«تۋعان جەر» ارنايى جوبانىڭ اياسىندا مەكتەپ وقۋشىلارىنىڭ، جالپى ازاماتتاردىڭ ەلىمىزدىڭ قاسيەتتى جەرلەرىنە ساياحاتى، قالتالى ازاماتتاردىڭ ءوز ولكەلەرىن دامىتۋعا ۇلەس قوسۋى سىندى ونەگەلى ىستەر جۇزەگە اسىپ جاتىر دەپ حابارلايدى Qamshy.kz اقپارات اگەنتتىگى ruh.kz سايتىنا سىلتەمە جاساي وتىرىپ. «تۋعان جەر» جوباسىنىڭ جاقىن ارادا جارىققا شىققان تاعى ءبىر جاڭالىعى – 5-7 سىنىپتارعا ارنالعان وزگە فورماتتاعى «ولكەتانۋ» وقۋلىعى. اتالعان وقۋلىقتا تاريح، گەوگرافيا، ادەبيەت، مۋزىكا سياقتى پاندەر بىرىكتىرىلىپ، وقۋشىنىڭ تانىمىن كەڭەيتەتىن تاماشا دۇنيەلەر ۇسىنىلعان.

«ولكەتانۋ» وقۋ قۇرالى ءار وبلىسقا جەكە-جەكە جارىق كوردى. مىسالى، الماتى وبلىسىنا ءوز الدىنا، اقمولا وبلىسىنا ءوز الدىنا، تاعىسىن تاعى...

ءبىز بۇگىن اقمولا وبلىسىنىڭ قۇندىلىقتارىمەن، باي مۇراسىمەن، تاريحىمەن، ادەبي-مادەني، مۋزىكالىق ەرەكشەلىكتەرىمەن تانىستىراتىن «ولكەتانۋ» وقۋلىعى تۋرالى ءسوز قوزعاماقپىز.

اتالعان ايماقتىڭ تاماشالارىن تىزگەن وقۋ قۇرالى كوكشەتاۋ قالاسىندا تانىستىرىلدى. اقمولا وبلىسىنىڭ ءبىلىم باسقارماسىنىڭ باسشىسى گامازوۆتىڭ ايتۋىنشا، ايماقتىڭ تاريحىن جانە وزگە دە قۇندىلىقتارىن وقۋشىلارعا تانىستىرىپ، ۇلتتىق رۋحىن كوتەرەتىن، وتانسۇيگىشتىككە باۋليتىن «ولكەتانۋ» وقۋلىعىنا 20 ساعات بولىنبەك. العاش رەت مەكتەپ باعدارلاماسىنا ەنىپ وتىرعان وقۋلىقتىڭ بىردەن مۇنداي جوعارى كولەمدەگى ساعاتقا يە بولۋى جامان كورسەتكىش ەمەس. «ولكەتانۋ» وقۋلىعى ءوزىنىڭ نەگىزگى مىندەتى – ايماقتىڭ قۇندىلىقتارىن، مۇراسىن وقۋشىلارعا تانىستىرۋمەن قاتار، بيولوگيا، گەوگرافيا، تاريح، ادەبيەت، مۋزىكا سەكىلدى نەگىزگى پاندەردى تولىقتىرىپ، جەتىلدىرىپ وتىرادى.

ماڭىزى جوعارى، اسا ۇلكەن تالعامدا جازىلىپ، تالاي سۇزگىدەن ءوتىپ، ساراپتالعان وقۋ قۇرالىنىڭ اۆتورلىق قۇرامىنا ەكولوگيا، تۋريزم جانە ولكەتانۋشىلار، جوعارىدا اتالعان پاندەر بويىنشا بىلىكتى ۇستازدار كىردى. اتاپ وتسەك: ج.مۋسين اتىنداعى كوكشەتاۋ جوعارى پەداگوگيكالىق كوللەدجىنىڭ ديرەكتورى نۇرتاس احات، اقمولا وبلىستىق تاريحي-ولكەتانۋ مۇراجايىنىڭ ديرەكتورىنىڭ ورىنباسارى الما قۇنانبايەۆا، ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ۇستازى، پەداگوگيكا عىلىمدارىنىڭ كانديداتى يۆان پلاچينتا، «كەلەشەك-2030» باسپا ءۇيىنىڭ رەداكتورى شاعبان بەكتاسوۆ، وبلىس كولەمىندە جانە رەسپۋبليكاعا تانىمال ۇستاز جانە پۋبليسيست اليا احەتوۆا.

