اقش-تىڭ ۋوشيتو وكرۋگىندەگى اركانزاس شتاتىندا پوليسيا قىزمەتكەرلەرىن قايران قالدىرعان وقيعا بولدى. 5-كە دە تولماعان ەكى بالا جول اپاتىنان كەيىن قايتىس بولعان انالارىنىڭ جانىندا 4 كۇن بويى ءتىرى جاتقان. بۇل تۋرالى جەرگىلىكتى ABC15 Arizona اگەنتتىگى حابارلادى.

«بۇل 11 جىل بويعى جۇمىس تاجىريبەمدەگى ەڭ ەرەكشە جاعداي. ءبىر جاعىنان قايعىلى، ءبىراق عاجاپ وقيعا»، - دەپ ءوز اسەرىمەن بولىسكەن ەكەن وكرۋگ دەتەكتيۆى نەيتان گريلي.

جۋرناليستەرگە وقيعانىڭ ءمان-جايىن بالالاردىڭ اتاسى بايانداپ بەرگەن. جول اپاتىنان كەيىن ءۇش جاسار كايلەن حولليمان اۆتوكولىكتىڭ جوعارعى بولىگىندەگى اشىق تۇرعان تەرەزەدەن شىعادى. ال كولىك جولدان ۇشىپ ورمانعا قاراي اۋدارىلعان.

«نەمەرەم سىرتقا شىعىپ، ءولى جاتقان اناسىن كورگەن. جانىنا بارىپ وياتپاق بولدى»، - دەدى بالانىڭ اتاسى.

قايتىس بولىپ كەتكەن اناسىنىڭ جانىندا ءتورت كۇن بويى جاتقان بالاقاي بەسىنشى كۇنى ورماننان ادام ىزدەۋگە شىعادى. ونى جول بويىنداعى قۇقىق قورعاۋشىلار بايقاپ قالىپ، كولىكتى تاۋىپ الادى. كولىكتىڭ ىشىندە قورعانىس بەلدىگىنە ورالعان كايلەننىڭ ءبىر جاستاعى باۋىرى وتىر ەكەن. ەكەۋى دە ءتىرى، بۇگىندە اۋرۋحانادا جاتىر، دارىگەرلەر بالالاردىڭ امان قالاتىنىن ايتتى.

ال قايتىس بولعان انالارى ءۇشىنشى بالاعا ەكىقابات بولعان.