«تەحنودوم» تۇرمىستىق جانە ەلەكتروندى تەحنيكا ساتاتىن دۇكەندەر جەلىسىنىڭ ينتەرنەت-رەسۋرسىندا «ۇلكەندەرگە ارنالعان تاۋارلاردىڭ» ءبىرقاتارى اعىمداعى جىلدىڭ مامىر ايىنان باستاپ اشىق تۇردە ساتىلىپ كەلگەن ەكەن. اتالمىش ماسەلەگە قاتىستى تۇتىنۋشىلاردان ق ر اقپارات جانە كوممۋنيكاسيالار مينيسترلىگىنە ارىز-شاعىمدار ءتۇسىپ، ناتيجەسىندە Technodom.kz ينتەرنەت رەسۋرسى ەكى كۇنگە، 7-8 تامىز كۇندەرى بۇعاتتالىپ، «تەحنودوم» كومپانياسىنىڭ سايتىنا كىرۋگە شەكتەۋ قويىلعان بولاتىن. كومپانيانىڭ نەگىزىن قالاۋشى ەدۋارد كيم، ءوز كەزەگىندە، حالىقتان مۇنداي تاۋارلاردى اشىق-جاريا تۇردە ساتىلعانى ءۇشىن كەشىرىم سۇراۋدىڭ ورنىنا، مينيسترلىكتىڭ بۇل ىس-ارەكەتىنە اشۋلانىپ، دۇرىس ەمەس دەپ اتادى. ونىڭ ەڭ باستى قىنجىلىپ وتىرعان سەبەبى - Technodom.kz رەسۋرسى بۇعاتتالۋىنىڭ سالدارىنان كومپانيا ءبىر كۇندە 30 ميلليون شىعىنعا ۇشىراپتى.

Qamshy.kz اقپارات اگەنتتىگىنىڭ ءتىلشىسى «تەحنودوم» كومپانياسىنىڭ وكىلدەرى بۇل جايتقا قاتىستى قانداي جاۋاپ ايتادى دەگەن ساۋالمەن ولارعا قوڭىراۋ شالعان بولاتىن. ءوزىن كومپانيانىڭ پيار-مەنەدجەرىمىن دەپ تانىستىرعان اينۇر ارالبايەۆا ولاردىڭ تاراپىنان ەشقانداي دا زاڭ بۇزۋشىلىق بولماعانىن ايتىپ، وزدەرىن تىيىم سالىنباعان تاۋاردى ساتقانىن ايتىپ اقتالدى.

ونىڭ ايتۋىنشا، «ءينتيمدى تاۋارلار» اتالمىش كومپانيانىڭ ينتەرنەت-رەسۋرسىندا اعىمداعى جىلدىڭ مامىر ايىنان ساتىلا باستاعان. سول ۋاقىتتان بەرى «ءينتيمدى تاۋارلاردان» تۇسكەن پايدا 235 000 تەڭگە شاماسىندا ەكەن.

ەڭبەكتەگەن بالادان ەڭكەيگەن قارتقا دەيىن ينتەرنەتتى پايدالاناتىن زاماندا ۇياتسىز تاۋارلاردى اشىق تۇردە ساتىلىمعا شىعارعان ەلىمىزدەگى العاشقى قاتاردا تۇرعان ەلەكتروندى دۇكەندەر جەلىسىنىڭ وكىلدەرى ول تاۋاردى ساتىپ الۋ ءۇشىن تاپسىرىس بەرۋشى ءوزىنىڭ جاس شاماسىن سايتتا جازىپ كورسەتۋى ءتيىس ەكەن. ءانونيمدى تۇردە جۇزەگە اسىرىلاتىن بۇل ساۋدانى جۇرگىزۋ بارىسىندا مونيتوردىڭ ار جاعىندا وتىرعان ادام شىن مانىندە كامەلەتكە تولعان با، جوق پا – ول انىقتالمايدى. تاۋاردى ساتىلىمعا قويعاندار ول ماسەلەگە جاۋاپ بەرۋگە مىندەتتى ەمەسپىز، ءاربىر اتا-انا ءوزىنىڭ بالاسىن باقىلاۋى ءتيىس» دەيدى. راس-اۋ! دەگەنمەن، بارلىق جاۋاپكەرشىلىكتى اتا-انانىڭ موينىنا ارتىپ قويىپ، ازعىندىق ارەكەتكە جەتەلەيتىن مۇنداي «ءينتيمدى تاۋارلاردى» اشىق تۇردە ساتىلىمعا شىعارىپ، كەيىننەن «ءبىز ەشقانداي دا زاڭ تالاپتارىن بۇزعان جوقپىز، مۇنداي تاۋارلاردى ساتاتىن دۇكەن جالعىز ءبىز ەمەس» دەۋى قانشالىقتى اقىلعا قونىمدى ىس-ارەكەت؟!

