ەكى اي بۇرىن الماتى تۇرعىندارىنىڭ نازارىن تۇگەلدەي وزىنە اۋدارعان "عاجاپ" تۋىندى – الىپ ءتيىن جايلى بۇگىن تاعى ايتىلدى. ايتقان قالانىڭ باسشىسى باۋىرجان بايبەك. بۇل جولعى ءسوزى الماتىلىقتاردى تاعى شۋلاتا ما الدە ءتيىننىڭ كوركەمدىگىن اقىرى تۇسىنۋگە سەپتىگىن تيگىزەر مە ەكەن، بىلمەدىك. ايتەۋىر اكىم ءبۇي دەدى:  

«الماتىداعى ءتيىن جايلى الەمدىك ب ا ق جاريالادى – BBC، Fox News، New York Post، بۇعان قوسا رەسەيلىك ماسس-مەديا دا ءۇنسىز قالمادى. ەندىگى قالامىزعا كەلگەن تۋريستەر دە ءبىرىنشى كەزەكتە ءتيىننىڭ قايدا ەكەنىن سۇرايدى. كورگىسى كەلەدى. ءتىپتى ەلىمىزدىڭ وزگە قالالارىنان كەلگەن قوناقتارىمىز دا بۇرىن-سوڭدى «شىمبۇلاق» پەن «مەدەۋگە» اسىعىپ تۇراتىن ەدى، ءقازىر ءتيىندى كورۋگە جينالاتىن بولدى»، - دەگەن بايبەك مۇسىنگە جۇمسالعان 23 ميلليون تەڭگەنىڭ ءوزىن-وزى تولىق اقتاعانىن تىلگە تيەك ەتتى. 

ونىڭ ۇستىنە اكىم الماتىلىقتاردان ءدال وسىنداي رەاكسيانى كۇتكەن ەكەن.

«شىن مانىسىندە ءبىز تۇرعىنداردىڭ رەاكسياسىن الدىن-الا بولجادىق. ءتيىن الماتىلىقتاردىڭ جاڭا، تىڭ دۇنيەلەردى قابىلداي الۋىنا ۇيرەتكەن ينديكاتور بولدى. ءارى ءتيىن الماتىلىقتاردىڭ مىنەزىن ايقىنداپ تۇرادى – ۇنەمى قوزعالىستا، قامقورلىقتا، ءدال ءسىز بەن ءبىز سەكىلدى.

جوبا اۆتورلارىنىڭ سوزىنشە، ءتىپتى ءتيىننىڭ الىپتىعى دا قالا تۇرعىندارىنىڭ مىنەزى سەكىلدى. ءبىز ۇنەمى اسىرا ايتۋدى جاقسى كورەمىز، تۇيمەدەيدى تۇيەدەي ەتەمىز دە تۇرامىز. تاعى ءبىر ايتا كەتەرلىگى، ءتيىن – تازا اۋا، تازا سۋ، جاسىل جەلەك. ول تابيعاتتا ءومىر سۇرگەندى سۇيەدى. ناعىز الماتىعا ءتان جانۋار. مۇنى بايقاي بىلگەنىمىز ءجون»، - دەپ قورىتىندىلادى ءسوزىن اكىم.

ەستەرىڭىزگە سالا كەتەيىك، الماتىلىقتاردىڭ سىنىنا اينالعان الىپ ءتيىننىڭ ءمۇسىنى «اتاكەنت» كورمەسىنىڭ الدىندا شىلدەنىڭ باسىندا پايدا بولعان ەدى. انىقتالعانداي ءتيىندى جاساۋ ءۇشىن مەملەكەتتىك جانە جوبانى ۇيىمداستىرۋشى كومپانيانىڭ بيۋدجەتىنەن جالپى 23 ميلليون قاراجات كەتكەن. جوبا اۆتورى سۋرەتشى الەكس رينسلەر ەكەنىن دە تاعى ءبىر ايتا كەتەيىك.