سوڭعى ەكى جارىم جىل ىشىندە براكونەرلەرگە قاتىستى 4000-نان استام قۇقىقبۇزۋشىلىق انىقتالىپ، 58 زاڭسىز بالىق اۋلاۋشىنىڭ ۇستىنەن 35 قىلمىستىق ءىس قوزعالعان. براكونەرلەردەن جالپى سوماسى 125 ملن تەڭگە شىعىن ءوندىرىلدى، دەپ حابارلايدى اتىراۋ وبلىسى اكىمىنىڭ باسپا ءسوز قىزمەتى.
ق ر اشم اتىراۋ وبلىستىق ورمان شارۋاشىلىعى جانە جانۋارلار الەمى اۋماقتىق ينسپەكسياسىنىڭ باسشىسى دانيار بايماگامبەتوۆتىڭ ايتۋىنشا، بارلىق قۇزىرلى ورگانداردىڭ بىرلەسكەن جۇمىستارى ناتيجەسىندە براكونەرلىكپەن كۇرەس كەڭ كولەمدە جۇرگىزىلىپ كەلەدى.
-سوڭعى ەكى جىلدا قولدانىلعان شارالار ناتيجەسىندە براكونەرلىكپەن كۇرەس كۇشەيدى، مىسالى 2014-2015 جىلدارى 14 قىلمىستىق ءىس قوزعالسا، 2016-2017 جىلدارى 35 بولدى. سوڭعى ەكى جىلدا زاڭسىز بالىق اۋلاۋشىلار 125 ملن تەڭگە شىعىندى وتەدى، 2014-2015 جىلدارى – 33 ميل تەڭگە بولعان ەدى،-دەيدى دانيار بايماعامبەتوۆ. – 2016-2017 جىلدارى 11 مىڭ بالىق اۋلاۋ قۇرالىن، 600 ءجۇزۋ جانە كولىك قۇرالدارىن تاركىلەدىك، مىسال ءۇشىن 2014-2015 جىلدارى – 8500 اۋلاۋ قۇرالى مەن 367 كولىك قۇرالى تاركىلەنگەن ەدى.
بايماعامبەتوۆتىڭ ايتۋىنشا، ءقازىر ناقتى ناتيجەلەر بار.
- ايتا كەتۋ كەرەك، كوپ جىلدان بەرى بيىل عانا جايىق وزەنىندە عىلىمي-زەرتتەۋ جۇمىستارى كەزىندە شوقىر بالىعىنىڭ شاباقتارى انىقتالدى، بۇل بالىق قورعاۋ جۇمىستارىنىڭ تيىمدىلىگىن كورسەتەدى، باعالى بالىق تۇرلەرى ۋىلدىرىق شاشاتىن ورىندارىنا دەيىن جەتتى. وسىلايشا بيىل بەكىرەلەر جاساندى تۇردە عانا ەمەس، تابيعي تۇردە دە وندىرىلەدى،-دەيدى دانيار بايماعامبەتوۆ. –مەملەكەت باسشىسى بالىق قورىن بولاشاق ۇرپاقتارىمىز ءۇشىن دە ساقتاۋ مىندەتىن قويدى. ءقازىر زاڭسىز بالىق اۋلاۋمەن كۇشەيتىلگەن كۇرەس ناتيجەسىندە بولاشاققا ءۇمىتىمىز پايدا بولدى.
كۇزگى بالىق اۋلاۋ ماۋسىمىندا بالىق اۋلاۋ كووپەراتيۆتەرىنە بەرىلەتىن ءليميتتىڭ يگەرىلۋىنە ەرەكشە كوڭىل ءبولىنىپ وتىر. بالىق قابىلداۋ بولىمشەلەرى قاتاڭ قاداعالانادى. وسى شارالار بالىق شارۋاشىلىعى سۋبەكتىلەرىنىڭ كۆوتانى يگەرۋ مولشەرىن 87،3 پايىزعا دەيىن ارتتىرۋعا ىقپال ەتتى، بۇل سوڭعى 8 جىلداعى ەڭ جوعارى كورسەتكىش.
-وكىنىشكە قاراي، كەيبىر بالىق كووپەراتيۆتەرىنىڭ بارلىق اۋلاعان بالىقتارىن تىركەمەۋ دەرەكتەرى انىقتالدى، ول بالىق اۋلاۋعا بەرىلگەن ءليميتتىڭ تولىق يگەرىلمەۋىنە اكەلىپ، كولەڭكەلى نارىقتى ىنتالاندىردى، - دەيدى
اتىراۋ وبلىستىق ورمان شارۋاشىلىعى جانە جانۋارلار الەمى اۋماقتىق ينسپەكسياسىنىڭ باسشىسى.– ءقازىر ءار رەسمي بالىق اۋلاۋ قايىعى مەن بالىق قابىلداۋ بولىمشەلەرىن باقىلاۋدا ۇستاپ وتىرمىز، تابيعات پايدالانۋشىلاردىڭ زاڭمەن بەلگىلەنگەن تارتىپتە تەك رۇقسات ەتىلگەن بالىق تۇرلەرىن اۋلاۋلارىن دا قاداعالايمىز.
