اتىراۋ وبلىسىنىڭ اكىمى نۇرلان نوعايەۆ ءبىلىم بەرۋ سالاسىنىڭ قىزمەتكەرلەرىمەن كەڭەس وتكىزىپ، ءبىلىم بەرۋ وبەكتىلەرىنىڭ جاڭا وقۋ جىلىنا دايىندىعى ماسەلەسىن قارادى.

جاڭا وقۋ جىلىنا دايىندىق تۋرالى وبلىستىق ءبىلىم بەرۋ باسقارماسىنىڭ باسشىسى قايىرعالي كەنجەعالييەۆ باياندادى.

-وبلىستىڭ وقۋ ورىندارىن اعىمداعى جوندەۋ ءۇشىن بيۋدجەتتەن 328،2 ملن. تەڭگە ءبولىندى. 2 ملرد تەڭگەدەن استام قارجى 18 وقۋ ورنىن كۇردەلى جوندەۋگە جۇمسالدى. كۇردەلى جوندەۋ جۇرگىزىلىپ جاتقان بارلىق مەكتەپتەردە جۇمىستار 1 قىركۇيەككە دەيىن اياقتالۋى ءتيىس. سونىمەن بىرگە بۇگىنگى كۇنى 30 وقۋ ورنىنىڭ قۇرىلىسى جۇرگىزىلۋدە. 8 مەكتەپ جانە 14 بالاباقشانى اعىمداعى جىلدىڭ اياعىنا دەيىن پايدالانۋعا بەرۋ جوسپارلانۋدا، - دەدى قايىرعالي كەنجەعالييەۆ.

مەكتەپتەردىڭ وقۋ جىلىنا ءجۇز پايىز دايىندىعىن وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى تەمىربەك مۇساعالييەۆ جوققا شىعاردى.

-قالادا اپاتتى جاعدايعا جاقىن كۇيدەگى مەكتەپتەر دە بار. ولاردىڭ جاي-كۇيى جاقسى دەۋگە كەلمەيدى، جاسايتىن جۇمىستار جەتەرلىك. جوندەۋدى قاجەت ەتەتىن باسقا دا ءبىلىم بەرۋ وبەكتىلەرى بار، - دەپ مالىمدەدى تەمىربەك مۇساعالييەۆ.

ءوڭىر باسشىسى مەكتەپتەر ديرەكتورلارى مەن ءبىلىم بەرۋ باسقارماسى باسشىسىنىڭ جاۋاپتارىن تىڭداپ، وعان پروبلەمالىق مەكتەپتەر تۋرالى بارلىق اقپاراتتى ۇسىنۋدى تاپسىردى.

ء-بىلىم بەرۋ باسقارماسى باسشىسىنىڭ بايانداماسىندا بۇل مالىمەتتەر نەگە جوق؟ ءبىز پروبلەمانى تاۋىپ، ونى شەشۋىمىز قاجەت، بارلىعى جاقسى دەگەن ءتۇر تانىتىپ، ءبىر بىرىمىزدەن جاسىرۋدىڭ كەرەگى جوق. ەگەر وقۋشىلاردى قابىلداۋعا دايىن ەمەس مەكتەپتەر بولسا، جەدەل تۇردە بۇل ماسەلەنى شەشۋ قاجەت. قالا اكىمى مەن وبلىس اكىمىنىڭ جەتەكشىلىك ەتەتىن ورىنباسارىنا وسى مەكتەپتەردى تەكسەرۋدى جانە قىسقا مەرزىمدە ۇسىنىس بەرۋدى تاپسىرامىن، -دەدى نۇرلان نوعايەۆ. – بارلىق الەۋمەتتىك وبەكتىلەر ەرەكشە باقىلاۋدا بولۋى قاجەت. بارلىق دەڭگەيدەگى اكىمدەر، ءبىلىم بەرۋ سالاسىنىڭ قىزمەتكەرلەرى مەكتەپتەردىڭ جاڭا وقۋ جىلىنا دايىندىق پروسەسىن وزدەرى باقىلاۋعا مىندەتتى.

كەڭەستە اعىمداعى جىلى وقۋلىقتارمەن جانە وقۋ-ادىستەمەلىك قۇرالدارمەن قامتاماسىز ەتۋدە پروبلەما بولمايتىنى ايتىلدى. جەرگىلىكتى بيۋدجەتتەن 2،5 ملرد تەڭگەدەن استام قاراجات قاجەتتى وقۋ ماتەريالدارىن ساتىپ الۋعا ءبولىندى.

-ماعان اتا-انالاردان شاعىمدار تۇسۋدە، ولار وقۋ ورىندارىندا ءتۇرلى گادجەتتەردى، ويىن قۇرالدارىن، قاجەتسىز وقۋ قۇرالدارىن، كۇماندى قىزمەتتەردى ساتۋدى توقتاتۋدى سۇرايدى. ەگەر مەكتەپ اكىمشىلىگى مۇنىڭ قاجەتتىلىگى بار دەپ ەسەپتەسە – مۇنى اتا-انالار جينالىستارىندا، قامقورلىق كەڭەستەرىندە ۇسىنىڭىزدار. بۇلاردى بالالارعا ساتۋدىڭ قاجەتى جوق. مەكتەپ – ساۋدا ورنى ەمەس، وقۋ ورداسى. بۇل تاجىريبەنى توقتاتۋ قاجەت. جاۋاپتى تۇلعالار مۇنى باقىلاۋعا الادى، - دەپ باسا ايتتى نۇرلان نوعايەۆ.

ءوڭىر باسشىسى اتاپ وتكەندەي، ءبىلىم بەرۋ سالاسى قوعام الدىندا ۇلكەن جاۋاپكەرشىلىك الادى. وقۋ ورنىن ءبىتىرۋشى قانداي ءبىلىم السا، بولاشاقتا ول قوعام ءۇشىن سونداي ۇلەس قوسارى انىق.

-مەملەكەت باسشىسى قوعامنىڭ الدىنا ۇلكەن ماقساتتار قويىپ وتىر. ولارعا جەتۋ ءۇشىن ەلىمىزگە كاسىبي، ءبىلىمدى كادرلار قاجەت. ال بۇل سىزدەردىڭ جۇمىستارىڭىز، ءسىزدىڭ تىكەلەي مىندەتىڭىز. ەگەر ءسىز بولماساڭىز مۇنىمەن كىم اينالىسادى؟ پەداگوگتاردى بارلىق ۋاقىتتا دا ۇلگى ەتەدى، سىزدەر بولاشاق ۇرپاقتى تاربيەلەپ وتىرسىزدار. ءبىز بارلىق قاجەتتى جاعدايلاردى جاسايمىز، بارلىق قاجەتتى قارجىنى بولەمىز. سىزدەردىڭ مىندەتتەرىڭىز – بالالارعا بارلىق جاقسىنى بەرۋ، - دەپ ءسوزىن قورىتىندىلادى نۇرلان نوعايەۆ.