تۇركىستان وبلىسى سوزاق اۋىلىندا كۇيەۋىنەن تاياق جەپ قاشىپ كەتكەن 19 جاستاعى كەلىنشەك تابىلدى. بۇل تۋرالى تۇركىستان وبلىستىق ءىىد حابارلادى.
ۆەدومستۆو مالىمەتىنە سۇيەنسەك، كەلىنشەك 24 شىلدەدە شىمكەنت قالاسىنداعى ساۋدا-ورتالىقتارىنىڭ بىرىنەن تابىلعان ەكەن.
19 جاستاعى جانسايا كۇيەۋىمەن بولعان ۇرىس-كەرىس سالدارىنان شىمكەنت قالاسىنا كەتىپ قالعان. 24 شىلدەدە كەلىنشەك كۇيەۋىنىڭ ۇستىنەن ارىز ءتۇسىردى. ارىز نەگىزىندە ق ر اقبتك-نىڭ 73-بابىمەن حاتتاما تولتىرىپ، جابىرلەنۋشىگە ساراپتاما جۇرگىزىلەتىن بولدى.
كۇنى كەشە جۋرناليست گۇلميرا ءابىقاي سوزاق اۋدانىندا 19 جاستاعى كەلىنشەكتىڭ جوعالىپ كەتكەنىن جازعان ەدى. دەرەكتەرگە سەنسەك، 7 اي بۇرىن كورشى اۋىلدىڭ بالاسى الىپ قاشتى. ەكى ايدان سوڭ توركىنىنە كوكالا قويداي بوپ اياعى سىنىپ كەلدى، ءۇش ايدان سوڭ قولى شىتىناپ تاعى كەلدى. بۇل جولى ءۇشىنشى رەت كەلگەندە "كەلىن بولعان جەردەن ءتۇڭىلدىم" دەپ كەسىپ ايتتى. الايدا جەڭگەلەرى سوڭعى رەت دەپ تۇندەلەتىپ كۇيەۋىنە قايتا قوستى. تاڭعى 6-دا ەنەسى مەن كۇيەۋى توسەك سيپاپ قالدى. جاس كەلىن بەلگىسىز جاققا كەتكەن كۇيى جوق.