«ولكەتانۋ» وقۋلىعى 5-7 سىنىپتارعا ارنالعاندىقتان، ول وسى ارالىقتا وتە ماڭىزدى پاندەردى بىرىكتىرەدى. جوعارىدا ايتىلعان پاندەردىڭ ەڭ قايماقتى، قاجەتتى ءارى بۇرىن-سوڭدى ەشبىر جەردە جاريالانباعان تىڭ دەرەكتەرى جيانلعان وقۋلىقتىڭ ماڭىزىنىڭ زور ەكەنى ايتپاسا دا بەلگىلى.

وقۋلىقتىڭ مازمۇنى جايى اقمولا وبلىستىق تاريحي-ولكەتانۋ مۇراجايىنىڭ ديرەكتورىنىڭ ورىنباسارى الما قۇنانبايەۆا بايانداما جاساپ، وقۋ قۇرالىنىڭ ارتىقشىلىقتارىن تىلگە تيەك ەتتى. ونىڭ ايتۋىنشا، جاڭا ۇرپاق ءوزىنىڭ تاريحىن تەرەڭ تانىپ، ءوزىنىڭ ءتۇپ-تامىرىنىڭ دارەجەسىن ءبىلۋى كەرەك جانە تۋعان ولكەسىنىڭ وزىنە ءتان سالت-داستۇرلەرىن، قاعيدالارىن، باي تاريحي مۇرالارىن ساقتاۋدى ۇيرەنۋى شارت. سونىمەن قاتار، بۇل كىتاپ ارقىلى ۇلت بولاشاعى سانالاتىن مەكتەپ وقۋشىلارىنىڭ ساناسىنداعى وتانسۇيگىشتىك، ۇلتتىق رۋح، ازاماتتىق بولمىس سەكىلدى سەزىمدەر ۇلعايىپ، وقۋشىعا جاڭا مۇمكىندىكتەر اشادى.

زاماناۋي ستاندارتتارعا ساي، ۇلت تاريحىنداعى ۇلى بەلەس سانالعان «رۋحاني جاڭعىرۋ» باعدارلامالىق ماقالاسىنىڭ اياسىندا جارىق كورگەن «ولكەتانۋ» وقۋلىعىن كوپشىلىككە ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ۇستازى، پەداگوگيكا عىلىمدارىنىڭ كانديداتى تانىستىردى. ول كىتاپتىڭ جالپى مازمۇنى جايلى جانە يلليۋستراسيالىق بەزەندىرىلۋ دەڭگەيى جايلى ءسوز قوزعاپ، بۇل وقۋلىقتاردىڭ مەكتەپ وقۋشىسى ءۇشىن قانشالىقتى پايدالى ەكەنىنە توقتالدى.

وبلىستا «ولكەتانۋ» ساباقتارى 2018/2019 وقۋ جىلىنىڭ ەكىنشى جارتىجىلدىعىنان باستاپ، وقۋشىلاردىڭ مەكتەپ باعدارلاماسىنا ەنگىزىلىپ، جۇرگىزىلمەك.

ەستەرىڭىزگە سالا كەتەيىك، بۇعان دەيىن الماتى وبلىسى تۋرالى جارىق كورگەن "ولكەتانۋ" وقۋلىعىنان شي شىعىپ، شۋ كوتەرىلگەن بولاتىن. "الماتىكىتاپ باسپاسى" ءوز كەزەگىندە بۇل ەسكى جاڭارتىلماعان نۇسقا دەپ ۇيدەي بالەدەن قۇتىلعان بولاتىن.