ق ر سىرتقى ىستەر مينيسترلىگىنىڭ وكىلدەرى اقش-تا الاياقتىق جاسادى دەگەن كۇدىكپەن ۇستالعان قازاقستاندىق ءۇش قىزعا قاتىستى پىكىر ءبىلدىردى، - دەپ حابارلايدى Tengrinews.kz.

"ءيا، ءبىز قىزداردىڭ ۇستالعانىن راستايمىز. ۇستالعانداردىڭ ىشىندە قازاقستاننىڭ ءۇش ازاماتشاسى بار. ەكەۋى ءقازىر قاماۋدا، ال بىرەۋى دەنساۋلىعىنا بايلانىستا قالادان كەتپەۋ تۋرالى قولحاتپەن جىبەرىلدى. نيۋ-يوركتىڭ وڭتۇستىك وكرۋگىنىڭ پروكۋرورىنىڭ ءوتىنىشى بويىنشا ولار 20 جىلدان 30 جىلعا دەيىن باس بوستاندىعىنان ايىرىلۋ مۇمكىن"، - دەپ حابارلادى ق ر ءسىم رەسمي وكىلى ايبەك سمادياروۆ.

ونىڭ ايتۋىنشا، نيۋ-يوركتەگى قازاقستان كونسۋلدىعىنىڭ وكىلدەرى اقش-تا ۇستالعان ازاماتشالاردىڭ زاڭدى مۇددەلەرى مەن قۇقىقتارىن قورعاۋ بويىنشا قاجەتتى بارلىق كونسۋلدىق-قۇقىقتىق كومەكتى كورسەتىپ جاتىر.

ق ر ءسىم رەسمي وكىلى 1994، 1991 جانە 1970 جىلعى ءۇش ازاماتشانىڭ ۇستالعانىن ايتتى.

"بۇل اقش-تاعى ءىرى الاياقتىق بولدى. 25 ادام ۇستالدى. راريتەتتى كولىكتەردى ساتۋمەن اينالىسقان الاياقتاردىڭ ءىسى، كەلتىرىلگەن شىعىننىڭ جالپى سوماسى - 4،5 ميلليون دوللار"، - دەدى سمادياروۆ.

ريا نوۆوستي مالىمەتىنشە، شىلدە ايىنىڭ سوڭىندا اقش-تىڭ ادىلەت مينيسترلىگىنىڭ وكىلدەرى فەدەرالدى قاۋىپسىزدىك بيۋروسى وكىلدەرىنىڭ 25 ادامنىڭ كولىك ساتۋدا الاياقتىق جاسادى دەپ ايىپتالىپ جاتقانىن حابارلادى.

وڭتۇستىك وكرۋگتىڭ پروكۋراتۋراسىنىڭ مالىمەتىنشە، قىلمىستىق توپتىڭ قۇرامىندا رەسەيدىڭ جەتى ازاماتى، گرۋزيانىڭ بەس ازاماتى، ءازىربايجاننىڭ ءتورت ازاماتى جانە قازاقستاننىڭ ءۇش ازاماتى، لاتۆيانىڭ ەكى تۋماسى، ۋكراينانىڭ ەكى ازاماتى بولعان. سونداي-اق، ايىپتالعانداردىڭ ىشىندە اقش پەن تۇركيا ازاماتتارى بار.

ەسكە سالا كەتەيىك، وسىعان دەيىن ءۇش قازاقستاندىق پەن تاعى 22 ادامنىڭ اقش-تا كولىكتەردى ساتىپ، ءىرى كولەمدەگى الاياقتىق جاسادى دەپ ايىپتالىپ جاتقانى حابارلانعان بولاتىن.

پروكۋراتۋرا مالىمەتىنشە، وسى ىستەگى ءاربىر فيگۋرانت 30 جىلعا دەيىن باس بوستاندىعىنان ايىرىلۋى مۇمكىن. سونداي-اق، اقشا جىمقىرۋ ماقساتىندا الدىن الا كەلىسىمگە كەلىپ جۇمىس ىستەگەندەرى ءۇشىن ءارقايسىسى 20 جىلعا سوتتالۋى مۇمكىن ەكەنى ايتىلادى.