الماتى قالاسى ىشكى ىستەر دەپارتامەنتىنىڭ باسپا ءسوز قىزمەتىندە قازاق تىلىندە اقپارات جازاتىن مامان جوق دەگەنگە ءوز باسىم سەنگىم كەلمەيدى. سەبەبى باسپا ءسوز ءبولىمىنىڭ رەسمي وكىلى — سالتانات ازىربەك حانىم قازاق تىلىندە ساۋاتتى سويلەي الادى. ءبىراق باسپا ءسوز باياندارىنىڭ ءبارى تەك قانا ورىس تىلىندە. مەملەكەتتىك تىلدە بىردە ءبىر اقپارات كەلمەيدى. نەگە؟ قالالىق ءىىب قازاق ءتىلدى جۋرناليستەردى مەنسىنبەي مە، الدە قازاق ءتىلدى جۋرناليستەر وزدەرى اۋدارىپ السىن دەپ ويلاي ما؟ اتالعان ماسەلەنىڭ سەبەءبىن سۇراپ، بىزگە اقپاراتتى قازاق تىلىندە جىبەرۋلەرىن وتىنگەن بولاتىنبىز. وكىنىشتىسى «قازاق تىلىندە اقپاراتتى ەكى كۇن كۇتەسىزدەر» دەگەن جاۋاپ الدىق. قازاق تىلىندە اقپارات تاراتۋ قالالىق ءىىب ءۇشىن سونشالىق قيىن سياقتى. ءدال بۇگىن قازاق تىلىندە جىبەرگەن اقپاراتتىق سۇرانىمىما ورىس تىلىندە ەكى بەت جاۋاپ كەلىپ تۇر. بۇل نە دەگەن ماسقارا؟ «قاجەت بولسا ءوزىڭ اۋدارىپ ال» دەگەندەرى بولار. ءبىراق ءبىز قايتا حابارلاسىپ، قازاق تىلىندە جاۋاپ بەرۋلەرىن زاڭدىق تۇرعىدان تالاپ ەتەتىنىمىزدى ايتتىق. بۇل وسى باسقارمادا عانا ورىن الىپ وتىرعان ولقىلىق ەمەس، كوپتەگەن رەسمي ۇيىمدار قازاق تىلىنە ءدال وسىنداي بەيجايلىق تانىتادى. وسىدان كەيىن «قازاق ءتىلدى جۋرناليستەر اقپاراتتى كەش بەرەدى» دەپ تاعى ءبىرازىڭىز وكپە ايتاسىزدار. قازاق ءتىلدى جۋرناليست رەسمي اقپاراتتى اۋدارىپ وتىرعاندا، ورىس رەداكسياسى ورىس تىلدەگى دايىن ءماتىندى جاريالاي سالادى. ءدال وسى ماسەلەنى ءوزارا شەشىپ الارمىز دەپ سالتانات حانىمنىڭ جەكە پوچتاسىنا ەكى رەت قازاق تىلىندە اقپارات جىبەرۋىن ءوتىنىپ حات جازدىق، كومەكشىسىنە حابارلاستىق... ءبىزدىڭ وتىنىشىمىزگە پىسقىرعاندا جوق. ءوز ەلىڭدە تۇرىپ، ءوز تىلىڭدە اقپارات الا الماۋ نە دەگەن بەيشارالىق...
