ءراسىم بارىسىندا نۇرسۇلتان نازاربايەۆقا ليۆان رەسپۋبليكاسىنىڭ توتەنشە جانە وكىلەتتى ەلشىسى جيسكار ءال-حۋري، ۋكراينانىڭ توتەنشە جانە وكىلەتتى ەلشىسى يۆان كۋلەبا، برازيليا فەدەراتيۆتىك رەسپۋبليكاسىنىڭ توتەنشە جانە وكىلەتتى ەلشىسى مارسيا دوننەر ابرەۋ، گەرمانيا فەدەراتيۆتىك رەسپۋبليكاسىنىڭ توتەنشە جانە وكىلەتتى ەلشىسى تيلو كليننەر، پاكىستان يسلام رەسپۋبليكاسىنىڭ توتەنشە جانە وكىلەتتى ەلشىسى يمتياز احماد كازي سەنىم گراموتالارىن تاپسىردى. بۇل جايىندا Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.
قازاقستان پرەزيدەنتى راسىمگە قاتىسۋشىلاردى ديپلوماتيالىق قىزمەتتەرىنىڭ رەسمي تۇردە باستالۋىمەن قۇتتىقتاپ، بۇل ءار ديپلوماتتىڭ ومىرىندەگى جاۋاپتى دا قۋانىشتى ءسات ەكەنىن اتاپ ءوتتى.
مەملەكەت باسشىسى استانانىڭ 20 جىلدىق مەرەيتويى اتاپ وتىلگەنىنە توقتالىپ، قىسقا ۋاقىت ىشىندە قازاقستان ەلورداسى كوپ ۇلتتى حالقىمىزدى بىرىكتىرگەنىن، سونداي-اق تىڭ يدەيالار مەن يننوۆاسيالارعا جول اشقانىن ايتتى.
– استانا بەيبىتشىلىك پەن كەلىسىمنىڭ جاڭا پلاتفورماسى رەتىندە تانىلدى. مۇندا ەۋرازيالىق ەكونوميكالىق وداق، شانحاي ىنتىماقتاستىق ۇيىمى، ەۋروپاداعى قاۋىپسىزدىك جانە ىنتىماقتاستىق ۇيىمى، ازياداعى ءوزارا ءىس-قيمىل جانە سەنىم شارالارى كەڭەسى، يسلام ىنتىماقتاستىعى ۇيىمى، ەكسپو كورمەسى اياسىندا ماڭىزدى قۇجاتتار قابىلداندى، – دەدى قازاقستان پرەزيدەنتى.
نۇرسۇلتان نازاربايەۆ الەمدىك جانە ءداستۇرلى دىندەر كوشباسشىلارىنىڭ VI سەزىن وتكىزۋ ماسەلەلەرىنە ەرەكشە توقتالىپ، ەلدەردىڭ دەلەگاسيالارىن وسى شاراعا بەلسەندى اتسالىسۋعا شاقىردى.
– جۋىردا ءبىز ۇزدىك تاجىريبەلەرگە نەگىزدەلگەن جاڭا «استانا» حالىقارالىق قارجى ورتالىعىن اشتىق. ەلدەرىڭىزدى وسى ورتالىقتىڭ جۇمىسىنا اتسالىسۋعا شاقىرامىن، – دەدى قازاقستان پرەزيدەنتى.
مەملەكەت باسشىسى قازاقستاننىڭ كورشىلەس ەلدەرمەن ەكونوميكالىق ىنتىماقتاستىقتى نىعايتۋ ماقساتىمەن زاماناۋي ينفراقۇرىلىمدى بەلسەندى دامىتا تۇسكەنىن، «باتىس جۇڭگو – باتىس ەۋروپا» حالىقارالىق كولىك ءدالىزىنىڭ 2،7 مىڭ شاقىرىمعا سوزىلاتىن قازاقستاندىق بولىگىنىڭ قۇرىلىسى تولىق اياقتالعانىن اتاپ ءوتتى.
