الماتى ەلىمىزدەگى كريمينال ءجيى ورىن الاتىن ءقاۋىپتى قالالاردىڭ تىزىمىندە كوش باستاپ تۇر. جىل باستالعالى قالادا 33،5 مىڭ قىلمىس ارەكەتتەرى تىركەلگەن ەكەن.

بۇل تۋرالى Qamshy.kz اقپارات اگەنتتىگى tengrinews.kz پورتالىنىڭ مالىمەتىنە سىلتەمە جاساپ حابارلايدى.

باس پروكۋراتۋراعا قاراستى قۇقىقتىق ستاتيستيكا جانە ارنايى ەسەپكە الۋ كوميتەتىنىڭ ۆەب-سايتىندا جاريالانعان قۇقىقبۇزۋشىلىق كارتاسىنىڭ دەرەكتەرىنە سايكەس، الماتى، شىعىس قازاقستان، قاراعاندى، وڭتۇستىك قازاقستان وبلىستارى مەن استانا جانە الماتى قالالارى قازاقستانداعى ەڭ ءقاۋىپتى وڭىرلەر بولىپ سانالادى.

الماتى قالاسى بويىنشا قالانىڭ ورتالىعىندى قىلمىس ءجيى ورىن الادى. ماسەلەن المالى اۋدانىندا جىل باستالعالى 7 064 قىلمىس تىركەلگەن. بيىل 19 شىلدەدە المالى اۋدانىنداعى قۇرمانعازى جانە بايسەيىتوۆا كوشەلەرىنىڭ قيىلىسىندا بەلگىلى قازاقستاندىق مانەرلەپ سىرعاناۋ شەبەرى دەنيس تەندى تۇسكى ۋاقىتتا پىشاقتاپ كەتكەن بولاتىن. 3 ليتر قان جوعالتقان سپورتشى اۋرۋحانادا قايتىس بولدى.

ودان كەيىن اۋەزوۆ اۋدانى (5 565 قىلمىس) جانە بوستاندىق اۋدانى (5 245 قىلمىس) ءقاۋىپتى اۋداندار رەتىندە تىركەلدى.

ال قىلمىس سانى جاعىنان ەڭ تومەنگى ورىندا تۇرعان اۋدان ناۋرىزباي ەكەن. وندا جىل باستالعالى 1 323 قۇقىق بۇزۋشىلىق ارەكەتتەر تىركەلگەن.