دەنيس تەن (13.06.1993 – 19.07.2018)
بۇگىن قازاقستاننىڭ تالانتتى ۇلى، بەتكە ۇستار ازاماتى دۇنيەدەن وزدى. نەبارى 25 جاسىندا باقيلىققا اتتاندى. قازاقستاننىڭ كوك تۋىن شەتەلدە جەلبىرەتىپ، قازاقستاننىڭ نامىسىن قورعاعان چەمپيون ەندى ارامىزدا جوق. ارتىندا جاقىندارى، تۋىستارى، دوستارى، تىلەۋلەستەرى مەن قازاقستاننىڭ سپورت تاريحىنداعى وشپەس ءىزى قالدى.
«دەنيس تەندى پىشاقتاپ كەتتى» دەگەن حابار تاراعاندا، تەزىرەك ساۋىعىپ كەتۋىن تىلەپ ەدىك، الايدا ماڭگىلىككە ايرىلامىز دەگەن وي بولمادى. كوپ ۇزاماي، دەنيستىڭ ومىردەن وزعانىن ەستىگەندە بويىمىزدى مۇز قارىپ وتكەندەي بولدى. نەتكەن قاتىگەزدىك! ادىلەتسىزدىك! ايدىڭ-كۇننىڭ امانىندا، تاپا-تال تۇستە ءبىر جۇدىرىق اينەككە بولا جاپ-جاس جىگىتتىڭ قىرشىننان قيىلعانى قازاق حالقىنىڭ جانىنا باتتى.
كىشكەنتايىنان حالىقتىڭ الدىندا ءجۇرىپ، ءارقاشان تەك جەڭىستەرىمەن قۋانتىپ، قاجىرلى ەڭبەك پەن ءوز ىسىنە دەگەن ادالدىق، شەكسىز ماحاببات قانداي بولاتىنىن ىسپەن دالەلدەپ، كورسەتىپ جۇرگەن ازامات ەدى. قىسقا عۇمىرىندا كوپ ءىس تىندىردى.
دەنيس ادامي قاسيەتى جوعارى، زور جەتىستىكتەرىنە قاراماستان كىشىپەيىلدىلىگىن، قاراپايىمدىلىعىن ساقتاي بىلگەن ازامات. بۇل تەك مادەنيەتى جوعارى ادامنىڭ عانا قولىنان كەلەدى.
قازاق حالقى ادام تەگىنە ەرەكشە كوڭىل بولەتىن حالىق. تەكتى ادامنىڭ ۇرپاعى دا تەكتى بولماق. دەنيستىڭ جاس بولسا دا باس بولا بىلگەنى ونىڭ ارعى اتا-باباسىنىڭ قانىمەن كەلگەن قاسيەت بولار. دەنيس كورەي يمپەرياسى كەزىندە داڭقتى قولباسشىسى بولعان گەنەرال مين گىنحونىڭ ۇرپاعى.
1993 جىلى 13 ماۋسىمدا دەنيس ەسىمدى قازاقستاننىڭ بولاشاق جارىق جۇلدىزى دۇنيەگە كەلگەن ەدى. نەبارى 13 جاسىندا قازاقستان چەمپيوناتىندا جەڭىسكە جەتتى. 2006 جىلى حالىقارالىق ارەناعا شىعۋعا تالابى مەن تالانتى جەتىپ تۇرسا دا جاسى جەتپەگەن ەدى. كىشكەنتاي دەنيس وزىنەن تاجىريبەلىرەك سپورتشىلارمەن بايگەگە تۇسۋگە دايىن بولعانى انىق. ەكى جىلدان كەيىن-اق دەنيس جاسوسپىرىمدەر اراسىندا «گران پري» سەرياسى بويىنشا وتكەن الەم كۋبوگى كەزەڭىندە 1 ورىندى يەلەندى.
2014 جىلى سوچي وليمپياداسىندا قولا جۇلدەگە يە بولدى. سوچي وليمپياداسىندا قازاقستان قورجىنىنا جالعىز جۇلدەنى ءدال وسى دەنيس تەن الىپ بەرگەن بولاتىن.
«جىگىتكە جەتى ونەر دە از» دەمەكشى، دەنيس مانەرلەپ سىرعاناۋدان بولەك، تەننيس، اكروباتيكا، تاەكۆوندو، كاراتە، جۇزۋمەن اينالىسقان. بي جانە سۋرەت سالۋ مەكتەبىنە بارعان.
جان-جاقتىلىعىمەن، ونەرىمەن تالايدى سۇيسىندىرگەن سپورتشىنى بۇگىن تۇسكى ۇشتەر شاماسىندا الماتىدا قۇرمانعازى جانە بايسەيىتوۆا كوشەلەرىنىڭ قيىلىسىندا پىشاقتاپ كەتتى.
دەنيس دەرەۋ اۋرۋحاناعا جەتكىزىلگەنىمەن دارىگەرلەر ونىڭ ومىرىنە اراشا تۇسە المادى. دەنيس كوپ قان جوعالتقان ەكەن. ادام ءومىرى ءۇشىن ماڭىزدى اعزالارىنا قاتتى زاقىم كەلىپ، سپورتشى و دۇنيەلىك بولدى.
قازاق حالقىن دەنيستەي ۇلىنان ايىرعان قىلمىسكەرلەر ءوز جازاسىن الادى دەگەن ۇمىتتەمىز.
مۇز ايدىنىندا قالىقتاپ، قازاقستاننىڭ نامىسىن ابىرويمەن قورعاعان، كوگىلدىر مۇز حانزاداسىنا باقۇل بول دەيمىز. بۇل تەك ءبىر وتباسىنىڭ عانا ەمەس، بۇكىل قازاقستان ءۇشىن ورتاق قايعى. بارشاڭىزعا قايعىرا كوڭىل ايتامىز.
