ءبىزدىڭ پوليسيا قىزمەتكەرلەرى حالىققا قىزمەت ەتەدى مە الدە حالىققا قارسى جۇمىس ىستەي مە؟ ۇنەمى ءبىر زاڭسىزدىق ورىن السا، ايتەۋىر قارا حالىقتىڭ زارلاپ، جىلاپ جاتقانىن، «ادىلدىك جوق» دەپ شىرىلداپ جۇرگەنىن كورەمىز. قولدارىندا ەشقانداي بيلىگى، تانىسى جوق اشىنعان حالىق قارعىس ايتقاننان باسقا امالى قالمايدى. وسىدان كەيىن بيلىكتەگىلەر "بىزگە سەنىڭىزدەر، ءبىزدىڭ زاڭ ادىلدىكتى جاقتايدى"، - دەپ ايعايلايدى. حالىق نەگە بيلىككە، زاڭعا سەنبەيدى؟ بيلىك قاراپايىم حالىق زاڭدىق تۇرعىدان ساۋاتسىز دەپ اقتالعانىمەن، ءتۇرلى زاڭسىزدىقتاردى ءوز كوزىمەن كورىپ جۇرگەن قارا حالىق ۇيىنە ۇرى تۇسسە دە "پوليسيا شاقىرعانمەن تۇك پايدا جوق، ۋاقىتىمىز بەن جۇيكەمىزدى عانا قۇرتامىز"، دەپ ايتادى. ءبىزدىڭ زاڭ قىزمەتمەتكەرلەرى مويىنداماسا دا، انانى-مىنانى ايتىپ اقتالسا دا، بۇل - شىندىق...

11 تامىزدا شقو ءۇرجار اۋدانىنا قاراستى الاكول ايماعىندا بولعان وقيعانى بايانداۋعا رۇقسات ەتىڭىزدەر. الەۋمەتتىك جەلىدە تاراعان تومەندەگى ۆيدەولارعا قاراعاندا پوليسيا قىزمەتكەرلەرى الاكول دەمالىس ايماعىندا دەمالۋشىلارعا قىزمەت كورسەتىپ جۇرگەن جۇمىسشىلاردى جۇمىس ورنىنان قۋعان. جەرگىلىكتى حالىقتىڭ ايتۋىنشا، بۇل وبلىس اكىمشىلىگىنەن كەلگەن ارنايى بۇيرىق-مىس. ەڭ سوراقىسى، پوليسيا قىزمەتكەرلەرى جەرگىلىكتى تۇرعىنداردى قۋىپ قانا قويماي، قوقان-لوققى كورسەتىپ، ۇرىپ-سوققان كورىنەدى.

بۇل جەردە جەرگىلىكتى تۇرعىندار ارنايى انىقتاماسىز، زاڭسىز جۇمىس ىستەۋى دە مۇمكىن. ءبىراق پوليسيا قىزمەتكەرلەرىنىڭ ۇرىپ-سوققانى، قوقان-لوققى كورسەتكەنى ءوز قىزمەتىن اسىرا پايدالانعاندىق ەمەس پە؟! پوليسيا قىزمەتكەرلەرىنىڭ اناسىنداي ادامدى يتەرىپ، جۇلقىلاۋىنىڭ ءوزى زاڭسىزدىق قوي. جوق، الدە زاڭ قىزمەتكەرلەرىنە جول ەرەجەسىن بۇزۋعا، ادامدارعا قوقان-لوققى جاساپ، ۇرىپ-سوعۋعا رۇقسات بەرىلگەن بە؟ 

ءبىزدىڭ ەلدىڭ پوليسيا قىزمەتكەرلەرى جانسىز روبوت سەكىلدى. ەشقانداي ادامدىق، اياۋشىلىق دەگەندى بىلمەيدى، تەك قانا وزدەرىنە بەرىلگەن تاپسىرمانى، بۇيرىقتى عانا ورىندايدى. بيلىك قاراپايىم حالىقتى ولتىرىڭدەر دەسە دە ەش ءمىز باقپاستان ولتىرە سالادى-اۋ وسى. قاراپايىم حالىقتىڭ ارتىندا قورعاۋشىسى، باسقالار سەكىلدى "ماكە، ساكەلەرى" جوق بولعاندىقتان حالىقتى قاناۋ دا، ولاردىڭ بار مۇلكىن تاركىلەل، جاساپ جاتقان ءناپاقاسىنان ايىرۋ دا وڭاي. 

ءوز ەلىن، ءوز جەرىن مەكەندەسە دە، ادىلدىك ىزدەپ زارلاپ جۇرگەن دە، جۇمىس ىزدەپ سارىلىپ جۇرگەن دە، پاتەردەن پاتەرگە كوشىپ جۇرگەن دە ءوزىمىزدىڭ قازاق. ەڭ وكىنىشتىسى دە وسى...