بۇۇ-نىڭ دەرەگىنشە، كامەلەتكە تولماي تۇرمىسقا شىعاتىن قىزداردىڭ جۇبايلارى وزدەرىنەن كەمىندە 10 جاس ۇلكەن بولادى ەكەن.

جىل سايىن قازاقستاندا 3000-عا جۋىق 18-گە تولماعان جاس قىزدار تۇرمىسقا شىعادى. بۇل جايىندا بۇۇ حالىق قونىستانۋ قورى مالىمدەدى.

بەلگىلى بولعانداي، كلاستەرلىك زەرتتەۋ ناتيجەسى بويىنشا، قازاقستاندا ايەلدەردىڭ 8 پايىزى العاش رەت 18 جاسقا دەيىن رەسمي جانە ازاماتتىق نەكەگە تۇرعان، ونىڭ ىشىندە 5 پايىزى 15-19 جاسىندا وزدەرىنەن 10 جاسقا ۇلكەن ەر ادامدارعا تۇرمىسقا شىققان.

زەرتتەۋ بارىسىندا، سونىمەن قاتار، كامەلەتكە تولماي تۇرمىس قۇرعان قىزداردىڭ باسىم كوپشىلىگى جىنىستىق، ەكونوميكالىق جانە ەموسيونالدىق تۇرعىدان زارداپ شەگەدى جانە ۇرىپ-سوعۋدىڭ قۇربانى بولادى ەكەن.

«بىزگە تىم اۋىر جاعدايعا تۇسكەن قىزدار كوپ كەلەدى. كۇيەۋلەرىنە بىلدىرمەي حابارلاسادى، كەيبىرەۋلەرى كەڭسەمىزگە كەلەدى. ءبىز قولىمىزدان كەلگەنشە كومەك كورسەتۋگە تىرىسامىز، داعدارىستىق ورتالىقتارعا جىبەرەمىز، الايدا ول قىزدار ورتالىقتا تەك از كۇنگە عانا قالا الادى»، - دەيدى اتالمىش قوردىڭ مامانى.