اقتوبەدە ليفتىدە جانشىلىپ ولگەن تەلەجۇرگىزۋشى كەلىنشەكتىڭ ولىمىنە بايلانىستى سوت باستالدى. جاۋاپقا تارتىلىپ جاتقان كووپەراتيۆ ديرەكتورى مەن ءليفتىنى جوندەگەن مەحانيك تاعىلعان ايىپپەن كەلىسپەي وتىر. جاۋاپكەرشىلىكتى بىرىنە ءبىرى ارتىپ قويماق. ال قارا جامىلعان وتباسى ەكەۋىنە قاتاڭ جازا كەسۋدى تالاپ ەتتى. بۇل تۋرالى كتك ارناسى حابارلادى.

28 جاستاعى تەلەجۇرگىزۋشى ايزات ءابدىساماتتىڭ اقتوبەدەگى كوپ قاباتتى ءۇيدىڭ ليفتىسىندە جانشىلىپ كوز جۇمعانىنا تۋرا بەس اي بولدى. سول ۋاقىتتان بەرى بىرنەشە تەحنيكالىق ساراپتاما تاعايىندالىپ، سوت وتىرىسى دا كەيىنگە شەگەرىلە بەردى. بۇعان ايىپتالۋشىنىڭ ءبىرى — مەحانيك جارىلقاسىن اقجانوۆتىڭ جۇرەگىنە وتا جاسالۋى سەبەپ بولعان. ول اۋرۋحانادان شىققان بويدا پروسەسس تە باستالدى.

"ءليفتىنى پايدالانۋعا بەرگەن كەزدە تۇرعىنداردىڭ قاۋىپسىزدىگى ءۇشىن ەشقانداي شارا قولدانباعان. اقاۋى بار جەدەلساتىنى ىسكە قوسقان. وعان تاعايىندالعان ساراپتاما قورىتىندىسى دالەل بولا الادى"، — دەيدى مەملەكەتتىك ايىپتاۋشى اسحات سارسەنبايەۆ.

سوتتا جاۋاپ بەرىپ جاتقان كووپەراتيۆ ديرەكتورى مەن مەحانيك ءبىرىن-بىرى كىنالاپ وتىر. باستىعى تەحنيكادان حابارىم جوق دەپ اقتالسا، ءليفتىنى جوندەۋ ءۇشىن جالدانعان مامان سۇتتەن اق، سۋدان تازامىن دەپ باسىن الىپ قاشادى.

"بۇل ءۇيدىڭ ءليفتىسى بۇرىننان توزعان. تۇرعىنداردىڭ ءوتىنىشى بويىنشا قولدان كەلگەنشە وڭداپ جۇردىك. سوڭعى رەت قايعىلى وقيعا بولاردان ءتورت كۇن بۇرىن عانا اقجانوۆقا اقشا بەرىپ جوندەۋدەن وتكىزگەن ەدىك"، — دەيدى "جاڭابەكوۆ-سەرۆيس" ج ش س ديرەكتورى كەمەل جاڭابەكوۆ.

ايزات ءابدىسامات ليفتىگە قىسىلىپ ولگەندە جانىندا كىشكەنتاي قىزى بولعان. ءقازىر ول اكەسىنىڭ قولىندا تاربيەلەنىپ جاتىر. مارقۇمنىڭ كۇيەۋىنەن باستاپ، بارلىق تۋىسى قوس ايىپتالۋشىعا ەشقانداي كەشىرىم جوق دەيدى.

"ەشقانداي دا ماعان ماتەريالدىق، مورالدىق وتەماقىنىڭ قاجەتى جوق. مەنىڭ بالامنىڭ ولىمىنە كىنالى ادامدار ءادىل جازالانسىن دەيمىن. قازىرگى جاعدايدا ءۇش جاسار ءسابي ءوزىنىڭ اناسىنا "ماما" دەگەن ءسوزدى ايتا المايتىن جاعدايعا جەتكىزدى ولار. سەبەبى، اناسىنىڭ ءولىمىن كورگەن ءسابي اناسىن سۇرامايدى"، — دەدى مارقۇم ايزات ءابدىساماتتىڭ اناسى ايشا تولەمىسوۆا.

ايزاتتىڭ ولىمىنە سەبەپشى بولعان ليفت بەس ايدان بەرى ىستەمەيدى. وعان سول كۇيى جوندەۋ دە جۇرگىزىلمەگەن. اقتوبەدە وسى قايعىلى وقيعادان سوڭ توقتاپ تۇرعان جالعىز جەدەلساتى بۇل ەمەس. ويتكەنى جاپپاي تەكسەرۋدەن كەيىن ەسكىرگەندەرىنىڭ ءبارىنىڭ ەسىگىن جاۋىپ تاستاعان ەدى. ال جاڭارتۋعا تۇرعىنداردىڭ دا، اكىمدىكتىڭ دە اقشاسى جوق.