الماتىدا ەلوردانىڭ 20 جىلدىعىنا وراي قالالىق جاس اقىندار ايتىسى ءوتتى. الامانعا 8 اۋداننان ۇزدىك دەپ تانىلعان 16 ايتىسكەر قاتىستى. ولار بەس باستى باعىتتى قامتىپ وتۋلەرى ءتيىس. ونىڭ قاتارىندا، «استانانىڭ باس ساۋلەتشىسى – ەلباسى»، «ماڭگىلىك ەل» جانە «قازاق ءتىلى - مەملەكەتتىك ءتىل» تاقىرىپتارى بار. ءادىلقازىلار اقىنداردىڭ ونەرىن باعالاۋ كەزىندە سۋىرىپ سالما ونەرى مەن داۋىس مانەرىنە باستى ءمان بەرمەك. جەڭىمپازدار ارنايى ديپلوم جانە اقشالاي سىيلىقتارمەن ماراپاتتالادى.

«بۇل ايتىسكەر اقىنداردىڭ بارلىعى دا نەگىزىنەن ۇلكەن ساحنادا ايتىسىپ جۇرگەن. مىناۋ قازاق ايتىسىنىڭ مايتالمان اقىندارىنىڭ ءىزىن الىپ كەلە جاتقان، وكشەسىن باسىپ كەلە جاتقان اقىندار. كەلەشەكتە سول اقىنداردى الماستىرادى دەگەن ءبىزدىڭ ءۇمىتىمىز بار. سوندىقتان سول اقىنداردىڭ قاناتىن قاتايتىپ الايىق دەگەن نيەتپەنەن بۇگىن وسى قاسيەتتى قارا شاڭىراق قازاقستان جازۋشىلار وداعىنىڭ ادەبيەتشىلەر ۇيىندە مىنە وسى ايتىستى ۇيىمداستىرىپ وتىرمىز»،- دەدى الماتى قالاسى تىلدەردى دامىتۋ باسقارماسىنىڭ ءبولىم باسشىسى باقىت قالىمبەت. 

سونداي-اق اقپارات ايدىنىنداعى كىل مىقتىلار بايگەگە تۇسەتىن «مەملەكەتتىك ءتىل جانە ب ا ق» اتتى قالالىق بايقاۋدىڭ ماراپاتتاۋ شاراسى ءوتتى. وندا وزدەرىنىڭ كاسىبيلىگىن «ۇزدىك تەلەجۋرناليست» نوميناسياسى بويىنشا دالەلدەگەن ارىپتەستەرىم ءامىربولات قۇسايىن ۇلى مەن جادىرا ومارجان جۇلدەلى ورىندارعا يە بولدى. ولاردىڭ رەپورتاجدارى ۇزدىك دەپ تانىلعان. 40-تان استام جۋرناليست قاتىسقان بايقاۋدا ەش ءتىلشى ەلەۋسىز قالعان جوق.