– وسى ايدا اقتاۋ قالاسىندا وتكەن بەسىنشى كاسپيي سامميتىندە ازەربايجان، يران، قازاقستان، رەسەي جانە تۇرىكمەنستان باسشىلارى كاسپيي تەڭىزىنىڭ قۇقىقتىق مارتەبەسى تۋرالى كونۆەنسياعا قول قويدى. وندا قاۋىپسىزدىك جانە ەكولوگيا ماسەلەلەرىمەن قاتار، كاسپيي ماڭى ەلدەرىنىڭ ينفراقۇرىلىمىن ودان ءارى دامىتۋ، كولىك جەلىسىنىڭ الەۋەتىن ارتتىرۋ قاراستىرىلعان. قۇرىق پورتىنىڭ ىسكە قوسىلۋى ترانسكاسپيي باعىتى بويىنشا جۇك تاسىمالداۋدى قامتاماسىز ەتتى. سونىڭ ارقاسىندا، 2020 جىلعا قاراي بيۋدجەتكە جىلىنا 5 ميلليارد دوللاردان استام قوسىمشا كىرىس تۇسەدى، ال قازاقستان ونىمدەرى الەمنىڭ 120-دان استام ەلىنىڭ نارىعىنا جەتكىزىلەدى، – دەدى نۇرسۇلتان نازاربايەۆ.
مەملەكەت باسشىسى قازاقستاننىڭ سىرتقى ساياساتى سىندارلى ىنتىماقتاستىق پەن پراگماتيزم قاعيداتتارىنا نەگىزدەلگەنىن اتاپ ءوتىپ، استانا ەكى جاقتى جانە كوپ جاقتى بايلانىستاردى ودان ءارى دامىتۋعا باسا كوڭىل بولەتىنىن ايتتى.
قازاقستان پرەزيدەنتى گەرمانيامەن بۇگىنگى ەكى جاقتى قارىم-قاتىناسىمىز ستراتەگيالىق دەڭگەيگە كوتەرىلگەنىن اتاپ ءوتىپ، فەدەرالدىق پرەزيدەنت فرانك-ۆالتەر شتاينمايەردىڭ استاناعا العاشقى رەسمي ساپارى جانە «ەكسپو-2017» كورمەسىنە قاتىسۋى ەكى ەل اراسىنداعى ىنتىماقتاستىققا تىڭ سەرپىن بەرگەنىنە توقتالدى.
– ءبىز گەرمانيالىق ارىپتەستەرىمىزبەن بىرلەسىپ، قازاقستانعا ءتورتىنشى ونەركاسىپتىك ريەۆوليۋسيا ەلەمەنتتەرىن ەنگىزۋ، وزىق تەحنولوگيالار مەن ينۆەستيسيا تارتۋ جونىندەگى جۇمىستى جالعاستىرۋعا نيەتتىمىز. قازاقستانداعى نەمىس دياسپوراسى ەلدەرىمىز اراسىنداعى «التىن كوپىر» دەپ بىلەمىز، – دەدى نۇرسۇلتان نازاربايەۆ.
مەملەكەت باسشىسى وتكەن جىلدار ىشىندە قازاقستان مەن ۋكراينا ەداۋىر جەتىستىكتەرگە قول جەتكىزگەنىن ايتىپ، ەكى ەلدى دوستىق پەن ىنتىماقتاستىققا نەگىزدەلگەن تاريحي بايلانىستار بىرىكتىرەتىنىن اتاپ ءوتتى.
– بىلتىر ەلدەرىمىزدىڭ ءوزارا ساۋدا اينالىمى 19 پايىزعا ءوستى. قازاقستاندا ۋكراينانىڭ قاتىسۋىمەن جۇمىس ىستەيتىن كاسىپورىنداردىڭ سانى دا ارتىپ كەلەدى. ءبىز ەكونوميكالىق ىنتىماقتاستىعىمىز، اسىرەسە ءوندىرىس پەن اۋىل شارۋاشىلىعىنداعى بايلانىستارىمىزدى ودان ءارى وركەندەتە ءتۇسۋىمىز قاجەت، – دەدى قازاقستان پرەزيدەنتى.
