چەلسي ۆەرنەر – سانبيكە جانە سپورتشى. ول وزگە ارىپتەستەرىنە ۇقسامايدى. چەلسي داۋن سيندرومىمەن دۇنيەگە كەلگەن. بۇل دياگنوز ادامنىڭ مۇمكىندىگىن شەكتەيدى.

دارىگەرلەر ۆەرنەر وتباسىن چەلسيدىڭ دەنساۋلىعىندا كىنارات بولاتىنىن ەسكەرتكەن. بۇل دياگنوز ومىردە جەتىستىككە جەتۋگە كەدەرگى بولاتىنىن ايتقان.

الايدا چەلسي داۋنمەن تۋعان بالالارعا قاتىستى بارلىق تۇسىنىكتىڭ كۇل تالقانىن شىعاردى. چەلسي زور جەتىستىككە جەتتى جانە ونىمەن توقتاپ قالماق ەمەس.

چەلسي ۆەرنەر بۇل ومىردە مۇمكىن ەمەس نارسە جوق ەكەنىن دالەلدەدى. وزگەلەرگە دەمەۋ بەرىپ، داۋنمەن دۇنيەگە كەلسەڭ دە ارماندارىڭدى جۇزەگە اسىرۋعا بولاتىنىن كورسەتۋ ءۇشىن ءوز وقيعاسىمەن ءبولىستى.

چەلسي – گيمناستيكادان ۇلتتىق ارنايى وليمپيادا چەمپيوناتى مەن ەكى مارتە الەم چەمپيوناتىندا جەڭىسكە جەتتى. جەڭىستىڭ ءتاتتى ءدامىن سەزۋ ءۇشىن تالماي ەڭبەك ەتۋگە تۋرا كەلدى. چەلسي ءبىر ەلەمەنتتى ناقىشىنا كەلتىرىپ ورىنداۋ ءۇشىن بىرنەشە جىل توقتاۋسىز دايىندالدى. ونىڭ جىلداپ ۇيرەنگەنىن دەنساۋلىعىندا كىناراتى جوق  گيمناسشىلار بىرنەشە ايدا يگەرىپ الاتىن.

مەكتەپتەگى سپورت توپتارى ونى قاتارلارىنا قوسقىسى كەلمەدى. سەبەبى چەلسيدىڭ فيزيكالىق مۇمكىندىكتەرى جوعارى ناتيجەگە جەتۋگە كەدەرگى بولادى دەپ ويلادى. وسىعان قاراماستان چەلسي ارمانىنان باس تارتپادى. ارمان شىنايى ومىردە كورىنىس تاۋىپ، ماقساتقا قول جەتكىزۋ ءۇشىن تاباندىلىق قاجەت دەپ بەكەر ايتىلماسا كەرەك. وزىنە دەگەن سەنىمىن جوعالتپاعان چەلسي جاقسى جاتتىقتىرۋشى تاپتى. دەين پومبو قىزدى مىقتى گيمناسشى قىلۋ ءۇشىن قولىنان كەلگەنىن اياپ قالمادى.

چەلسي تاجىريبەلى سپورتشىلارمەن باسەكەلەس بولادى دەپ ەشكىم ويلامادى. ول پومبونىڭ باسشىلىعىمەن العاشقى التىندى جەڭىپ الدى. قاجىرلى ەڭبەك پەن تالماس قانات ەسكەرۋسىز قالمادى!

- داۋن سيندرومىمەن دۇنيەگە كەلگەن بالاسى بار اتا-انالار مەنىڭ ءومىرىم ولارعا ءۇمىت سىيلاعانىن ايتقاندا قۋانامىن، دەيدى چەلسي.

قايسار قىزدىڭ كەلەسى ارمانى سانبيكە بولۋ ەدى. الايدا ونىڭ دياگنوزى ادامداردىڭ وعان كۇمانمەن قاراۋىنا تۇرتكى بولدى. كوبى چەلسيگە داۋن سيندرومى بارلارعا ءسان الەمى ماڭگىلىككە جابىق ەكەنىن تۇسىندىرۋگە تىرىستى.

ءبىراق چەلسي ارمانىن ورىنداۋدىڭ جولىن تاپتى. ول نيۋ-يوركتەگى "We Speak" اگەنتتىگىمەن جۇمىس ىستەي باستادى. ايەلدەردىڭ وزىنە دەگەن سەنىمدىلىگىن ارتتىرۋعا باعىتتالعان «Body positive» كومپانياسىنىڭ تۇسىرىلىمدەرىنە قاتىستى.

چەلسي ۆەرنەر – جىگەرلى ادامنىڭ ۇلگىسىن كورسەتە ءبىلدى. دياگنوزى ماقساتقا جەتۋگە كەدەرگى كەلتىرۋىنە جول بەرمەدى. ارمانىنان باس تارتپادى.

«بارلىعىندا قيىندىقتار بولادى. ماڭىزدىسى ونى قالاي جەڭىلدەتەتىنىڭىزدە» دەيدى چەلسي ۆەرنەر.