تۇركىستان وبلىسى اباي اۋىلىندا زورلانعان بالاعا قاتىستى ءىس توقتاتىلدى، - دەپ حابارلايدى Tengrinews.kz.

باس پروكۋراتۋرانىڭ تەرگەۋ توبى تۇركىستان وبلىسى اباي اۋىلىندا سەكسۋالدىق زورلىق قۇربانى بولعان بالاعا قاتىستى قوزعالعان ءىستى توقتاتتى.

"وقيعانىڭ شىنايىلىعىن انىقتاۋ ماقساتىندا بارلىق سوت ساراپتاماسى جۇرگىزىلدى: مەديسينالىق، پسيحولوگيالىق-پسيحياترلىق، بيولوگيالىق، مولەكۋليارلىق-گەنومدىق جانە تاعى باسقالارى. زارداپ شەككەن تاراپتىڭ وكىلدەرى رەسەي فەدەراسياسىنان، قىرعىزستاننان جانە گرۋزيادان جەكەمەنشىك جانە مەملەكەتتىك ساراپشىلاردى شاقىرۋدى سۇرادى. سونداي-اق، ماماندار رەتىندە ءتۇرلى سالالارداعى بالالار دارىگەرلەرى جۇمىلدىرىلدى"، - دەپ حابارلادى پروكۋراتۋرانىڭ باسپا ءسوز قىزمەتى.

وسى ءىس بويىنشا 14 كەشەندى سوت ساراپتاماسى مەن 4 ءتۇرلى زەرتتەۋ جۇرگىزىلگەنى ايتىلادى. ق ر قىلمىستىق كودەكسىنىڭ 15-بابىنىڭ 2-بولىگىنە سايكەس، سەكسۋالدىق زورلىق ءۇشىن جاۋاپكەرشىلىك 14 جاستان باستالادى.

"ءتورت كۇدىكتىنىڭ ىشىندە تەك بىرەۋى 14 جاسقا جەتكەن. ونىڭ ارەكەتى ق ر قىلمىستىق كودەكسىنىڭ 121-بابىنىڭ 4-بولىگىنە سايكەس دەپ تانىلدى. قالعاندارىنا قاتىستى قىلمىستىق ءىس توقتاتىلدى. سەبەبى ولار 14 جاسقا تولماعان. وقيعانىڭ باسقا ءمان-جايى جاريالانبايدى"، - دەپ حابارلادى باس پروكۋراتۋرا وكىلدەرى.

ەسكە سالا كەتەيىك، وسىعان دەيىن قوعام قايراتكەرى ارۋجان ساين اباي اۋىلىندا زورلانعان ەكىنشى بالاعا قاتىستى ءمان-جايىن ايتىپ بەرگەن بولاتىن.

ناۋرىزدىڭ ورتاسىندا وقو-نىڭ سارىاعاش اۋدانىنداعى اباي اۋىلىندا جەتى جاسار بالا زورلاندى دەگەن اقپارات جەلىدە تاراعان بولاتىن. بالانى جابىلىپ زورلاعاندار جوعارى سىنىپتىڭ وقۋشىلارى بولۋى مۇمكىن. 

كەيىنىرەك وقو ءىىد وكىلدەرى بۇل دەرەككە قاتىستى ق ر قىلمىستىق كودەكسىنىڭ 121-بابىنىڭ 4-بولىگى ("سەكسۋالدىق سيپاتتاعى زورلىق-زومبىلىق ارەكەتتەرى") بويىنشا قىلمىستىق ءىس قوزعالعانىن حابارلاعان ەدى.