ءبىلىمنىڭ باستاۋى كىتاپتا ەكەنى ءسوزسىز.  الايدا جاسوسپىرىمدەردىڭ  كىتاپحاناعا بارۋىنىڭ سيرەپ كەتكەنى جاسىرىن ەمەس. وسى ورايدا باتىسقازاقستاندىق كىتاپحاناشىلار   قۇندى ادەبيەتتەردى ەلەكتروندى جۇيەگە كوشىرىپ، سمارت تەلەفوندار ارقىلى وقۋعا مۇمكىندىك جاساۋدا. اسىرەسە پويىز جولاۋشىلارىنا  «جولاۋشى، جولعا كىتاپ ال » اكسياسى اياسىندا عابيت مۇسىرەپوۆتىڭ، عابيدەن ءمۇستافيننىڭ، ماعجان جۇمابايەۆتىڭ، مۇحتار ءماعاۋيننىڭ، ءىلياس جانسۇگىروۆتىڭ، قادىر مىرزا ءالى  كىتاپتارىنىڭ ەلەكتروندى سىلتەمەسى ۇسىنىلدى.

وسى ورايدا ايتا كەتسەك، وبلىستىڭ جالپى قورىندا  5 ميلليون 650 مىڭ كىتاپ  بار. وقىرماندار سانى 300 مىڭنان اسادى. اۋىلدىق جەرلەردەگى 14 كىتاپحانانىڭ ءوز سايتتارى بار. ال قوردا سيرەك كەزدەسەتىن 25 مىڭداي باسىلىم ساقتالعان. ولاردىڭ قاتارىندا 18-19 عاسىرلاردا شىققان تۋىندىلار، كولەمى وتە شاعىن جانە تانىمال ادامداردىڭ قولتاڭباسىمەن جازىلعان سونداي-اق لاتىن قارپىمەن جازىلعان قازاق تىلىندەگى ادەبيەتتەر بار. «كىتاپحانالار  جەلىسىنىڭ الدىنداعى مىندەت – وسىناۋ باعا جەتپەس بايلىقتى ەلەكتروندى فورماتقا كوشىرۋ»، - دەيدى ماماندار.

ورال شاھارىنداعى جۇبان مولداعالييەۆ اتىنداعى وبلىستىق عىلىمي كىتاپحاناسىنىڭ تاريحى  1871 جىلدان باستاۋ الادى. ول كەزدە كىتاپحانادا نەبارى 4750 دانا كىتاپ بولعان. كەيىن كىتاپحانا 1947 جىلى ورالداعى ەڭ كونە تاريحي ەسكەرتكىش  عيماراتتاردىڭ ءبىرى سانالاتىن «كاريەۆ ۇيىنە» كوشىرىلدى. بۇگىندە  كىتاپحانانىڭ 22 مىڭداي وقىرمانى بار.

• كىتاپتىڭ سورەگە جەتۋىنەن وقىرمانعا جەتۋىنە دەيىن ۇلكەن تەحنولوگيالىق پروسەسستەردەن وتەدى. بۇرىن كىتاپ بۇتىندىگىنە ءجيى قاداعالايتىن ەدىك. ساندىق تەحنولوگياعا كوشە باستاعاندا وقىرماندار ءۇشىن ءتيىمدى جولدى تاڭداپ، كىتاپتاردى ەلەكتروندى جۇيەگە كوشىرىپ باستادىق. كەز كەلگەن ادام كىتاپپحاناعا كەلمەي، ۇيدە وتىرىپ-اق توم-توم كىتاپتاردى وقي باستاۋدا.  قازىرگى تاڭدا بىرنەشە ادەبي كىتاپتار ەلەكتروندى جۇيەگە كوشتى،- دەيدى ماماندار.