قازاقستاندا وتىزدان اسا اكىم مەن ولاردىڭ ورىنباسارى پارا الدى دەگەن كۇدىك بار. بۇل جايىندا قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى مالىمدەدى.

جىل باسىنان بەرى 31 اكىم مەن ولاردىڭ ورىنباسارلارى پارا العانى ءۇشىن جاۋاپقا تارتىلعان (وبلىستىكى - 1، قالا - 4، اۋدان - 5، اۋىل - 21). ون ەكىسى سوتتالعان.

سەلينوگراد اۋدانىنىڭ بۇرىنعى اكىمىنە قاتىستى سەلسوقتىق تانىتۋ دەرەگى بويىنشا تەرگەۋ باستالعان. 

سونىمەن قاتار، پاۆلودار وبلىسى اقسۋ قالاسى، قالقامان اۋىلدىق وكرۋگىنىڭ اكىمى باس مامانمەن بىرىگىپ، اكىمدىك عيماراتىنا تولەم تەرمينالدارىن قويۋ بويىنشا كەلىسىمشارت جاساسۋ كەزىندە 50 مىڭ تەڭگە پارا الدى دەگەن كۇدىككە ءىلىندى.

الماتى وبلىسى بايسەركە اۋىلدىق وكرۋگى اكىمىنىڭ بۇرىنعى ورىنباسارى قىزمەتىن اسىرا پايدالاندى دەگەن كۇدىك بار. ول وبلىس تۇرعىندارىنىڭ بىرىنە كولىك تۇراعىنا ارنالعان جەردى زاڭسىز بەرىپ، مەملەكەتكە 496 مىڭ تەڭگە شىعىن كەلتىرگەن.

بۇل دەرەكتەر بويىنشا سوتقا دەيىنگى تەرگەۋ ءجۇرىپ جاتىر.

اتىراۋ وبلىسىندا اۋدان اكىمىنىڭ ورىنباسارى مەن قۇرىلىس ءبولىمىنىڭ باسشىسى بوپسالاپ، پارا العانى ءۇشىن سوتتالدى. 

اقمولا وبلىسى ارشالى اۋدانى، جىبەك جولى اۋىلدىق وكرۋگىنىڭ اكىمى 300 مىڭ تەڭگە پارا العانى ءۇشىن 23،4 ميلليون تەڭگە ايىپپۇل تولەدى.

جەتىساي قالاسىنىڭ اكىمى 200 مىڭ تەڭگە پارا الىپ، 12 ميلليون تەڭگە ايىپپۇل تولەدى.

اقمولا وبلىسى سەلينوگراد اۋدانى، قوسشى اۋىلدىق وكرۋگىنىڭ اكىمى 3 ميلليون تەڭگە پارا الىپ، 8،8 ميلليون تەڭگە ايىپپۇل ارقالادى.