الەۋمەتتىك جەلىنىڭ كۇشىنە ءمىنىپ تۇرعان كەزەڭى عوي، «قامشى.كز»، «بايراق.كز» جانە «facebook» ارقىلى الماتى وبلىسىنىڭ اكىمى اماندىق باتالوۆتىڭ اتىنا جازعان ءۇشبۋ حاتىمىزدى دا، سول ماسەلەگە وراي اكىمدىكتىڭ بەرگەن جاۋابىن دا، اۋىل تۇرعىندارى ءوقىپ-بىلىپ وتىر. الايدا اكىمدىكتىڭ ەدەل-جەدەل بەرگەن جاۋابىنا سوگەتىلىكتەردىڭ كوڭىلى تولماعان. «اماندىق باتالوۆ ءبىزدى دۇرىس تۇسىنبەپتى» دەگەن اۋىل تۇرعىندارىنىڭ وكپە-نازى بۋدۋ-بۋدا قاعاز بولىپ، مەنىڭ الدىمدا جاتىر. ونى ەندى جۋرناليستىك ولشەمگە سالىپ، ءسال تۇجىرىپ جىبەرسەك، بىلاي بولىپ شىعادى:

1. "سوگەتى اۋىلدىق وكرۋگى اكىمى اپپاراتىنا 2018 جىلدىڭ شىلدە ايىنىڭ 28 كۇنى اۋىل تۇرعىندارىنان مال سۋعارۋعا ارنالعان سۋ قۇبىرلارىنىڭ بولشەكتەنىپ شىعارىلعانى تۋرالى اقپارات ءتۇستى. اتالعان ماسەلە بويىنشا اۋىلدىق وكرۋگ اكىمى اپپاراتىنىڭ قىزمەتكەرلەرى، جەرگىلىكتى ۋچاسكىلىك ينسپەكتورمەن بىرگە ورىنعا شىعىپ، 800 مەتر سۋ قۇبىرلارىنىڭ قازىلعاندىعىن انىقتادى. سول ۋاقىتتا، زاڭسىز جاسالعان ارەكەت بويىنشا اكت ازىرلەنىپ، بارلىق اقپاراتتار پوليسيا بولىمشەسىنە تاپسىرىلدى. ۋاقىتشا ساقتاۋ ءۇشىن اتالعان قۇبىرلار اۋىلدىق وكرۋگى اكىمىمەن الىندى، ىشكى ىستەر بولىمىنە ارىز بەرىلدى» دەلىنگەن وبلىس اكىمىنىڭ باسپا ءسوز قىزمەتى بەرگەن رەسمي جاۋاپتا. ءيا، نەگىزىنەن سولاي. ءبىراق بۇل اۋىلدىقتارعا جاڭالىق ەمەس قوي. سوگەتىلىكتەر سول شىلدەنىڭ 28-ىنەن بەرى، ياعني، 1،5 ايدان بەرى قۇبىر توناۋشىلارعا توسقاۋىل قويار قۇزىرلى ورگان تابىلماعانىنا نارازى. سول ءۇشىن دە وبلىس اكىمى اماندىق باتالوۆتىڭ وزىنەن كومەك سۇراپ وتىر. «ۋاقىتشا ساقتاۋ ءۇشىن اتالعان قۇبىرلار اۋىلدىق وكرۋگى اكىمىمەن الىندى...» دەگەن ءسوزدى اۋىل تۇرعىندارى قالاي تۇسىنەرىن بىلمەي دال. ەگەر جوعارىداعى ابزاستى قايتا وقىپ شىقساڭىز، «زاڭسىز قازىلعان 800 مەتر قۇبىر ۋاقىتشا ساقتاۋ ءۇشىن اۋىلدىق وكۋگتە قالدى» دەگەندەي ماعىنا بەرەدى. ال شىندىعىندا اۋىلدىق وكرۋگتە 800 مەتر تۇرماق، سىنىق-سۇيەم دە قۇبىر قالماعان. قازىلعان قۇبىردىڭ ءبارىن توناۋشىلار اكەتكەن.

2. «انىقتالعان جايت بويىنشا پوليسيا بولىمشەسىمەن سوتقا دەيىنگى الدىن-الا تەرگەۋ جۇمىستارى جۇرگىزىلدى. الايدا، بەلگىسىز ازاماتتارمەن قۇبىرلاردى قايتا بولشەكتەپ الۋ ارەكەتى قايتالاندى. بۇل تۇستا اۋىلدىق وكرۋگ اكىمىمەن 2018 جىلدىڭ 12 قىركۇيەگىندە ىشكى ىستەر ورگاندارىنا قايتا ارىز بەرىلىپ، قۇبىرلاردى قازۋعا قاتىستى جۇرگىزىلىپ جاتقان جۇمىستاردى توقتاتۋ بويىنشا شارا قابىلداندى».

