ماسكەۋدە 4ء-شى قاباتتان قۇلاعان توميريس بايسافانىڭ اناسى ينستاگرام پاراقشاسىندا قىزىنا باستى نارسەنى ۇيرەتپەگەنىن جازدى.
«ءوزىم ءۇشىن توميريس تۋرالى كوپ جازامىن. جازعانىمدى وقىعان سايىن انا رەتىندە ماقتانا الاتىنىمدى، بالاما بارلىعىن ۇيرەتكەنىمدى ءتۇسىندىم. توميريس تاعامدى ءدامدى دايىندايتىن، ءۇي جۇمىسىنا پىسىق بولدى. سپورتپەن شۇعىلداندى، روليكتە، كونكيدە كاسىبي تۇردە سىرعاناي الاتىن. جاقسى بيلەيتىن، دومبىرادا وينايتىن، بىرنەشە تىلدە سويلەپ، ۇلكەندەردى سىيلايتىن...ءبىراق مەن وعان باستى نارسەنى ۇيرەتپەپپىن. ءوزىن قورعاۋدى. كەز كەلگەن تۇسىنىكسىز جاعدايدا اباي بولۋ، جاعدايدى ساراپتاۋ، ءقاۋىپتى جەردەن، اڭگىمەدەن، ۇرىستان ساقتانۋدى. بالالارىڭىزدى ساق بولۋعا ۇيرەتىڭىز!..دەنيسپەن ءدال وسىنداي قايعىلى جاعداي بولدى. ول ءوزىن ساقتاي المادى. ماسەلە اينادا ەمەس...ونىڭ جەكە مەنشىگىنە قول سۇعىلدى. «ەشكىم بىرەۋدىڭ زاتىن الا المايدى» دەپ ويلادى ول. تومپي دە (توميريس) ونىڭ جەكە تەرريتورياسىنا بىرەۋ باسا كوكتەپ كىرەدى دەپ ويلامادى. سوندىقتان بالالارىڭىزدى وزىنە قامقور بولۋدى ۇيرەتىڭىزدەر. ءوزىڭىزدى اناڭىز، سۇيىكتىڭىز، بالالارىڭىز ءۇشىن ساقتاڭىز» دەپ جازدى جاننا احمەتوۆا.
ايتا كەتەيىك، جاقىندا توميريس بايسافانىڭ اناسى ءىس رەسەيدىڭ ماسكەۋدەگى تەرگەۋ باسقارماسىنىڭ تەرگەۋ كوميتەتىنە جىبەرىلگەنىن حابارلاعان.
ەستەرىڭىزگە سالا كەتەيىك، 2018 جىلدىڭ ءساۋىر ايىندا توميريس بايسافا ماسكەۋ مەملەكەتتىك حالىقارالىق قاتىناستار ينستيتۋتىنىڭ 4ء-شى قاباتىنداعى ءدارىسحانانىڭ تەرەزەسىنەن قۇلاپ كەتكەن.
1997 جىلعى توميريس تاڭعى 4.00-تە قايتىس بولدى. تەرگەۋشىلەر ساۋىردە اتالمىش ىسكە قاتىستى قىلمىستىق ءىس قوزعاعان. تەرگەۋشىلەردىڭ مالىمەتىنشە، قىز بىردەن اۋرۋحاناعا جەتكىزىلگەن. قايعىلى وقيعا 13 ساۋىردە بولدى.
توميريس حالىقارالىق ەكونوميكالىق قاتىناستار كافەدراسىنىڭ 4ء-شى كۋرسىندا وقىعان. ول ءۇزىلىس كەزىندە تەرەزەدەن قۇلاپ كەتكەن. بەيرەسمي اقپاراتقا سايكەس، ونى يتەرىپ جىبەرگەن.