نۇرسۇلتان نازاربايەۆ پاكىستان قازاقستاننىڭ وڭتۇستىك ازياداعى ماڭىزدى ءارى پەرسپەكتيۆالى سەرىكتەسى سانالاتىنىن اتاپ ءوتىپ، پاكىستان شانحاي ىنتىماقتاستىق ۇيىمىنىڭ تولىق مۇشەسى رەتىندە ونىڭ جۇمىسىنا تىڭ سەرپىن بەرەتىنىنە سەنىم ءبىلدىردى.
– ساۋدا-ەكونوميكا سالاسىنداعى بايلانىستى نىعايتۋ ماقساتىمەن بىرلەسكەن ۇكىمەتارالىق كوميسسيا مەن ىسكەرلىك كەڭەستىڭ جۇمىسىن جانداندىرىپ، ءتيىستى «جول كارتاسىن» قابىلداۋ قاجەت، – دەدى مەملەكەت باسشىسى.
قازاقستان پرەزيدەنتى بيىل برازيليامەن اراداعى ديپلوماتيالىق قارىم-قاتىناستاردىڭ ورناعانىنا 25 جىل بولعانىن ايتىپ، بۇل ەلدىڭ لاتىن امەريكاسىنداعى ءرولى زور ەكەنىن اتاپ ءوتتى.
– مەن 2016 جىلعى قىركۇيەكتە «ۇلكەن جيىرمالىق» فورۋمى اياسىندا برازيليا پرەزيدەنتى ميشەل تەمەرمەن كەزدەستىم. وندا ءبىز ەكى جاقتى قاتىناستاردى جاڭا ساپالى دەڭگەيگە كوتەرۋ جولدارىن تالقىلادىق. وسىعان وراي، تەحنولوگيا، اۋىل شارۋاشىلىعى، ماشينا جاساۋ، جەڭىل ونەركاسىپ سالالارىندا بىرلەسكەن جوبالاردى ىسكە اسىرۋدى جانداندىرۋ قاجەت. ورناتىلعان ۆيزاسىز رەجىم ەلدەرىمىزدىڭ مادەني-گۋمانيتارلىق ىنتىماقتاستىعىن ىلگەرىلەتۋگە سەپتىگىن تيگىزەدى دەپ ويلايمىن، – دەدى نۇرسۇلتان نازاربايەۆ.
مەملەكەت باسشىسى شيرەك عاسىر ىشىندە ليۆانمەن دوستىق بايلانىستارىمىز ءوزارا تۇسىنىستىك پەن ارىپتەستىك رۋحىندا قالىپتاسقانىن ايتتى.
– بۇگىندە قازاقستاندا ليۆاننىڭ ءبىرقاتار كومپانيالارى تابىستى جۇمىس ىستەۋدە. بىرلەسكەن ۇكىمەتارالىق كوميسسيا قۇرۋ، ىسكەر توپتار وكىلدەرىنىڭ ءوزارا ساپارلارىن ۇيىمداستىرۋ ەكى جاقتى بايلانىسقا تىڭ سەرپىن بەرەتىنىنە سەنىمدىمىن. ءبىز بەيرۋتتىڭ تاياۋ شىعىس ايماعىندا تۇراقتىلىق پەن قاۋىپسىزدىكتى ورناتۋعا باعىتتالعان كۇش-جىگەرىن جوعارى باعالايمىز، – دەدى قازاقستان پرەزيدەنتى.
سوڭىندا نۇرسۇلتان نازاربايەۆ راسىمگە قاتىسۋشىلاردى قازاقستانداعى ديپلوماتيالىق ميسسيالارىنىڭ باستالۋىمەن تاعى دا قۇتتىقتاپ، ولاردىڭ قىزمەتتەرى ەلدەرىمىز اراسىنداعى دوستىق پەن سەنىمدى ودان ءارى نىعايتا تۇسەتىنىنە سەنىم ءبىلدىردى.
