تانىمال ءانشى ديماش قۇدايبەرگەنوۆ قايتىس بولعان قازاقستاننىڭ داڭقتى سپورتشىسى دەنيس تەننىڭ قازاسىنا قاتىستى پىكىر ءبىلدىردى، دەپ جازادى Qamshy.kz اقپارات اگەنتتىگى.

«وسىنداي قايعىلى پوست جازامىن دەپ ەش ۋاقىتتا ويلامادىم. بۇعان سەنە الار ەمەسپىن. دەنيس، دوسىم، باۋىرىم. ءبىز سەنى قاتتى ساعىناتىن بولامىز. دوستىعىڭ ءۇشىن راحمەت ساعان، دجەكي! سەن ۇلى ادامسىڭ! سەن اڭىز بولىپ قالدىڭ! جارىق دۇنيەدەن ەرتە كەتكەنىڭ قانداي وكىنىشتى... مەن ءارقاشاندا سەنىڭ تالانتىڭا باس يەمىن، ءوزىڭدى قاتتى ساعىناتىن بولامىن. ەكەۋمىزدىڭ سوڭعى سويلەسكەن اڭگىمەمىزدى ەشقاشان ۇمىتپايمىن. سەن ەلىمىزدىڭ باتىر ازاماتىسىڭ!»، – دەپ جازدى ديماش ءوز Instagram-پاراقشاسىندا دوسىنان ايرىلىپ قالعانىن بىلگەن سوڭ.

كەيىنىرەك ءوز ەلىندە ءوز قانداسىنىڭ قولىنان قازا تاپقان دەنيستەن كەشىرىم سۇراپ، تاعى ءبىر جازبا قالدىردى.

«قازاقتىڭ نامىسىن قورعايمىن دەپ جانىن سالعان، بارىن سالعان ماقتانىشىمىزدى سول جەردە ءبىر قازاق كومەكتەسپەك تۇگىلى، ءوز قازاعىمىزدىڭ قولىنان جان تاپسىرعانىنا سەنە الار ەمەسپىن. الەمگە ءبىزدىڭ ۇلتىمىزدى ۇلىقتاپ، ەلىمىزدى تانىتقان ساۋساقپەن سانارلىق مايتالماندارىمىزدىڭ ءقادىرىن ءبىلىپ قورعاپ جۇرسەك بولاتىن ەدى عوي! ناعىز ەرجۇرەك باتىر ەدىڭ عوي، دوسىم. سەنىڭ قاراپايىمدىلىعىڭ، ادامي قاسيەتتەرىڭ  بارىمىزگە ۇلگى! ەكى ءسوزىڭنىڭ بىرىندە «مەنىڭ قازاقستانىم»، «مەنىڭ قازاعىم» دەۋشى ەدىڭ. مەنىڭ قانىمدى، مەنىڭ ۇلتىمدى، مەنىڭ ەلىمدى تانىتقانىڭا مىڭ تاعزىم. سەن ەشقاشان سونبەيتىن جۇلدىزسىڭ! كەشىر  ءبىزدى، دوسىم! وزەگىم ورتەنىپ بارادى»، - دەپ جازدى ءانشى.  

ايتا كەتەيىك، قازاقستاندىق چەمپيوندى ۇرى ءارى قاندىقول قىلمىسكەر قۇرمانعازى مەن بايسەيىتوۆ كوشەلىرىنىڭ قيىلىسىندا پىشاقتاپ كەتكەن ەدءى. سونىڭ سالدارىنان دەنيس 3 ليترگە جۋىق قان جوعالتتى. دارىگەرلەر ونىڭ ومىرىمەن 2 ساعات بويى ارپالىستى، الايدا ناتيجەسىز بولدى. جۇلدىز ءبىر ساتتە ءسوندى دە قالدى.