الماتى اكىمى باۋىرجان بايبەك جۇمىس ساپارى بارىسىندا قالانىڭ ينجەنەرلىك جەلىلەرىن قايتا جاساۋ جۇمىستارىن تەكسەردى. بيىل جازدا مەگاپوليستە 12 شاقىرىمنان استام جىلۋ جەلىسى جوندەلۋدە، 120 مىڭنان استام ابونەنتتەر ءۇشىن گاز قۇبىرلارى كەڭەيتىلىپ، سۋمەن قامتۋدىڭ جاڭا جۇيەلەرى جۇرگىزىلۋدە.

دۋلاتي كوشەسى بويىنداعى ۇزىندىعى 8،8 شاقىرىم كارىز كوللەكتورى ۋچاسكەسىنىڭ قۇرىلىسىن قاراپ شىققان مەگاپوليس باسشىسى قالانىڭ ەنەرگەتيكا جانە كوممۋنالدىق شارۋاشىلىق باسقارماسىنا جۇمىس قارقىنىن جەدەلدەتۋدى تاپسىردى.

«بارلىق وبەكتىلەر مەرزىمىندە بەرىلۋى جانە كەشەندى اباتتاندىرىلۋى، جاسىلداندىرىلۋى ءتيىس»، - دەپ اتاپ ءوتتى باۋىرجان بايبەك.

وتكەن جۇمىس ساپارىنىڭ قورىتىندىسى بويىنشا التىنسارين كوشەسى بويىنا ۇزىندىعى 2،8 شاقىرىم گاز قۇبىرىن تارتۋ جۇمىسى ويداعىداي اياقتالدى. وسىنىڭ ارقاسىندا 40 مىڭنان استام ابونەنت گازبەن ۇزدىكسىز قامتاماسىز ەتىلەدى.

جامبىل كوشەسى بويىمەن نازاربايەۆ داڭعىلى جانە پۋشكين كوشەسىنىڭ اراسىندا جىلۋ جەلىلەرىن قايتا جاساۋ جۇمىستارى مەرزىمىنەن بۇرىن اياقتالدى، ءقازىر مۇندا ماڭايدى اباتتاندىرۋ ءىسى جالعاسۋدا.

قالانىڭ ءبىرقاتار ۋچاسكەلەرىندە جۇمىستار جۇرۋدە، ولار شىلدەنىڭ سوڭىنا تامان اياقتالادى. جۇمىسى قوماقتى ءارى كۇردەلى ۋچاسكەلەر تامىز ايىنىڭ سوڭىندا ىسكە قوسىلادى. مۇنداعى بارلىق ابونەنتتەر ۋاقىتشا سىزبا ارقىلى ىستىق سۋمەن ۇزدىكسىز قامتاماسىز ەتىلەدى.

سۋمەن قامتۋدىڭ جانە سۋدان ءبولۋدىڭ جاڭا جەلىلەرىن سالۋ جۇمىستارى جالعاسۋدا. وسىنىڭ ارقاسىندا قالانىڭ 5 اۋدانىنىڭ 120 مىڭنان استام تۇرعىنى ساپالى سۋمەن جانە ورتالىقتاندىرىلعان كارىزبەن قامتاماسىز ەتىلەدى.

جۇمىس ساپارى كەزىندە الماتى اكىمى قالانىڭ تاريحي ورتالىعىن قايتا جاساۋ جۇمىسىن تەكسەردى. قازىرگى كەزدە اباي، ابىلاي حان، نازاربايەۆ داڭعىلدارى مەن اباي الاڭىنىڭ ۋچاسكەلەرىندە ينجەنەرلىك جەلىلەردى اۋىستىرۋ، تاس توسەۋ، سۋارۋ جۇيەسىن ورناتۋ، نىساننىڭ سىرتىن جاڭارتۋ جۇمىستارى جۇرۋدە.

رەكونسترۋكسيا بارىسىندا جاياۋ جۇرگىنشى، جاسىل جەلەك ايماقتارىن كەڭەيتۋ، جاڭا فونتاندار سالۋ قاراستىرىلعان.

ايتا كەتەرلىگى، وسى جازدا الماتىدا ۇزىندىعى 160 كم بولاتىن 150-دەن استام كوشە جوندەلەدى. بارلىق جەر استى وتپەلى جولدارعا كۇردەلى جوندەۋ جۇمىستارى جۇرگىزىلۋدە. ورتالىقتاندىرۋ قاعيداسى بويىنشا قالانىڭ بارلىق اۋداندارىندا اباتتاندىرۋ جۇزەگە اسۋدا. ەگەر وتكەن جىلى قالادا 500 اۋلا جوندەلسە، بيىل قالانىڭ بارلىق اۋداندارىندا تاعى دا 600-دەن استام اۋلا جوندەلەدى.

مەگاپوليستە سوڭعى جىلدارى 800 كم ينجەنەرلىك جۇيەلەر سالىندى جانە جوندەلدى، سونىڭ ىشىندە 313 كم سۋ قۇبىرى، 266 كم كارىز قۇبىرى، 150 كم ەلەكتر بەرۋ جەلىسى جانە 32،3 كم جىلۋ جەلىسى.