استانادا نوسەر جاڭبىر كەزىندە قايىقپەن ءجۇزىپ، ەل ەسىندە قالعان ەكى جىگىتتىڭ ءبىرى سوت قاۋلىسىنا قالاي قارايتىنىن ايتىپ، الداعى جوسپارلارىمەن ءبولىستى دەپ حابارلايدى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

25 جاستاعى جاندوس سادىبەكتىڭ ايتۋىنشا، نوسەر جاڭبىر جاۋعان كۇنى ول دوسى ءدميترييدى شاقىرىپ، قارماق پەن قايىقتى الىپ، ءوزىنىڭ "بالالىعىن" ۆيدەوعا تۇسىرۋگە بەل بۋعان. 

"ءبىز اپاتتىق جاعداي تۋعىزبايمىز، ەشكىمگە كەدەرگى كەلتىرمەيمىز دەپ ويلادىق. ارينە، جۇرتتىڭ نازارى بىزگە اۋاتىنىن تۇسىندىك، ءبىراق ءدال وسىنداي قوعامدىق رەزونانس تۋادى دەپ ويلاماعان ەدىك"، —دەدى جاندوس Sputnik قازاقستان تىلشىسىنە. 

جاس جىگىت قالالىق سوت دوسى ەكەۋىنە 5 اەك (اربىرىنە 12 مىڭ 025 تەڭگە نەمەسە 33 دوللار) ايىپپۇل سالعاندا، قازاقستاندىقتاردىڭ ولارعا قولداۋ كورسەتكەنى ءۇشىن وتە قۋانىشتى ەكەنىن جاسىرمادى. 

استانانىڭ ىشكى ىستەر دەپارتامەنتى ەر ادامداردىڭ قىلىعىن ۇساق بۇزاقىلىق دەپ باعالاپ، اكىمشىلىك قۇقىق بۇزۋشىلىقتار تۋرالى كودەكستىڭ 434-بابىنا سايكەس حاتتاما تولتىردى. 

"زاڭگەرلەر مەنىمەن بايلانىسقا شىقتى. ولار ءبىزدىڭ ارەكەتىمىزدە ەشقانداي  بۇزاقىلىق بولماعانىن ايتىپ وتىر. ءبىزدىڭ قىلىعىمىزدى قايىقتاردى پايدالانۋ ەرەجەسىن بۇزۋ رەتىندە عانا قاراستىرۋعا بولادى، ودان باسقا ەشتەڭە ەمەس"، — دەپ ءسوزىن جالعادى اتىشۋلى ۆيدەونىڭ كەيىپكەرى. 

سوت شەشىمى بويىنشا جىگىتتەر ءبىر اي ىشىندە ايىپپۇل تولەۋى ءتيىس نەمەسە ون كۇن ىشىندە شەشىمگە شاعىم تۇسىرە الادى. 

"اپەللياسيا تۋرالى ءالى ويلانىپ جاتىرمىز، بۇكىل ەل ءبىزدى قولداپ وتىر. مەن ءوزىمدى كىنالىمىن، زاڭ بۇزدىم دەپ سانامايمىن. ءبىر زاڭگەر ءتىپتى "قايىققا زاڭگەردى وتىرعىزىپ الىپ، قالاعان جەرلەرىڭدە جۇزىڭدەر" دەپ قالجىڭدادى"، — دەيدى جاندوس سادىبەك. 

جاس جىگىت بولاشاقتا قىزىقتى بەينەروليكتەر ءتۇسىرىپ، حوببي رەتىندە بلوگينگپەن اينالىسۋدى جوسپارلاپ وتىر. 

بىرنەشە كۇن ىشىندە ەكى ەسكەكشى تۇسكەن ۆيدەو 500 مىڭنان استام رەت قارالدى. 

استانادا 20 تامىز كۇنى نوسەر جاۋىن جاۋعان ەدى. توپەلەگەن جاۋىننان قالا كوشەلەرىن لەزدە سۋ باستى. قالا اكىمدىگى نوسەر جۇيەسى ماسەلەسىن كەلەسى جىلى شەشۋگە ۋادە بەردى.