ەلىمىزدە جالعاندى جالپاعىنان باسىپ جۇرگەندەر بۇزاقىلىق ىس-ارەكەتتەر جاساپ جۇرسە دە زاڭدى ءوز كەرەگىنشە بۇرمالاپ، جازادان قۇتىلىپ كەتىپ جاتىر. زاڭسىز ىس-ارەكەتتەر جايىندا حالىقتىڭ ايتا-ايتا اۋىزى دا تالىپ كەتتى. قوعامدا تەك قۇزىرلى ورگانداردا تانىسى بارلاردىڭ مۇمكىندىگى شەكتەۋسىز دەگەن پىكىر بەلەڭ الىپ كەتكەن. قۇزىرلى ورگانداردىڭ سالعىرتتىعىنان سانىن سوعىپ، ادىلدىك ىزدەپ شىر-پىر بولىپ جۇرگەن ءبىر جەلى قولدانۋشىسىنىڭ وقيعاسىن Qamshy.kz اقپارات اگەنتتىگى نازارلارىڭىزعا ۇسىنادى.

«جازىپ وتىرىپ كوزىمە جاس كەلدى، بار ءۇمىت تەك قاراپايىم حالىقتا، سەبەبى ءبىزدىڭ قۇقىعىمىزدى قورعاۋى ءتيىس ادامدار، شىن مانىندە، كەرىسىنشە ونى تاپتاپ، «ءوزىنىڭ تانىستارىن» قورعاۋدا. 5 تامىز كۇنى جانتۇرشىگەرلىك وقيعا ورىن الدى، وعان كىنالى ادامدار ءتيىستى جازاسىن الماي وتىر.

5 تامىز ساعات 00:30 شاماسىندا استانا قالاسىنداعى سارايشىق كوشەسىندە ۇلكەن جول اپاتى بولدى – ءازىربايجان ۇلتىنىڭ ادامى، ءوزى ماس BMW ماركالى كولىگىمەن قارسى بەتكە شىعىپ كەتىپ، 4 كولىكتى، ءبىزدىڭ كولىگىمىزدى قوسا سوعىپ ءوتتى. ءتورت  كولىككە دە ايتارلىقتاي زاقىم كەلگەن، ۇشەۋى جۇرۋگە جاراماي تۇر. جول اپاتىنا كىنالى ەر ادامدى جەدەل جاردەم الىپ كەتكەن ەدى، 20-30 مينۋتتان كەيىن ول جەردەن قاشىپ كەتىپتى. كەيىننەن 1 كۇن وتكەننەن سوڭ جاراقاتتانعان كۇيىندە قايتىپ كەلدى، الايدا ول مەديسينالىق ساراپتاما مەن تەرگەۋدەن وتپەدى. ايداپ جۇرگەن كولىگى ونىكى ەمەس، دوسىنىڭ كولىگى ەكەن، ەكەۋىنىڭ دە ساقتاندىرۋ قۇجاتتارى جوق. كولىكتىڭ يەسى، ياعني كىنالىنىڭ دوسى جول اپاتى بولعان جەرگە كەلگەن، ءوزى كاسىبي كولىك ايداۋشى، ءارى پارلامەنت سەناتىنىڭ دەپۋتاتتىعىنا ۇمىتكەر ەكەن، بۇگىندە استانا اكىمدىگىنىڭ قۇقىق ءبولىمىنىڭ باس مامانى قىزمەتىن اتقارادى ەكەن.

جول اپاتىنا قاتىستى قىلمىستىق ءىس جىلجىماي، توقتاپ قالدى، كىنالى ادامداردىڭ ەشبىرىنەن تۇسىنىكتەمە الىنبادى. فورما كيگەن تەرگەۋشى نە سەبەپتى وسى ۋاقىتقا دەيىن جول اپاتىنا كىنالى ادام مەن كولىكتىڭ يەسىن، سول وقيعا بولعان كەزدە بىزبەن بىرگە بولعان ادامداردى تەرگەمەگەنىن ايتپاي وتىر. كولىك يەسىنىڭ بۇل ىسكە ەشقانداي قاتىسى جوق دەيدى. ال اۋرۋحانادا جاتقان جول اپاتىنا كىنالى دوسىنا كۇنىگە فورما كيگەن ادامدار كەلىپ، اڭگىمە-دۇكەن قۇرىپ وتىرادى»، - دەپ كۇيىنەدى جاپا شەگۋشى ليۋدميلا كراۆچەنكو.

ونىڭ ايتۋىنشا، كۇيەۋى ەكەۋى كولىكتى 3،5 جىلعا نەسيەگە العان ەكەن. بۇگىندە بار كۇنكورىسى سول كولىككە قاتىستى بولعان وتباسى جۇمىسسىز قالدىق دەپ كۇيىنىپ وتىر.

«كولىگىمىزگە ايتارلىقتاي زاقىم كەلگەن، ونى جوندەتۋگە قاراجاتىمىز جەتپەي وتىر. تەك ءبىز عانا ەمەس، جاپا شەككەن قالعان ءۇش كولىكتىڭ يەسى دە ءدال ءبىزدىڭ جاعدايىمىزدى كەشىپ وتىر. سوندا ەگەر سەنىڭ تانىسىڭ نەمەسە قۇزىرەتتى كوكەڭ بولماسا باسقالار سەنىڭ قۇقىعىڭدى تاپتاۋعا مۇمكىندىگى بار ما. كولىگىمىز بۇزىلىپ، جاپا شەككەن 4 جۇرگىزۋشى ءبىر اپتا بويى تابانىمىزدان  توزىپ، ەڭ قۇرىعاندا كىنالىلەردى تەرگەۋگە الار دەپ كۇتۋدەمىز. كوپتەگەن ادامدار ءبىزدى جۇباتىپ، قولدارىنان كەلگەنشە كومەك كورسەتۋدە. ال وقيعاعا كىنالى مەن ونىڭ دوستارى جانە كولىكتىڭ يەسى ءبىزدىڭ ۇستىمىزدەن كۇلىپ، مازاق ەتەدى.

مەن ءوزىم ءمۇعالىم بولىپ قىزمەت اتقارامىن، بالالاردى ۇنەمى ازاماتتىق پوزيسياعا ۇيرەتىپ، ادىلدىك پەن شىندىق بار دەپ ايتىپ، سوڭىنا دەيىن پاتريوت بولدىم. ادال ەڭبەكپەن اقشا تاۋىپ جۇرگەن ادامدار ادىلەتسىزدىككە تاپ بولمايدى دەپ ويلاپ ەدىم...»، - دەيدى جابىرلەنۋشى.