جۇما كۇنى قىرعىزستاننىڭ سىرتقى ىستەر مينيسترلىگى قازاقستان ەلشىسىنە نوتا بەرىلگەنى تۋرالى حابارلادى. بۇل تۋرالى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الا وتىرىپ.
قىرعىزستاننىڭ سىرتقى ساياسات ۆەدومستۆوسىنىڭ رەسمي حابارلاماسىندا ايتىلعانداي، "الماتى اۋەجايىندا قازاقستاندىق قۇزىرلى ورگاندار تاراپىنان جاسالاتىن شەكتەن تىس تەكسەرۋلەر تۋرالى قىرعىز رەسپۋبليكاسى ازاماتتارىنان ۇزدىكسىز ءتۇسىپ جاتاتىن ارىز-شاعىمدارعا بايلانىستى" قازاقستان ەلشىسى كارىم كوكىرەكبايەۆ سىرتقى ىستەر مينيسترلىگىنە شاقىرىلعان.
"كەزدەسۋ بارىسىندا قىرعىز تارابى قازاقستاننىڭ قۇزىرلى ورگاندارىنىڭ قادامىنا الاڭداۋشىلىق تانىتىپ، ق ر قۇزىرلى ورگاندارىنىڭ لاۋازىمدى تۇلعالارى تاراپىنان شەكتەن تىس، نامىسقا تيەتىن ارەكەتتەر جاسالماۋىن باستى نازارعا الۋعا ءوتىنىش ءبىلدىردى"، — دەپ حابارلادى قىرعىزستاننىڭ ءسىم.
قازاقستاننىڭ سىرتقى ىستەر مينيسترلىگى وقيعاعا قاتىستى پىكىر ءبىلدىردى.
"ءقازىر ماسەلەنىڭ انىق-قانىعىن جانە قانداي تەكسەرۋلەر تۋرالى ءسوز بولىپ وتىرعانىن انىقتاپ جاتىرمىز"، — دەپ حابارلادى ق ر ءسىم باسپا ءسوز قىزمەتىنىڭ باسشىسى ايبەك سمادياروۆ.
ول اتاپ وتكەندەي، قازاقستان اۋەجايلارىندا بارلىق جولاۋشىعا بىردەي قاۋىپسىزدىك رەجيمى ساقتالادى. ءارى وتكىزۋ بەكەتتەرىندە مەملەكەتتىك شەكارا تۋرالى زاڭعا سايكەس ازاماتتاردان جاۋاپ الىنادى.
