ەسكە الىپ وتىرسام، كاسىپكەرلىك جولدى 13 جاسىمدا تاڭداپپىن. سول جاستا-اق اكە-شەشەمىزگە قول ۇشىن سوزىپ، تيىن-تەبەن تاباتىن ەدىم. سوعان ءبىر مارقايىپ، كاسىپكەرلىكتە ءوزىمدى شىڭداۋ نيەتى وياندى، جاڭا تابىس كوزدەرىن ىزدەپ، ەڭبەك ەتۋگە تالپىنا باستادىم.

العاش رەت جەكە ءوز كاسىبىمدى 10 سىنىپتا اشتىم، ونىڭ ۇستىنە بىرەۋ ەمەس، ەكەۋىن بىردەن تاۋەكەلگە بەل بۋىپ اشتىم. كۇندىز بازاردا ۇن ساتۋمەن، ال تۇندە نان پىسىرۋمەن اينالىستىم. بىردەن پايداعا كەڭەلە باستادىم، جەمىسىن بەرە باستاعان بۇل كاسىپتەردىڭ ءدامى ءتاتتى بولعانى سونشالىق، ءتىپتى بار بويىممەن كاسىپكەرلىك اتتى الەمگە دەندەي بەردىم.

ەندى تەك وسى عانا ەمەس، باسقا ءىستىڭ دە باسىن دوڭگەلەتە باستادىق. بۇلاردىڭ بارلىعى كىشى كاسىپ بولعاندىقتان، ول كەزدە دوللار باعامىن قارامايتىنبىز، ول تۋرالى ءتىپتى ويلانبايتىنبىز دا. ءبىراق، سول 1993 جىلى 1 دوللارعا 4،7 تەڭگەدەن كەلسە، نەبارى ءبىر جىلدان كەيىن، ياعني، 1994 جىلى ول 45 تەڭگەگە دەيىن جەتتى. بۇل ەلدەگى داعدارىستىڭ ۋشىعىپ، كورسەتكىشتىڭ 10 ەسەگە وسكەنىن كورسەتەدى. الايدا، مەن كاسىبىمدى ەش ۋاقىتتا توقتاتقان ەمەسپىن. وسى جولدا نە دە بولسا ناتيجەگە جەتۋگە تىرىستىم.

2000 جىلدىڭ باسىندا ۇلكەن بيزنەسكە جول تارتتىق، سول جاققا قاراي ۇلكەن سەنىممەن بەتتەدىك. بالكىم، بىرەۋگە ۇلكەن بيزنەس بولىپ كورىنەر، ال باسقاسىنا كىشكەنتاي بولار. مەن ءۇشىن بۇل باستاما اۋىر ءارى جاڭا ەدى، قيىن دا قىزىعى مول بەلەس بولعانى دا xاق. ەڭ باستىسى، كاسىپتى دوڭگەلەتە باستادىق، العاشقى جەمىسىن دە كوپ ۇزاماي كوردىك. ال 2005 جىلى 1 جىلدىق اينالىم 1 ميلليون دوللارعا دەيىن جەتتى. ءارى قاراي ءتىپتى ودان دا بەتەر ارتا بەردى. دەمەك، بۇل كەزدە ءبىز كاسىپكەرلىكتىڭ كەلەسى شىڭىنا شىقتىق، شىعىنىنان تابىسى مول كەزەڭگە ءدوپ تۇستىك.

2008 جىلى مەن جاڭا 4 بيزنەسىمدى اشىپ، ولاردى دامىتۋ ماقساتىندا كوپ قاراجات جۇمسادىم. مىقتى دا بىلىكتى توپ ۇيىمداستىرىپ، كاسىپتەردى سولاردىڭ باقىلاۋىنا قالدىردىم دا، ءوزىم ءبىلىمدى ىزدەپ، عىلىمدى كوزدەپ، 2008 جىلدىڭ جەلتوقسان ايىندا كەمبريدجگە وقۋعا كەتتىم. ارتىنشا ول جاقتان لوندانعا اۋىستىم. ءدال سول كەزدە دوللار قۇنى ءبىر-اق ساتتە 147 تەڭگەگە كوتەرىلدى. كەيىننەن شيكىزاتى بار، وزگەسى بار - ءبارى بىردەي قىمباتتاي باستادى. ونىڭ ۇستىنە كليەنتتەر مولشەرى كۇرت ازايىپ، 4 كاسىپتىڭ جاعدايى قيىنداپ، مۇشكىل xالگە دەيىن جەتتى. قۇردىمعا كەتۋدىڭ شاق الدىندا تۇردىق دەسەم دە ارتىق ەتپەس. دەگەنمەن، كەيىننەن ءۇش جىل بويعى كۇندەلىكتى تىنىمسىز دا ۇزدىكسىز جۇمىستىڭ ارقاسىندا 2012 جىلى جاعداي تۇزەلدى، قانشاما كۇش پەن ەڭبەكتىڭ ارقاسىندا كاسىبىمىز قايتا جاندانا باستادى. بيزنەستەرىمىز تۇراقتى تۇردە بىرىنەن سوڭ ءبىرى دامىپ كەلە جاتتى.

