Facebook الەۋمەتتىك جەلىسىندە جالاڭاشتانعان قىزداردىڭ كولىك جۋىپ جاتقان ۆيدەوسى تارالدى. ۆيدەو اۆتورى كولىك جۋۋ ورنى اقتاۋدا ەكەنىن ايتىپ دوستارى مەن تانىستارىن شاقىردى.
ماركەتولوگتاردىڭ ايتۋىنشا، كەيدە كاسىپ يەلەرى كليەنت تارتۋ ءۇشىن وسىنداي قۇيتىرقى ارەكەتتەرگە بارادى. بۇعان دەيىن دە استاناداعى مەيرامحانا يەسى قالتالى شەنەۋنىكتەردى قىزىقتىرۋ ءۇشىن سىمباتتى، ءارتۇرلى تاقىرىپتا سويلەسە الاتىن قىزداردى جالداعان. ولار مەيرامحانادا وتىرىپ كەلگەن قوناقتارمەن اڭگىمە دۇكەن قۇرادى. قوناق پەن قىزداردىڭ اراسىنداعى اڭگىمە ساياساتتان باستالىپ، ءومىر جايلى فيلوسوفياعا دەيىن ۇلاسادى.
بۇرىندارى كاسىپكەرلەر ءوز كاسىبىن جۇرگىزىپ، تۇتىنۋشىلاردى قىزىقتىرۋ ءۇشىن ساپالى قىزمەت كورسەتىپ، قىزمەت باعاسىن دا قولجەتىمدى ەتۋگە تىرىساتىن. ءقازىر باسەكەلەستىك مىقتى بولعاندىقتان، وسىنداي لاس قادامدارعا باراتىنى وكىنىشتى.
جەلى قولدانۋشىلارى، اقشا ءۇشىن بوتەن ەركەكتىڭ الدىندا جالاڭاشتانۋعا ءازىر قىزداردىڭ بارىنا قىنجىلاتىنىن جەتكىزگەن. ەندى ءبىرى «ماڭعىستاۋدا قىزدارعا اعالىق قامقورلىعىن تانىتىپ، توقتاۋ قويا الاتىن نامىستى جىگىت تابىلمادى ما؟» دەپ اقتاۋلىق جىگىتتەرگە ساۋال جولدادى.
ەندى ءبىرى قىزداردىڭ دا، جىگىتتەردىڭ دە ازعىنداپ بارا جاتقانىن ايتىپ كۇرسىندى.
تاعى ءبىر جەلى قولدانۋشىسى ۆيدەو اۆتورى مەن قىزداردى فوتو مەن ۆيدەوعا ءتۇسىرىپ تۇرعان ەر ادامدارعا قوماقتى ايىپپۇل سالۋ كەرەك دەگەن پىكىردە.
قىزداردىڭ ارەكەتىن قولداعاندار دا تابىلدى. ولاردىڭ اقشا تابۋ ءۇشىن وسىنداي قادامعا بارعانىن ايتىپ، قىزداردىڭ وسىنداي كۇيگە تۇسكەنىنە جىگىتتەر قاۋىمىن كىنالادى.
قىزداردىڭ وسى قىلىعى ءۇشىن ولاردى سوققىعا جىعۋ كەرەكتىگىن جازعاندار دا بار.
«كولىك جۋۋ قىزمەتىن ۇسىنعان مەكەمە باسشىسىنىڭ قىزى، قارىنداسى، اناسى جوق پە ەكەن. بار بولسا ءوز قىزدارىن وسىلاي شىعارىپ قوياما؟» دەپ جازدى جەلى قولدانۋشى.
پىكىر بىلدىرۋشىلەردىڭ باسىم كوپشىلىگى جالاڭاش قىزداردى ۆيدەوعا، فوتوعا ءتۇسىرىپ جۇرگەن ەر ادامداردى سىنعا الدى.
"وزگە ۇلتقا تۇرمىسقا شىققان قازاق قىزدارىن جەردەن الىپ، جەرگە سالعاندا الدارىڭا جان سالمايسىڭدار، ال وسىنداي شۇيكەباستاردى كورگەندە ءماز بولاسىڭدار. وسىنداي دا جىگىتتىك، ۇلتتىق نامىستارىڭ قايدا كەتەدى؟!" دەپ پىكىر قالدىرعان ەكەن جەلى قولدانۋشىسى.
بۇل رەتتە جەلى قولدانۋشىسى قىزداردى سوققىعا جىعىپ نەمەسە ونى بالاعاتتاپ، ۆيدەوعا ءتۇسىرىپ، وسى ارقىلى ارزان اتاق الىپ، "باتىر" اتانۋ ەمەس، قىزدارعا اعالىق اقىلىن ايتۋ، قاجەت بولسا جۇمىس تابۋعا كومەكتەسىپ، جالاڭاش كۇيدە كولىك جۋۋ ءۇشىن العان اقشاسىن تولەۋ ارقىلى وسىنداي دەندەگەن ماسەلەنىڭ الدىن الۋعا تيتتەي بولسا دا سەپتىگىن تيگىزۋدى مەڭزەسە كەرەك.
ۆيدەونى Facebook الەۋمەتتىك جەلىسىنە تاراتقان ادام ۇلتشىلداردى جيناپ، ۆيدەوداعى قىزداردى «قۇرتايىق» دەپ جىگىتتەرگە ۇندەۋ تاستاپتى.
ەستەرىڭىزگە سالا كەتەيىك، ءبىر توپ ەر ادام جينالىپ تۇنگى كلۋبتا جالاڭاشتانعان قىزعا 50 مىڭ تەڭگە بەرگەن ايجان بايزاقوۆانىڭ ۇستىنەن ارىز تۇسىرگەن. وسى جاعدايدان كەيىن كوپتەگەن قازاقستاندىق ولاردىڭ ارەكەتىن جالعان باتىرلىققا بالاپ، ودان دا وزەكتى ماسەلەدە نەلىكتەن ءۇنسىز قالعانىن سۇراپ، ساۋال جولداعان بولاتىن. ەندى ءبىرى قازاق قىزدارىنىڭ جالاڭاشتانۋى، اقشا ءۇشىن ارىن ساتۋى تۇپتەپ كەلگەندە ەر ادامداردىڭ كىناسى ەكەنىن ايتقان بولاتىن.
