كاسىپكەردىڭ ايتۋىنشا، اينانى ۇرلاماق بولعان قىلمىسكەرلەردى ۇرلىق جازاسى بويىنشا قىلمىستىق ىسكە تارتۋ قاجەت، سەبەبى مۇنداي ادامدار ۇرلىقتىڭ كوبەيۋىنە الىپ كەلەدى.

قايرات قۇدايبەرگەن دەنيس تەندى ولتىرگەن كۇدىكتىمەن وقيعا ورنىندا قالاي سوقتىعىسىپ قالعانىن باياندادى. بۇل جايىندا Qamshy.kz اقپارات اگەنتتىگى BNews.kz سايتىنا سىلتەمە جاساپ حابارلايدى.

«بۇگىن 11.30 شاماسىندا دوسىممەن بىرگە دەنيس تەن قازا تاپقان جەرگە گۇل شوقتارىن قويۋعا كەلگەنبىز. دۇعا جاساپ، ءبىر مينۋت ۇنسىزدىكتەن كەيىن قايتۋعا جينالدىق، كەنەتتەن ءبىر توپ پوليسيا قىزمەتكەرلەرى مەن پروكۋرورلار جانە چەمپيوندى ولتىرگەن قولى كىسەندەۋلى قىلمىسكەر كورىندى. ونى وقيعا ورنىنا الىپ كەلگەن ەكەن. گۇل شوقتارىن قويۋعا كەلگەن حالىق قىلمىسكەردى قارعاپ-سىلەپ جاتتى: «قانىشەر!»، «ءولىپ قال!»، «سەندەي ادامدى جەر قالاي ءجۇر!» دەگەن سوزدەر ايتىلدى. كۇدىكتى قولىن بەتىمەن جاۋىپ، جىلاپ كەلە جاتتى»، - دەيدى قايرات قۇدايبەرگەن.

ونىڭ ايتۋىنشا، تەرگەۋشى كۇدىكتىدەن قىلمىستىڭ بۇگە-شۇگەسىنە سۇراپ، تەرگەي باستادى.

«مەليسيا بولىپ قىزمەت اتقارعاندا ءتۇرلى قىلمىسكەرلەردى كورگەنمىن. ارىقشا كەلگەن بۇل كۇدىكتى جىگىت پىشاق سۇققاندا نە ويلادى ەكەن؟ ادام ءولتىرۋ جايىندا ويلاماعان بولۋ كەرەك. الايدا ءاربىر ادام ءوزىنىڭ ىستەگەن ىسىنە جاۋاپ بەرىپ، لايىقتى جازاسىن الۋى ءتيىس»، - دەيدى كاسىپكەر.

ونىڭ ويىنشا، بۇل جىگىتتەر الدىن دا وسى سىندى ءتۇرلى قىلمىستار جاساپ، مۇنداي ىسپەن اينالىسىپ جۇرگەن.

«مەنىڭ ايتارىم – ۇرلانعان زاتتاردى ساتىپ الاتىنداردى جاۋاپقا تارتىپ، ءتيىستى جازاسىن بەرۋ كەرەك. ءدال سول ادامدار مۇنداي قىلمىستىڭ كوبەيۋىنە ىقپال ەتەدى. اينانى 40 مىڭ دەپ باعالادى. دەنيس تەننىڭ ءومىرى 40 مىڭ تەڭگە بولعانى ما سوندا؟» - دەپ كۇيىنەدى كاسىپكەر.