2015 جىلى مەن تاعى دا ءبىلىم الامىن دەگەن شەشىم قابىلدادىم دا، ماسكەۋ باسقارۋ مەكتەبى سكولكوۆوعا وقۋعا ءتۇستىم. ال بيزنەستى باسقارۋدى سەنىمدى سەرىكتەستەرىمە تاپسىرىپ، ءساۋىر ايىندا ماسكەۋگە جول تارتتىم. وسى ۋاقىتتا قوڭىر كۇز مەزگىلىنىڭ ءبىر ايىندا دوللار باعامى قايتادان ەكى ەسە كوتەرىلدى. كاسىبىمە تاعى دا سوققى بولىپ، ۇلكەن داعدارىسقا ۇشىراعانىمىزدى ءتۇسىندىم. كۇندىز كۇلكىدەن، تۇندە ۇيقىدان ايرىلدىم دەسەم دە بولادى. بويدى اشۋ-ىزا بيلەپ، ايقاي-شۋدىڭ كۇندەلىكتى قالىپتى جاعدايعا اينالۋىنا ءسال قالدى. ويتكەنى، كرەديتتىك پورتفەل، جاڭا تاپسىرىستار ماسەلەسى ەستى كەتىردى، ال ءوزىم جاعدايدى قالاي تۇزەرىمدى بىلمەي، دەل-سال كۇيگە ەندىم. سول كەزدە ەڭ ءبىرىنشى رەت وپتيميزاسيا جاساۋعا كوشتىم. كوپتەگەن ءوز سالالارىن جەتىك مەڭگەرگەن بىلىكتى مامانداردان ايرىلدىم. شىنى كەرەك، ول مەنىڭ پسيxولوگياما دا، دەنساۋلىعىما دا اسەر ەتپەي قويمادى. ەندىگى كەزەكتە كورمەگەن قيىنشىلىققا تاپ بولىپ، كۇيزەلىسكە ۇشىرادىم. ءبىر جاعىنان، وقۋدى تاستاپ كەتە دە المادىم. ەكى وتتىڭ ورتاسىندا قالۋ دەگەن وسى شىعار، بالكىم.

سودان وزگە امال بار ما، جاڭا دەممەن، تىڭ كوزقاراسپەن وزگە جوبالاردى قاراي باستادىم، ولاردى دامىتۋدىڭ باسقا جولدارىن ىزدەستىرۋگە كىرىستىم. 2016 جىلدان باستاپ جاڭا ستراتەگيا قابىلداپ، كاسىبىمىزدى كوتەرە باستادىق. ءسويتىپ، ەندى قايتا جاڭا دا تابىستى جولعا بەت بۇرعاندا، بۇگىن دوللار باعامى تاعى دا كۇرت ءوستى. بۇل بىتپەيتىن "تەڭگە-دوللار" جىرى وسىمەن توقتاي ما؟

دوللار باعامىن 350 تەڭگەدەن ارتىق كوتەرۋگە بولمايدى. ەگەر دە ول 400 تەڭگەگە دەيىن جەتەتىن بولسا، وندا ورتا-شاعىن كاسىپكەرلەردىڭ ءبارى جاپپاي داعدارىسقا ۇشىرايتىنى انىق. دوللار قايتا كوتەرىلگەن جاعدايدا مەنىڭ دە قاتتى كۇيزەلىسكە تاپ بولاتىنىم ءسوزسىز. سەبەبى، كاسىبىڭ - بالاڭ سەكىلدى، جانىڭدى بەرىپ، بار ىنتا-جىگەرىڭمەن جۇمىس ىستەيسىڭ، ال ول ءبىر-اق كۇندە "دوللار مەن تەڭگەنىڭ" شايقاسىنىڭ كەسىرىنەن قۇردىمعا كەتەدى. بار ەڭبەگىڭ دالاعا ۇشىپ، قۋ تىزەڭدى قۇشاقتاپ قالاسىڭ.

ال، وتباسىلارىن اسىراپ، ازىعىن وسى كاسىپتەن تاۋىپ جۇرگەن جۇمىسكەرلەرىمىزدىڭ جاعدايى قالاي بولماق؟ ونىڭ ۇستىنە ءبىر رەتتىك قۇبىلىس بولسا ەكەن، جاعداي ۇنەمى قايتالانىپ وتىرادى، الايدا ونىڭ الدىن الۋ، ونىمەن كۇرەسۋ شارالارى مۇلدەم جۇرگىزىلمەيدى. وعان توتەپ بەرۋ ءۇشىن ىشكى ءوندىرىستى دامىتۋ قاجەتتىلىگى قانشا رەت ايتىلسا دا، بيلىكتەگىلەردىڭ ىشىنەن قۇلاق اساتىن جان تابىلمادى.

قالاي بولسا دا، مەملەكەتكە ءبىز كەرەكپىز دەپ ويلايمىن!

ازاماتحان ءامىرتاي