتتى تىرلىگىن كەشىرە الماي، وسىنداي قادامعا بارعانىن ايتتى. ءبىر ايتا كەتەرلىگى، قىز ءوز ۇيىنەن ءجيى قاشىپ كەتەتىن بولعان. «سوندىقتان دا اياعىن بايلاپ تاستادىق، تاعى قاشىپ كەتپەسىن دەپ» دەپ جاۋاپ بەردى اناسى مەن اعاسى.

بۇگىنگى تاڭدا ولار «قىلمىس» بابى بويىنشا تەمىر تورعا قامالدى.