استانادا  ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان جۋرناليستەردىڭ باسىن قوسىپ، بريفينگ وتكىزگەن بولاتىن. رەسپۋبليكالىق ب ا ق جارىسا جازعان بريفينگتىڭ الاتاۋدىڭ بوكتەرىندە ەمەس، سارىارقا تورىندە ۇيىمداستىرىلعانى الماتىلىقتاردى قىنجىلتتى. سەبەبى قولىندا قامشىسى بار، اتاق پەن ابىرويدان كەندە ەمەس، ەل اۋزىندا جۇرگەن ازاماتتىڭ اۋزىنان مۇنداي جالىندى سوزدەردى كۇندە ءبىزدىڭ ەلدە ەستي بەرمەيمىز. جاڭالىق جازۋعا اسىعىپ تۇرعان جۋرناليستەرگە سەنساسيانى ءوز قولىمەن تاباققا سالىپ ۇسىنعان بەكبولات تىلەۋحان تاڭ قالدىرماي قويمادى.

"ورنىڭىزدان كەتۋگە دايىنسىز با؟" دەگەن سۇراققا ويلانباستان باس يزەگەن جىراۋعا ءسۇيسىنىپ وتىرمىز. بىلعارى كرەسلوعا وتىرىپ السا، ءبىتتى، جىلى ورنىن وزگەگە بوساتۋعا قيمايتىن شەندىلەردەن حالىق ءزارازاپ بولعانى شىندىق. تەك بەكبولات مىرزانىڭ ءبىر ەسكەرتۋى بار. جاڭادان كەلەتىن ادامنىڭ شىنىمەن دە ۇلتتىق سپورتتان حابارى بولۋى جانە جاناشىر بولۋى مىندەتتى. سول شارتپەن عانا بەكبولات قاناي ۇلى ءوزىنىڭ باتاسىن بەرۋگە دايىن. "مەنىڭ ايتقان دۇنيەنى 18 ملن ادام ەستيتىن بولادى دەپ ويلايمىن. تاعى دا ءتۇسىندىرىپ كەتەيىن، مەن اتاق ءۇشىن جۇرگەن ادام ەمەسپىن. قولىمنان كەلگەنىن جاسادىم" دەپ اعىنان جارىلىپتى نامىستى ازامات. كۇنى كەشە عانا وتكەن دۇنيەجۇزىلىك كوشپەندىلەر ويىنىندا جەڭىستى قولدان بەرىپ قويعان قازاقستاننىڭ كوكپار قۇراماسىنىڭ ويىنى، ولاردىڭ جىلقىلارىنىڭ بولماۋى دەگەندەي ابسۋردتى دۇنيەلەر وسىنداي ويعا بەكبولات مىرزانى جەتەلەگەن بولۋى كەرەك. "قىرعىزستانعا نەگە ەرەسەكتەر كومانداسىن جىبەرمەدىڭىز؟" دەگەن سۇراققا بەكبولات ەش ساسپاستان "ەرەسەكتەر كومانداسىن جىبەرسەك، ءبىز جەڭەتىن ەدىك. ول تۇسىنىكتى جايت قوي. سوندىقتان دا جاستار باعىن سىناسىن دەدىك. سىنادى. وينادى. ءبارى جاقسى"، - دەپ جاۋاپ قاتىپتى. تەك ءبىر سۇراقتىڭ جاۋابىن الا الماي قالدىق. ول - "قىرعىزدان ات سۇرايتىنداي جاعدايىمىز سونداي مۇشكىل مە؟" دەگەن سۇراق.

"ەر جىگىتتىڭ ەكى سويلەگەنى - ولگەنى" دەيدى حالىق. قازاق حالقى سونىمەن قاتار "اتتى قامشى ايدايدى، ەردى نامىس ايدايدى" دەپ ءسوز قالدىرعان ارتىنان. بەكبولات قاناي ۇلى باستاعان وسى ءبىر "چەللەندج" (ەشكىم جاساماعان دۇنيەنى جاساۋعا دەگەن ۇمتىلىس، ءوز-وزىڭدى قايراۋ)  بيلىكتىڭ باسىندا وتىرعاندارعان قولداۋ تاپسا، مەرەيىمىز ۇستەم بولار ەدى.