«ۇزدىك يننوۆاسيالىق جوبا» بايقاۋى بيىل دا ءوز جالعاسىن تاپتى. 2013 جىلدان وتكىزىلىپ جاتقان شارانى الماتى قالاسى جاستار ساياساتى ماسەلەلەرى جونىندەگى باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىرىپ وتىر. 3 اي ۋاقىت ىشىندە جوعارعى وقۋ ورىندارىنىڭ ستۋدەنتەرىنەن 30-عا جۋىق الەۋمەتتىك جانە بيزنەس جوبالار كەلىپ ءتۇستى. جاستاردىڭ جۇمىسىن قازىلار القاسى 7 قىركۇيەك كۇنى ىرىكتەدى.
بايقاۋعا «ايقىن» گازەتىنىڭ باس رەداكتورى، پۋبليسيست نۇرتورە ءجۇسىپ، «بايقادام» حولدينگىنىڭ باسقارۋشىسى – ارمان بايقادام، «اح-GROUP» BAZA ج ش س بيزنەس جاتتىقتىرۋشى جان اقسارتوۆ، الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى الما اۋعانبايەۆا قازىلىق ەتتى. نۇرتورە ءجۇسىپ ءوزىنىڭ كوڭىلىنەن شىققان ءۇش جوبانى ەرەكشە اتاپ، ءىس جۇزىندە جۇزەگە اسىرۋ كەرەك ەكەنىن العا تارتتى. ال «بايقادام» حولدينگىنىڭ باسقارۋشىسى – ارمان بايقادام، ءار جوباعا جەكە-جەكە توقتالىپ، جۇمىس جەتەكشىلەرىن سۇراقتىڭ استىنا الدى. بۇعان قوسا، كەمشىل تۇستارىن كورسەتىپ، تۇزەتۋ جولدارىن ايتتى. سونىمەن قاتار ءوزىنىڭ بۇگىنگە دەيىنگى بيزنەس حاقىنداعى مول تاجىريبەسىمەن ءبولىستى. الما اۋعانبايەۆا حانىم دا جاستارىمىزدىڭ ءوز ماقساتىن ايقىنداپ، ناقتى جولدارىن تاپقانىنا قۋاناتىنىن جەتكىزدى. بۇدان بولەك «ەلىمىزدە بيزنەس سالاسى كۇن ساناپ قارىشتاپ دامۋدا. بۇگىنگى جاستارىمىزدىڭ يدەياسى دا ماعان قاتتى ۇنادى. بولاشاقتا حالىققا پايداسى تيەتىن جوبالار بولادى دەگەن ويدامىن»- دەپ ءسوزىن تۇيىندەدى. وسىلايشا ءبىرىنشى كەزەڭدە بارلىعىنا جوعارى باعا بەرىلىپ، تەگىن ترەنينگتەرگە جولداما الدى. ترەنينگتەردى جاستار Innovation جوباسى اياسىندا كاسىبي بيزنەس ترەنەرلەر جانە جەتەكشى كاسىپكەرلەر جۇرگىزەدى. باسقوسۋ الماتىداعى SmArt Point كوۆوركينگ ورتالىعى مەن DEPO Evolution Park جاستار لوفت ورتالىعىندا وتەدى.
ءبىر اي ىشىندە قاتىسۋشىلارعا جەتەكشى ماماندار ءبىلىم بەرىپ، ءوز سالاسى جايىنداعى مول تاجىريبەسىمەن بولىسەدى.
بايقاۋ باستاۋشى كاسىپكەرلەردىڭ كاسىپكەرلىك قىزمەت شەڭبەرىندە تاجىريبە الماسۋىنا ارنالعان كوپىر دەسەك ارتىق ايتقانىمىز بولماس.
قازاقستاننىڭ جاس كاسىپكەرلەرىنە تالىمگەر رەتىندە تانىمال كاسىپكەرلەر تاڭدالىپ الىندى. ولار كەزدەسۋ بارىسىندا ىسكەر، تابىستى كاسىپكەرلەرمەن كەزدەسىپ، ولاردىڭ جەتكەن جەتىستىگى جايىنداعى مول تاجىريبەلەرىمەن تانىسادى.
