سەمەيدىڭ ورتا مەكتەپ ۇستازدارىنا روبوتوتەحنيكا كابينەتتەرىندە جۇمىس جاساۋ بويىنشا كۋرس جۇرگىزىلۋدە.
شقو-دا ورتا مەكتەپ ۇستازدارى روبوتوتەحنيكا جانە IT-تەحنولوگيالارىمەن زاماناۋي كابينەتتەرىندە جۇمىس جاساۋ بويىنشا بىلىكتىلىك ارتتىرۋ كۋرستارىنان وتۋدە.
جازعى دەمالىس اياقتالعانعا دەيىن وبلىستا 544 ءمۇعالىم اتالعان كۋرستان وتەدى. «نۇر وتان» پارتياسىنىڭ باستاماسىمەن قولعا الىنعان بۇل جوبا بويىنشا جاڭا وقۋ جىلىندا شىعىس قازاقستان وبلىسىنىڭ 277 مەكتەبىندە روبوتوتەحنيكا جانە IT-تەحنولوگيالار كابينەتتەرى اشىلادى.
«IT-تەحنولوگيالارعا ارنايى باعدارلاما بويىنشا وقىتۋ ماسەلەسى العا قويىلعان تۇستا ءىرى كومپانيالاردان كوپتەگەن ۇسىنىستار تۇسۋدە. سەمەيدەگى ەلەكتروتەحنيكالىق كوللەدجدىڭ ماماندارى دايارلاعان «Junior training» كۋرسىنىڭ اۆتورلىق باعدارلاماسى - ۇسىنىلعان نۇسقالاردىڭ ىشىندەگى ەڭ ۇزدىگى اتاندى»، – دەدى وبلىس اكىمىنىڭ ورىنباسارى اسەم ءنۇسىپوۆا.
سەمەي ەلەكتروتەحنيكالىق كوللەدجىنىڭ ديرەكتورى ازات ساربەكوۆتىڭ ايتۋىنشا، كۋرستىڭ باستى ەرەكشەلىگى – حالىقارالىق تاجىريبەگە نەگىزدەلە وتىرىپ، شىعىس قازاقستان مەكتەپتەرىنىڭ مۇمكىندىكتەرىنە قاراي ورايلاستىرىلىپ جاسالعان.
بەس اپتاعا جوسپارلانعان كۋرستىڭ 3 اپتاسى باعدارلامانىڭ تەورياسىن وقۋعا، ال قالعان 2 اپتا ۇستازداردىڭ العان بىلىمدەرى مەن داعدىلارىن ءوز بەتتەرىمەن تاجىريبە نەگىزىندە كورسەتۋىنە ارنالادى.
«ءبىز ءار وقۋشىنى IT-تەحنولوگيالار سالاسىنداعى مامان قىلۋدى ماقسات تۇتپايمىز. الايدا، زامان تالابى سول بولعاندىقتان، قازاقستاننىڭ كەز كەلگەن ازاماتى سيفرلاندىرۋ جانە IT-تەحنولوگيا نەگىزدەرىن بىلگەنى ءجون. بالالار كىشكەنتاي كەزىنەن قاراپايىم ومىردە قاجەت بولاتىن تەحنولوگيالاردى يگەرەتىن بولادى. بۇدان بولەك، بۇل ساباقتار وقۋشىلاردىڭ اناليتيكالىق ويلاۋ قابىلەتىن ارتتىرىپ، شەتەل تىلدەرىن وڭاي مەڭگەرۋگە ىقپالىن تيگىزەدى. الايدا، بالالارعا ساپالى ءبىلىم بەرىپ، بويلارىندا قاجەت داعدىنى قالىپتاستىرۋ ءۇشىن، الدىمەن جالپى ءبىلىم بەرەتىن مەكتەپ ۇستازدارىن ۇيرەتىپ الۋ كەرەك»، – دەدى ءا. ءنۇسىپوۆا.
مەكتەپ مۇعالىمدەرىنىڭ ايتۋىنشا، وسىنداي بىلىكتىلىك ارتتىرۋ كۋرستارىن جۇرگىزۋ الداعى ۋاقىتتا ساپالى ءبىلىم بەرۋگە ىقپالىن تيگىزەدى.
«وقىتۋشىلار ءۇشىن بۇل وتە پايدالى، سەبەبى ءبىز روبوتوتەحنيكا جانە ءتۇرلى زاماناۋي تەحنولوگيالارمەن جۇمىس جاساعاندا بىلىكتىلىگىمىزگە سەنىمدى بولامىز. مەكتەپتەردەگى رابوتوتەحنيكا كابينەتتەرى وقۋشىلاردىڭ سۇيىكتى سىنىپتارى بولادى دەگەن ويدامىن»، – دەپ تاجىريبە الماسۋ كۋرسى بويىنشا ءوز پىكىرىن گلۋبوكوە اۋدانى، بەرەزوۆكا ورتا مەكتەبىنىڭ ماتەماتيكا ءمۇعالىمى ەلەنا بەرديايەۆا ءبىلدىردى.
