سەمەي قالاسىنىڭ اكىمى ەرماك ءسالىموۆ «سەمەي-نوۆوسىبىر» باعىتىنداعى ورتەنگەن اۆتوبۋستان 48 جولاۋشىنى قۇتقارعان ەرجان امارحانوۆپەن كەزدەستى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
ەسكە سالا كەتەيىك، تامىزدىڭ 4-ىنەن 5-ىنە قاراعان ءتۇنى «سەمەي - ءنوۆوسىبىر» باعىتىنداعى جولاۋشىلار اۆتوبۋسى ورتكە ورانعان بولاتىن. سول اۆتوبۋستا وتىرعان 37 جاستاعى سەمەيلىك ەرجان ءتىلسىز جاۋدان 48 جولاۋشىنى جالعىز ءوزى قۇتقاردى.
ول ادامداردى سىرتقا شىعارىپ، جانتالاسىپ جۇرگەندە ونىڭ قۇجاتتارى مەن كولىك ساتىپ الۋ ءۇشىن الىپ شاققان 1،4 ملن تەڭگەدەن استام اقشاسى جانىپ كەتتى. قالا باسشىسى بەيبىت كۇننىڭ باتىرىن جەكە قابىلدادى. ەرماك بيداحمەت ۇلى ازاماتتىق، ەرلىك تانىتقان ءۇشىن ەرجانعا ريزاشىلىعىن ءبىلدىردى.
«ساعان ازاماتتىق كورسەتكەنىڭ ءۇشىن العىس ايتامىن. ناعىز ەر جىگىتكە ءتان قاسيەت تانىتتىڭ. كەز-كەلگەن ادام ءوز باسىن قاتەرگە تىگىپ، ەرلىك جاساي بەرمەيدى»، - دەدى قالا اكىمى.
قازىرگى ۋاقىتتتا جانىپ كەتكەن بارلىق قۇجاتتارىن راسىمدەۋ بويىنشا جۇمىستار ءجۇرىپ جاتىر. ءنوۆوسىبىر قالاسىنان كولىك الۋعا دەپ جيناعان قوماقتى قارجىسىنىڭ جانىپ كەتۋىنە بايلانىستى، جەرگىلىكتى كاسىپكەر «گوردورستروي» ج ش س ديرەكتورى باۋىرجان قايرامبايەۆ 1 ميلليون تەڭگە بەردى. قالا اكىمى ەرماك ءسالىموۆ ونىڭ جەكە ءومىرى، وتباسى تۋرالى ءبىلىپ، جەرگىلىك بيلىك كومەك كورسەتۋگە دايىن ەكەنىن جەتكىزدى. بۇگىندە ەرجان بوس ۋاقىتىندا جاس سپورتشىلاردى كۇرەسكە جاتتىقتىرۋمەن اينالىسادى. بۇل باعىتتاعى جۇمىستارىنا الداعى ۋاقىتتتا ەرماك بيداحمەت ۇلى قولداۋ بىلدىرەتىنىن ايتتى.
