2018 جىلدىڭ 4-5 قىركۇيەك كۇندەرى قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتى شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى قازاقستان حالقى تىلدەرى كۇنىنە وراي وقىتۋشىلار اراسىندا ا.بايتۇرسىن ۇلى اتىنداعى رەسپۋبليكالىق بايقاۋ وتكىزدى.

بايقاۋدىڭ ماقساتى – الاش كوسەمى، ۇلت ۇستازى احمەت بايتۇرسىن ۇلى قالدىرعان رۋحاني جانە ءعىلىم-بىلىم سالاسىنداعى مول مۇرالار ساباقتاستىعىن جالعاستىرۋ. وقىتۋشىلاردىڭ وقىتۋ شەبەرلىگىن ناسيحاتتاۋ، ەرەسەكتەرگە مەملەكەتتىك ءتىلدى وقىتىپ جۇرگەن شىعارماشىلىقپەن اينالىساتىن وقىتۋشىلاردى انىقتاۋ، قولداۋ، وقىتۋشىلاردىڭ كاسىبي-پەداگوگيكالىق شىعارماشىلىعىن جانە مەملەكەتتىك ءتىلدى وقىتۋ ۇدەرىسىن ىنتالاندىرۋ، وزىق تاجىريبەلەردى تاراتۋ.

شارا رەسپۋبليكالىق بايقاۋ قاتىسۋشىلارىنىڭ تاجىريبەلىك ساباق ۇلگىسىن كورسەتۋ، ەلەكتروندىق پورتفوليونى تانىستىرۋ جانە پەداگوگيكالىق-پسيحولوگيالىق جاعداياتتارعا ارنالعان تاپسىرمالار كەزەڭدەرىنەن تۇردى.

بايقاۋ بيىل العاش ۇيىمداستىرىلماسا دا، اتاۋى تۇڭعىش رەت ۇلت ۇستازىنىڭ قۇرمەتىنە وراي اۋىستىرىلدى. ق ر ۇكىمەتىنىڭ 2017 جىلدىڭ 31 قازانداعى №689 قاۋلىسى بويىنشا 5 قىركۇيەك - قازاقستان حالقى تىلدەرى كۇنى بولىپ بەلگىلەنگەن بولاتىن.

بۇل كۇن - "ۇلتتىڭ ساقتالۋىنا دا، جوعالۋىنا دا سەبەپ بولاتىن نارسەنىڭ قۋاتتىسى - ءتىل" دەپ ۇلاعاتتى ءسوز قالدىرعان، قازاق حالقىنىڭ تاعدىرى، ءتىلى ءۇشىن كۇرەسكەن الاش ارىسى، ۇلت ۇستازى احمەت بايتۇرسىن ۇلىنىڭ تۋعان كۇنى. قازاقتىڭ ادەبيەت زەرتتەۋشى عالىمى، تۇركىتانۋشى، پۋبليسيست، پەداگوگ، اۋدارماشى، قوعام قايراتكەرى احمەت بايتۇرسىن ۇلى 1872 جىلى 5 قىركۇيەكتە قازىرگى قوستاناي وبلىسى، جانگەلدين اۋدانى، سارىتۇبەك ەلدى مەكەنىندە دۇنيەگە كەلگەن بولاتىن.

بايقاۋ ۇلت ۇستازى احمەت بايتۇرسىن ۇلىنىڭ ءومىرى مەن شىعارماشىلىعىنا ارنالعان كىتاپتىڭ تۇساۋكەسەرىمەن باستالدى.

ەلباسى نۇرسۇلتان ءابىش ۇلى نازاربايەۆ ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا: «مەن حالقىمنىڭ تاعىلىمى مول تاريحى مەن ىقىلىم زاماننان ارقاۋى ۇزىلمەگەن ۇلتتىق سالت-داستۇرلەرىن الداعى وركەندەۋدىڭ بەرىك ءدىڭى ەتە وتىرىپ، ءاربىر قادامىن نىق باسۋىن، بولاشاققا سەنىممەن بەت الۋىن قالايمىن. جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي»-دەگەن بولاتىن. ولاي بولسا، جاڭاشىل باعىتتارىمىزدى انىقتايتىن وقىتۋدىڭ زاماناۋي تەحنولوگيالارىن پايدالانۋ ماڭىزدى. بۇگىنگى وقىتۋشىلار اراسىنداعى بايقاۋ - جاسامپازدىق پەن جان-جاقتىلىقتىڭ جاڭاشا كورىنىسى.

بايقاۋعا ەلىمىزدىڭ ون ءتورت وڭىرىنەن بىلىكتى ءتىل ۇيرەتۋشى وقىتۋشىلار كەلدى. قاتىسۋشىلار ءتىل ۇيرەتۋدىڭ سان الۋان ادىس-تاسىلدەرىن پايدالانا وتىرىپ، وزگە تىلدەگى قازاق ءتىلىن ۇيرەتۋدىڭ ءتيىمدى جولدارىن ۇسىندى.

رەسپۋبليكالىق بايقاۋ جەڭىمپازدارىن ادىسكەر-عالىمداردان قۇرالعان قازىلار القاسى انىقتادى. جەڭىمپازدار ارنايى ديپلومدار، العىسحاتتارمەن جانە قارجىلاي سىيلىقتارمەن ماراپاتتالدى. ىنتالاندىرۋ سىيلىعى باياناۋىل اۋدانىنان كەلگەن تانات احاتوۆ پەن اتىراۋلىق گۇلايىم ۇعىبايەۆاعا بۇيىردى. ال جۇلدەلى 3-ورىندى الماتىدان كەلگەن شولپان ءابدىلدا مەن ارالدىق پەريزات ءىزباساروۆا يەلەندى. 2-ورىندى باتىس قازاقستان وبلىسىنان كەلگەن ءادىلحان سۇلتانوۆ الدى. 1-ورىن قوستانايلىق توتى ايتماعانبەتوۆاعا بۇيىرسا، ال باس جۇلدەنى قاراعاندىلىق شەبەر وقىتۋشى دينارا قۋانبايەۆا يەلەندى.