ق ر دەنساۋلىق ساقتاۋ ءمينيسترى ەلجان ءبىرتانوۆ سالانى سيفرلاندىرۋ پاسيەنتتەردى الىس قاشىقتىقتان قالايشا ەمدەۋگە جول اشاتىنىن ايتىپ بەردى.

«مەديسينالىق ءموبيلدى قوسىمشالار مەن سيفرلىق تەحنولوگيالار ادامداردىڭ ءاربىر پەرسونالدىق ەلەكتروندى جازباسىن تىركەي وتىرىپ، جاعدايىن الىستان باقىلاۋعا جول اشادى»، – دەيدى ە. ءبىرتانوۆ.

وسى ماقسات بويىنشا 2020 جىلدىڭ سوڭىنا دەيىن حالىقتىڭ 100%-ىن ەلەكتروندى دەنساۋلىق پاسپورتىمەن قامتاماسىز ەتۋ جوسپارلانىپ وتىر.

ءمينيستردىڭ ايتۋىنشا، اعىمداعى جىلى ارنايى الاڭ ىسكە قوسىلادى. ول الاڭ مەديسينالىق اقپاراتتىق جۇيەلەردى كەزەڭ-كەزەڭمەن ينتەگراسيالاپ، حالىقتىڭ ەلەكتروندى دەنساۋلىق پاسپورتتارىنىڭ ءبىرىڭعاي بانكىن ىسكە قوسۋعا مۇمكىندىك بەرەدى. وسىلايشا، الداعى ۋاقىتتا قازاقستانداعى ءاربىر بالانىڭ تۋعانىنان باستاپ ەلەكتروندى مەديسينالىق تاريحى ءۇزىلىسسىز تولتىرىلاتىن بولادى.

قازىرگى تاڭدا ەلىمىزدە مەديسينالىق سيفرلىق اقپاراتتىق جۇيەگە كوشۋ جاپپاي قولعا الىنىپ، جۇزەگە اسىرىلۋدا.

«مەديسينا قىزمەتكەرلەرىنىڭ جۇمىس ورىندارىن كومپيۋتەرمەن قامتاماسىز ەتۋ دەڭگەيى قالالار مەن اۋدان ورتالىقتارىندا 85،2%-دى قۇرايدى»، – دەدى ول.

سونداي-اق، مينيستر جىلدىڭ سوڭىنا دەيىن 100%-دىق دەڭگەيدە مەديسينالىق ۇيىمداردا ەلەكتروندى مەديسينالىق جازبا جۇيەسىنە ەنگىزۋ كوزدەلىپ وتىرعانىن ايتىپ ءوتتى. حالىقتىڭ ەلەكتروندى پاسپورتپەن قامتىلۋ كورسەتكىشى قازىرگى تاڭدا 11 ميلليونعا جەتكەن. بۇل قادام مەديسينالىق قىزمەت الۋ پروسەسى جانە دارى-دارمەكتەرمەن قامتاماسىز ەتۋدىڭ اشىقتىعى مەن ىڭعايلىلىعىنا جول اشادى.

مينيستر 2021 جىلى تەگىن مەديسينالىق كومەك كورسەتۋ باعىتى بويىنشا قارجىلاندىرۋ ۇلەسىنىڭ 50%-عا جەتەتىنىن ءمالىم ەتتى.

«قازاقستان دەنساۋلىق ساقتاۋ سالاسىنىڭ ۇلتتىق جۇيەسى جۇمىسىنىڭ جايلى ناتيجەسىنە قاراماستان، مەديسينالىق قىزمەت كورسەتۋ ساپاسى مەن اشىقتىعى تۇرعىسىندا، بىلىكتى مەديسينالىق كادرلارمەن قامتاماسىز ەتۋدە ءالى دە ماسەلە بار. جوعارىدا اتالعان ماسەلەنى شەشۋ ءۇشىن مەديسينالىق كومەك ساپاسىن ارتتىرۋ بويىنشا ءبىرقاتار شارالار لەگى قولعا الىنىپ جاتىر»، –دەيدى ول.

مينيستر اتاپ وتكەندەي، نەگىزگى اۋرۋلاردان ەمدەۋ ءۇشىن بيىل 3،5 ملن ادام تەگىن دارى-دارمەكپەن قامتىلاتىن بولادى. بۇل كورسەتكىش 2016 جىلمەن سالىستىرعاندا 15،7 پايىزعا ارتتى.

«دارى-دارمەكپەن قامتۋ پروسەسىنىڭ اشىقتىعى مەن تيىمدىلىگىن ارتتىرۋ ءۇشىن 2018 جىلدىڭ 1 قىركۇيەگىنەن باستاپ امبۋلاتوريالىق مەديكامەنتتەردى ساتىپ الۋ ورتالىقتاندىرىلىپ، ساتىپ الۋ ونلاين-ترانسلياسيا ارقىلى جۇرگىزىلدى. وسىنىڭ ارقاسىندا 26،5 ملرد تەڭگە مولشەرىندە بيۋدجەت قاراجاتىن ۇنەمدەپ قالۋعا جول اشىلدى»، – دەيدى مينيستر.

ەلجان ءبىرتانوۆ اتاپ وتكەندەي، ۇنەمدەلگەن قاراجات ناۋقاستانعان 20 مىڭ ادامعا دارى-دارمەك پرەپاراتتارىن الۋعا جۇمسالعان. قازىرگى ۋاقىتتا اقپاراتتىق جۇيەلەردى جەتىلدىرۋ، ءاربىر پاسيەنت بويىنشا دەربەس دارى-دارمەكتەردى قولدانۋ مونيتورينگى مەن قاجەتتىلىكتى انىقتاۋ جۇمىسى جۇرگىزىلىپ جاتىر. بۇل قادام ءاربىر ادامنىڭ تەگى بويىنشا دارى-دارمەكتەردى ساتىپ الۋعا، ولاردى دالمە-دال تاراتۋعا، سونىمەن بىرگە قالدىق پرەپاراتتارعا باقىلاۋ جاساۋعا مۇمكىندىك بەرەدى.