ق ر اقپارات جانە كوممۋنيكاسيالار مينيسترلىگىنىڭ باسپاسوز-قىزمەتىندەگىلەردىڭ ايتۋىنشا ق ر اقپارات جانە كوممۋنيكاسيالار مينيسترلىگىنە technodom.kz ينتەرنەت-دۇكەنىنىڭ ۆەب-سايتىندا «ەرەسەكتەرگە ارنالعان تاۋارلار» دەپ اتالاتىن ءبىرقاتار تاۋارلاردىڭ سۋرەتتەرى  جانە سيپاتتامالارمەن اشىق تۇردە جاريالانعانى تۋرالى جانە وسىعان قاتىستى زاڭ اياسىندا شارا قولدانۋدى سۇراعان شاعىمدارعا بايلانىستى ينتەرنەت-رەسۋرستىڭ مازمۇنىنا قۇقىقتىق مونيتورينگ جۇرگىزىلدى.

«ساراپتاما ناتيجەسىندە اتالعان سايتتا جىنىستىق-ەروتيكالىق سيپاتتاعى ماتەريالداردىڭ جاريالانىپ، بۇقارالىق اقپارات قۇرالدارى تۋرالى جانە بالالاردىڭ دەنساۋلىعىنا جانە دامۋىنا زيان كەلتىرەتىن اقپاراتتان قورعاۋ تۋرالى زاڭنامالاردىڭ تالاپتارىنىڭ بۇزىلعاندىعى راستالدى. سونىمەن قاتار، 2015 جىلعى 27 ناۋرىزداعى № 264 قازاقستان رەسپۋبليكاسى ۇلتتىق ەكونوميكا ءمينيسترىنىڭ قاۋلىسىمەن بەكىتىلگەن ىشكى ساۋدا ەرەجەسىنىڭ 155-تارماعىنا سايكەس ەروتيكالىق مازمۇنداعى تاۋارلار ارنايى جەرلەردە (مامانداندىرىلعان دۇكەندەر) ساتىلۋعا ءتيىس. وسى ورايدا، اعىمداعى جىلدىڭ 2 تامىزىندا مينيسترلىك technodom.kz ينتەرنەت-رەسۋرسىنا قازاقستان رەسپۋبليكاسىنىڭ زاڭناماسىن بۇزاتىن ماتەريالداردى الىپ تاستاۋعا نەمەسە ولاردىڭ قازاقستاندىق پايدالانۋشىلارعا قولجەتىمدىلىگىن شەكتەۋگە شارالار قابىلداۋىن تالاپ ەتىپ حات جىبەرگەن بولاتىن. Technodom.kz ينتەرنەت-رەسۋرسى ءتيىستى شارالاردى قابىلداپ، زاڭ تالاپتارىن ورىنداماعاندىقتان، مينيسترلىك اعىمداعى جىلدىڭ 7 تامىزىندا «بايلانىس تۋرالى» زاڭنىڭ 41-1-بابىندا بەلگىلەنگەن تارتىپكە ساي technodom.kz ينتەرنەت-رەسۋرسىنا كىرۋدى شەكتەۋ تۋرالى بايلانىس وپەراتورلارىنا جانە «مەملەكەتتىك تەحنيكالىق قىزمەت» رمك-عا نۇسقاما جىبەردى»، - دەلىنگەن حابارلامادا. 

بەلگىلى بولعانداي، مينيسترلىك تاراپىنان جاسالعان ەسكەرتۋلەردەن كەيىن كومپانيانىڭ جاۋاپتى ماماندارى اتالمىش تاۋاردى ساتاتىن كونتەنتتى الىپ تاستاعان.  

«تەحنودوم» پيار-مەنەدجەرى ءوز سوزىندە بولاشاقتا قاي باعىتتا بولماسىن تاۋارلار جەلىسىن ودان سايىن كەڭەيتەتىندەرىن ايتىپ ءوتتى.

«ءبىز ەشقانداي دا تىيىم سالىنعان تاۋاردى ساتىلىمعا قويىپ وتىرعان جوقپىز. ونىڭ ۇستىنە، ءبىزدىڭ سايتقا كىرگەن بويدا «ءينتيمدى قۋىرشاقتار» الدارىڭىزدان شىعا كەلمەيدى، ول ارنايى بولىمدە ورنالاستىرىلعان. سوندىقتان دا قانداي دا ءبىر زاڭ تالاپتارىن بۇزىپ وتىر دەگەنگە كەلىسپەيمىز. بولاشاقتا تۇرمىستىق، ەلەكتروندىق نەمەسە باسقا دا قاجەتتىلىكتەرگە ارنالعان تاۋارلار جەلىسىن ءبىز كەڭەيتپەسەك، ارينە، ازايتپايمىز. ءبىزدىڭ تۇتىنۋشىلارىمىز بارلىق جاعىنان قامتاماسىز ەتىلىپ، وزدەرىنە كەرەكتى كەز كەلگەن تاۋارعا قول جەتكىزگەندەرىن قالايمىز»، - دەيدى اينۇر ارالبايەۆا.

ال مينيسترلىك وكىلدەرى كومپانيانىڭ بۇل پىكىرىنە قاتىستى قانداي دا ءبىر زاڭ تالاپتارى بۇزىلعان جاعدايدا ولارعا قاجەتتى شارا قولدانىلاتىنىن اتاپ ءوتتى.