ەلىمىزدەگى سوت سالاسىن گۋمانيزاسيالاۋ مەن سيفرلاندىرۋ حالىقارالىق پروكۋرورلار قاۋىمداستىعىنىڭ قىزىعۋشىلىعىن وياتتى. بۇل جايىندا Qamshy.kz اقپارات اگەنتتىگى digitalkz.kz سايتىنا سىلتەمە جاساپ حابارلايدى.

17ء-شى شىلدەدە قازاقستان رەسپۋبليكاسىنىڭ باس پروكۋراتۋراسىندا حالىقارالىق پروكۋرورلار اسسوسياسياسىنىڭ پرەزيدەنتى گەرحارد ياروشپەن كەزدەسۋ ءوتتى. باسقوسۋداعى نەگىزگى ماقسات -  ەلىمىزدەگى قىلمىستىق سوت تورەلىگى سالاسىنداعى رەفورمالارمەن تانىستىرۋ.

كەزدەسۋ بارىسىندا قىلمىستىق پروسەستى سيفرلاندىرۋ باعدارلاماسىن جۇزەگە اسىرۋ ماسەلەسى تالقىلاندى. سونىمەن قاتار، اعىمداعى جىلدىڭ باسىنان بەرى 4 مىڭنان استام قىلمىستىق ءىس ەلەكتوروندىق فورماتتا تەرگەلىپ جاتقاندىعى تۋرالى ايتىلدى. قازىرگى تاڭدا 1،8 مىڭ ءىس سوتقا ەلەكتروندى تۇردە جولدانعان. ونىڭ ىشىندە 1،3 مىڭى قاراستىرىلىپ، ءتيىستى شەشىمدەر شىعارىلىپتى.

ق ر باس پروكۋراتۋراسىنىڭ باسپا ءسوز قىزمەتىنىڭ مالىمەتىنشە، تۇرمەلەردىڭ حالىقارالىق رەيتينگىسىندە قازاقستاننىڭ 3-تەن 82-دەڭگەيگە كوتەرىلگەن. وسى كورسەتكىشكە بايلانىستى ەلىمىزدىڭ قىلمىستىق ساياساتتى كۇشەيتۋ ماسەلەلەرى الەمدىك پروكۋرورلاردىڭ قىزىعۋشىلىعىن وياتىپتى.

سوڭعى كەزەڭدە سوت سالاسىندا جاسالىپ جاتقان وڭتايلاندىرۋ جۇمىستارىنان ەلىمىزدە تۇرمەدە وتىرعانداردىڭ سانى 66 مىڭعا ازايعان (100 مىڭنان 34 مىڭعا). بۇل سوڭعى 27 جىل بويىنشا كورسەتكىش. بۇعان قوسا، 8 كولونيا جابىلىپ، جىل سايىنعى بيۋدجەت قاراجاتى 12 ملرد تەڭگەگە ۇنەمدەلدى.

ال، تۇرمەدەگىلەر سانىنىڭ ازايۋى كريمينوگەندى جاعدايدى ناشارلاتقان جوق، كەرىسىنشە جىل سايىن قىلمىستاردىڭ قايتالانۋى 7-10 پايىزعا تومەندەپ جاتىر.

قازاقستاندىق پروكۋرورلاردىڭ پىكىرىنشە، ىستەردى جاڭا فورماتتا تەرگەۋ قىلمىستىق پروسەستە ازاماتتاردىڭ قۇقىقتارىن ساقتاۋ كەپىلدىگىن بەرىپ، دالەلدەردى بۇرمالاۋ مەن سان ءتۇرلى زاڭنامانى بۇزۋ فاكتىلەرىن ازايتادى. وتاندىق پروكۋرورلاردىڭ وسى پايىمىمەن شەتەلدىك قۇقىق قورعاۋ قىزمەتكەرلەرى تولىقتاي كەلىستى.

كەزدەسۋ سوڭىندا حالىقارالىق پروكۋرورلار قاۋىمداستىعىنىڭ پرەزيدەنتى گەرحارد ياروش قازاقستاندىق تاراپتى جىلى قابىلداۋ جانە كونسترۋكتيۆتى تاجىريبە الماسقاندارى ءۇشىن العىسىن جەتكىزدى. سونىمەن قاتار، ىنتىماقتاستىقتىڭ ودان ءارى جالعاساتىنىنا سەنىم ءبىلدىردى.    

ايتا كەتەيىك، ەلىمىزدەگى سوت جۇيەسىن سيفرلاندىرۋ ناتيجەسىندە سوڭعى جىلدارى بۇل سالاعا اقپاراتتىق تەحنولوگيالار ەنگىزىلە باستادى. ياعني، سوت زالدارى قازىرگى زامانعا ساي ساپالى اۋديو-بەينەجازبا جۇرگىزۋگە ارنالعان تەحنيكالارمەن جابدىقتالىپ، بارلىق ءىس-قاعازدار مەن قۇجات اينالىمدارى ەلەكتروندىق فورماتقا اۋىستى. سونىمەن قاتار، ءبىرقاتار ەلەكتروندىق سەرۆيستەر جۇمىس ىستەيدى. اتاپ ايتساق، «تورەلىك» اقپاراتتىق جۇيەسى، «سوت كابينەتى»، دىبىس بەينە جازبا قۇرىلعىسى، بەينە-كونفەرەنس-بايلانس جۇيەسى، «ەلەكتروندى قىلمىستىق ءىس» جوباسى، ەلەكتروندىق سيفرلىق قولتاڭبا، «ۆيرتۋالدى سوت» جوباسى، «قۇقىقتىق قىزمەت ورتالىعى» مەن «تەرگەۋ سوتى» جوباسى جۇمىس ىستەيدى.