حوش دەيىك، سوتقا دەيىنگى الدىن-الا تەرگەۋ جۇرگىزىلىپتى. ال ناتيجەسى قايدا؟ توناۋشى كىم؟ ول قانداي دوكەي! اتى نەگە اتالمايدى؟ دەمەك تەرگەۋ دۇرىس جۇرگىزىلمەگەن، ءتىپتى مۇلدە جۇرگىزىلمەگەن. ەگەر شىنىمەن دە تەرگەۋ شارالارى قولعا الىنسا، توناۋشىنىڭ كىم ەكەنى انىقتالار ەدى. ويتكەنى 800 مەتر قۇبىر ءبىر قۋىسقا تىعا سالاتىن ينە ەمەس قوي. ونىڭ ۇستىنە، جەر قازىپ جاتقان تراكتورشىنى اۋىل اكىمى مەن ۋچاسكەلىك پوليسەي كورگەن، سۋرەتكە تۇسىرگەن. ودان ارتىق نە كەرەك؟ سول تراكتورشى ارقىلى قالتارىستا تۇرعان دوكەيدى تابۋ قيىن با؟ تەرگەۋ شارالارى نەگە تاپ-تۇيناقتاي جۇرگىزىلمەگەن؟ بۇل كىمنىڭ كىناسى؟ اۋداندىق ىشكى ىستەر باسقارماسىنىڭ با، الدە اۋىلدىڭ اكىمىنە كۇش بەرمەي جاتقان ۇرىعا «ءتايت» دەمەگەن اۋدان اكىمىنىڭ بە؟ مىنە، سوگەتىلىكتەر وبلىس اكىمى اماندىق باتالوۆ وسى ماسەلەنىڭ ءبارىن ءوز قاداعالاۋىنا الىپ، ءتيىستى شارالار قولدانادى دەپ ۇمىتتەنگەن.

3. بۇل تۇستا اۋىلدىق وكرۋگ اكىمىمەن 2018 جىلدىڭ 12 قىركۇيەگىندە ىشكى ىستەر ورگاندارىنا قايتا ارىز بەرىلىپ، قۇبىرلاردى قازۋعا قاتىستى جۇرگىزىلىپ جاتقان جۇمىستاردى توقتاتۋ بويىنشا شارا قابىلداندى».
بۇل قانداي شارا؟ «توقتاعان» كىم؟ توقتاتۋ شاراسى دۇرىس پا ەدى، توناۋشىنى ۋاقىتشا قاماۋعا الىپ، جاۋاپقا تارتۋ شاراسى قولدانىلۋى كەرەك پە ەدى؟ ءبىزدىڭ حاتىمىز جازىلعالى بەرى تورىايعىر جازىعىنا بارىپ، تونالعان قۇبىردى كورگەن ادام بار ما ءوزى؟ ءبىزدىڭ بۇعان كۇمانىمىز بار. شىلدە ايىنان بەرى قازىپ الىنعان قۇبىردىڭ ۇزىندىعى كەمى 5-6 شاقىرىم. بۇل – اۋىل اكىمدىگى قىزمەتكەرىنىڭ بەرگەن مالىمەتى. ال وبلىس اكىمىنىڭ باسپا ءسوز قىزمەتى بەرگەن رەسمي جاۋاپتا تەك شىلدەدە تونالعان 800 مەتر قۇبىر تۋرالى عانا مالىمەت بار. سوندا وبلىس اكىمدىگى سوگەتى اۋىلدىق وكرۋگىنەن، سونداعى بەبەۋ قاققان جۇرتتان اقپار الماي-اق رەسمي جاۋاپ بەرگەندى دۇرىس كورگەن بە؟

4. «ءبىز توناۋشىنىڭ تەگىن ادام ەمەس ەكەنىن باياعىدا-اق بىلگەنبىز. ويتكەنى بۇل كوپە-كورنەۋ توناۋ. «كۇشتىنىڭ ارتى ديىرمەن تارتادى» دەگەن وسى. ءاۋ باستا بىردەن ەلباسى نۇرسۇلتان نازاربايەۆتىڭ وزىنە شاعىم ايتقىمىز كەلگەن. ءبىراق وبلىس اكىمى اماندىق باتالوۆتى اتتاپ كەتكەندەي بولمايىق دەگەنبىز. مىناداي جاۋاپتان كەيىن ويلانىپ وتىرمىز. ويتكەنى وبلىس اكىمى «بۇل ماسەلە بويىنشا مىنا ادام اينالىسادى» دەپ ناقتى لاۋازىمدى تۇلعانىڭ (ورىنباسارىنىڭ، اۋدان اكىمىنىڭ، پروكۋروردىڭ ت.ب) اتىن اتاماپتى. جاۋابىنا كوڭىلىمىز تولمادى. سوندىقتان ءبىز مۇنى شىعارىپسالما جاۋاپقا ۇقساتىپ وتىرمىز. 
ەرتەڭگە، ياعني سەنبى، 15 قىركۇيەك كۇنىنە ب ا ق وكىلدەرىن شاقىردىق. سەبەبى اۋىلعا كەلگەن وراسان زياننىڭ مولشەرىن جوعارىداعىلار ءالى تۇسىنبەي وتىرعان سەكىلدى. ەگەر وبلىس اكىمى ادام جىبەرەم دەسە، قولىنان جەتەكتەپ اپارىپ، كورسەتەر ەدىك» دەيدى سوگەتىلىكتەر.

سانسىزباي نۇربابا