وسىدان بىرنەشە كۇن بۇرىن الماتىدا اعاش تۇبىنەن توسەنىشكە ورانعان بالا تابىلعان ەدى. وقيعا ورنىنا بارعان بەلگىلى دەپۋتات قايرات قۇدايبەرگەن بالانىڭ جاعدايىنا الاڭداپ، ەم-دوم شارالارىن ءوزى قامتاماسىز ەتەتىنىن جەتكىزدى. ال بۇگىن بالالار اۋرۋحاناسىنىڭ باس دارىگەرى اباي قۇسايىنوۆ «قايرات قۇدايبەرگەن 5 جاسار بالانىڭ وزىنە دە، اتا-اناسىنا دا ەشقانداي كومەك كورسەتكەن جوق» دەيدى.
«ول ەمنىڭ اقشاسىن تولەگەن جوق. بۇل جالعان! بالانى مەملەكەت ەمدەپ جاتىر. الگى وقيعادان كەيىن قايرات ءتىپتى بالامەن كەزدەسۋ ءۇشىن اۋرۋحاناعا دا كەلمەدى. تەك بالا اۋرۋحاناعا جەتكىزىلگەن كۇنى ەرىپ كەلدى»، - دەپ باسا ايتتى قۇسايىنوۆ پرەسس-كونفەرەنسيا بارىسىندا.
دەنساۋلىق ساقتاۋ باسقارماسى باسشىسىنىڭ ورىنباسارى نۇرجان يسابەكوۆ باس دارىگەردىڭ ءسوزىن راستادى.
«ب ا ق وكىلدەرى قايرات قۇدايبەرگەننىڭ بالاعا كومەكتەسكەنىن جارىسا جازىپ جاتىر، ءبىراق مۇلدەم ولاي ەمەس. بالا تەگىن ەمدەلىپ جاتىر. مۇمكىن قايرات اتا-اناسىنا كومەكتەسكەن شىعار، ول جاعىن بىلمەدىم»، - دەدى نۇرجان يسابەكوۆ.
الايدا مۇحاممەدتىڭ اناسى دا دەپۋتاتتىڭ تاراپىنان ەشقانداي كومەك كورمەگەن. اناسىنىڭ ايتۋىنشا، بالانىڭ جاعدايى قالىپتى. ال قايرات قۇدايبەرگەندى ۇلى اۋرۋحاناعا تۇسكەن كۇنى ءبىر رەت قانا كورگەن ەكەن.
سونىمەن قاتار ابزال قۇسايىنوۆ بالانىڭ قازىرگى جاعدايى تۋرالى ايتتى.
دارىگەردىڭ مالىمەتىنشە، مۇحاممەدتىڭ دەنەسىنىڭ وڭ جاق بولىگى السىرەگەن ەكەن، ءبىراق ول ۋاقىتشا نارسە. ءقازىر دەنساۋلىعى جاقسى، تەك ءالسىز. ءبىر رەت وپەراسيا جاسالعان.
ال پرەسس-كونفەرەنسيا ۋاقىتىندا قايرات قۇدايبەرگەن جەلىدەگى پاراقشاسىنا مۇحاممەدكە قاتىستى جازبا جاريالادى. جازباسىندا بالانى ەمدەپ جازعان دارىگەرلەرگە، اۋرۋحاناعا العىس ايتىپتى.
«اللاعا شۇكىر، 5 جاسار اسقاروعلى مۇحاممەد ەسىن جيىپ، رەانيماسيادان پالاتاعا اۋىستىرىلدى. مۇحاممەدتى امان ساقتاپ قالۋ ءۇشىن بارىن سالعان دارىگەرلەرگە زور العىس بىلدىرەمىز. 1 بالالار كلينيكالىق اۋرۋحاناسىنىڭ باس دارىگەرىنە ەرەكشە العىس.
اناسى مەن اكەسىنىڭ قۋانىشتان جۇرەكتەرى جارىلارداي بولىپ ءجۇر. بالاسىنىڭ امان قالعانىنا شۇكىر دەيدى. مۇحاممەدتىڭ تەزىرەك ساۋىعىپ كەتۋىن تىلەيىك»، - دەپ جازدى قايرات قۇدايبەرگەن.
ءىستىڭ ءمان-جايىن انىقتاۋ ءۇشىن Qamshy.kz اقپارات اگەنتتىگى دەپۋتاتتىڭ وزىنە حابارلاسىپ كوردى. الايدا تەلەفونى ءسوندىرۋلى. پاراقشاسىنداعى سوڭعى جازبالارىنا قاراعاندا دەپۋتات شەتەلدە جۇرگەنگە ۇقسايدى.
