قازاق دەگەن حالىقتىڭ قوناقجايلىلىعىن، مەيىرباندىعىن، كوڭىلىنىڭ اشىقتىعىن ايتا بەرگىڭ كەلەدى عوي، شىركىن! شاڭىراعىنا كەلگەن قوناعىن قۇدايىنداي سىيلاعان حالىق. قاشان دا بار ءتاتتىسىن الدىنا قويىپ، سىي-قۇرمەتتىڭ ەڭ بيىگىنە بولەگەن. ال بۇگىنگى تاڭدا قوناعىمىزعا سىي-قۇرمەت كورسەتىپ ءجۇرمىز بە؟
وكىنىشكە قاراي، سوۆەت ۇكىمەتى زامانىندا وسكەن اعالارىمىز بەن اپكەلەرىمىزدىڭ كوبى دەرلىك "وزگەنى سىيلاۋ" دەگەندى "اراق قۇيۋ" دەگەن تىركەسپەن سينونيم ەتىپ العان. ۇيىنە كىم كەلمەسىن، قازىسىنان بۇرىن اراعى دايىن تۇراتىن قانشاما وتباسىن كوردىم. الگىسىن شىعارماسا، قۇيماسا، سەنى ادام قۇرلى كورمەي تۇر دەگەن تۇسىنىك قالىپتاسىپ كەتكەن عوي. ۇيىنە قوناقتاپ بارعان تۋىسى، دوسى دا سول ءبىر اششى سۋسىننان دامەتىپ تۇرادى ەكەن. سول ارقىلى ءوزىنىڭ سول وتباسى ءۇشىن قانشالىقتى سىيلى ەكەنىن بىلە الادى. كەز كەلگەن ءۇيدىڭ سورەسىندە سپيرتتىك سۋسىن بولۋى ءتيىس، ايتپەسە، قانداي تۋعان كۇن، قانداي مەيرام، قانداي كەش؟ ونسىز دۇرىس قىزبايدى ەكەنسىڭ، ال قىزباساڭ، كەشتىڭ ءسانى كىرمەيدى-مىس.
اينالايىن، اعاتايلارىم، اپكەلەرىم! اراقتىڭ دەنساۋلىققا زيان ەكەنىن ايتپاسام دا، تۇسىنەتىندەرىڭىزگە ءشۇبام جوق. بۇل - ءبىر. بۇگىنگى تاڭدا ادامنىڭ ءبارى وقىعان، ساۋاتى بار، تۇسىنەدى. اللانىڭ دا بارىن، ونىڭ پارىزدارىن، قانداي استى حالال-حارام ەتىپ ارا-جىگىن اشىپ قويعان. بۇل - ەكى. سول اششى سۋسىندى ءىشىپ الىپ، بىر-بىرىنە ايتقان تىلەكتەرى شە؟! "وسى ايتىلعان تىلەكتەر پەرىشتەنىڭ، اللانىڭ قۇلاعىنا شالىنسىن!" دەپ قويادى ەستەرىن بىلمەي. اراق ىشىلگەن شاڭىراققا پەرىشتەڭىز كوز قىرىن دا سالمايتىن شىعار، قۇلاق تۇرمەك تۇگىلى...
قانشاما ازاپ، بالە-جالا سول ءبىر اراقتىڭ كەسىرىنەن بولىپ جاتتى. كەي جانداردىڭ ءومىرىن جالمادى (ءوزىم كۋا)، كەي وتباسىنىڭ شىرقىن بۇزدى، ناعىز بەرەكەسىزدىكتىڭ باستاۋى دا سول اششى سۋسىننان. ءبىر وكىنىشتىسى، سونىڭ ءبارىن ولار جاقسى بىلەدى، ءبىراق قابىلداي المايدى نەمەسە مويىنداعىلارى كەلمەيدى...
باسقا دا سەبەپتەرى بار شىعار، كىم ءبىلسىن! نە دە بولسا، ەس جياتىن كەز-كەلدى. قىمىزىن ءىشىپ، قوي باعىپ جۇرگەن قازاقتىڭ ساناسىن اراقپەن ۋلاعان كەڭەس ۇكىمەتىنىڭ ساياساتىنا توقتاۋ سالۋ كەرەك.
كەلگەن قوناعىڭا اراق قۇيىپ كورگە سۇيرەگەنشە، قىمىز ۇسىنىپ تورگە سۇيرە، شاپان جاپ، ءسويتىپ العىسقا بولەن! مىنە، ناعىز سىيلاعاننىڭ "كوكەسى"!
