الماتى وبلىسى پوليسياسى مۇگەدەك ايەلدى قورلاعان بالانى تاپتى. يۋۆەنالدى پوليسيا ۆيدەوداعى ەكىنشى بالانىڭ دا كىم ەكەنى انىقتادى، دەپ حابارلايدى inform.kz.

«بالالاردىڭ ءبىرى 2008 جىلى دۇنيە كەلگەن. ءۇشىنشى سىنىپتى بىتىرگەن. تاربيەلەنىپ وتىرعان وتباسى تولىق ەمەس. ونىڭ 3 جاستاعى قارىنداسى جانە ەمشەكتەگى بالا بار. ەكىنشى بالا باسقا اۋداننىڭ تۇرعىنى. اتا-اناسىن اكىمشىلىك جاۋاپكەرشىلىككە تارتۋ ۋاقىت ەنشىسىندە» دەيدى الماتى وبلىسى ءىىد-نىڭ باسپا ءسوز قىزمەتىنىڭ باسشىسى سەرگەي نەزنايەۆ.

بالالاردىڭ اتا-اناسىن 127 باپ بويىنشا اكىمشىلىك جاۋاپكەرشىلىككە تارتۋ ماسەلەسى قارالىپ جاتىر. ولارعا 16 835 تەڭگەدەن 48 100 تەڭگەگە دەيىن ايىپپۇل سالۋ قاراستىرىلعان.

ەستەرىڭىزگە سالا كەتەيىك، ەكى بالا ايالدامادا وتىرعان مۇگەدەك ايەلگە قورلىق كورسەتكەن. ولاردىڭ ارەكەتى كامەراعا ءتۇسىپ قالعان. ۆيدەو Facebook الەۋمەتتىك جەلىسىندە تارالىپ، جەلى قولدانۋشىلارى بالالاردى تاۋىپ، اتا-اناسىن جاۋاپكەرشىلىككە تارتۋدى تالاپ ەتكەن بولاتىن.