سونىمەن، گەنا جەڭىلدى. ءدال تيگەن سوققىسىنىڭ سانى (234:202) بويىنشا ءبىزدىڭ جىگىت الدا بولعانىمەن، جەڭىس كانەلوعا بەرىلدى. ول ءتۇسىنىكتى دە. ويتكەنى، بۇل جەكپە-جەكتىڭ ناتيجەسىنە رينگتەگى جۇدىراقتاسۋدان بولەك وزگە دە شەشۋشى فاكتورلار اسەر ەتكەنى ءسوزسىز. ولار:
گەنا - قانشاما مىقتى بولىپ، جانكۇيەرى كوپ بولسا دا، اقش-تا كاسىپقوي بوكس الەمى ءۇشىن بوتەن جان؛
كانەلو – كاسىپقوي بوكستاعى ەڭ ىقپالدى پروموۋتەرلىك كومپانيا Golden boy promotionsء-تىڭ باستى جۇلدىزى، ياعني نەگىزگى تابىس كوزى؛
كاسىپقوي بوكستىڭ وتانى – اقش بولسا، ونداعى نەگىزگى جانكۇيەر، ياعني تابىس كوزى مەكسيكالىقتار ەكەنى بەلگىلى. سول سەبەپتى دە نەگىزگى بوكس كەشتەرى مەكسيكالىقتاردىڭ ۇلتتىق مەرەكەلەرى – 5-مامىرداعى سينكو دە مايو جانە 16-قىركۇيەكتەگى مەكسيكانىڭ تاۋەلسىزدىك كۇنى مەيرامىنا وراي ۇيىمداستىرىلادى. ويتكەنى، مول تابىس تابادى. سول سەبەپتى دە كاسىپقوي بوكستاعى كەز-كەلگەن وقيعانى ۇلكەن بيزنەسپەن بايلانىستىرادى. ال بۇل سالانىڭ جازىلماعان ءوز زاڭى مەن ءتارتىبى بار. وعان سىرتتان بوتەندەردى كوپ جولاتا بەرمەيدى. تەك مىقتىلاردىڭ مىقتىسى عانا قارسىلىقتارعا قاراماستان، كەدەرگىلەردى بۇزىپ، سول الەمگە جول سالا الادى. گەنا - سولاردىڭ ءبىرى. ول ءوزىنىڭ تازا تالانتىنىڭ، ەڭبەكقورلىعىنىڭ ارقاسىندا كاسىپقوي بوكس الەمىنە ءوزىن مويىنداتتى. ميللياردتاعان دوللار قارجى اينالىپ جۇرگەن سالادا ءوزىنىڭ دە «تالاسى» بار ەكەنىن دالەلدەدى.
GGG برەندىن ءقازىر بۇل سالاعا قاتىسى باردىڭ ءبارى بىلەدى. گەنا ءقازىر ءوز تالاپتارىن قويا الادى. كاسىپقوي بوكس الەمى ونىمەن ەسەپتەسەدى. ءبىراق، بۇل ماڭگىلىك وسىلاي بولىپ قالا بەرەدى دەگەن ءسوز ەمەس. نەبىر مىقتى بوكسشىلار جەڭىلىپ، باسىنان ب ا ق تايعان سوڭ تەز ۇمىتىلىپ كەتتى. گەناعا قاتىستى ءبىز وندايعا جول بەرمەۋگە ءتيىسپىز. ءيا، كەشەگى «جەڭىلىستەن» كەيىن كەيبىر كەراۋىزداردى ەسەپتەمەگەندە قازاقستاندىقتاردىڭ بارلىعى قولداۋ ءبىلدىرىپ جاتىر. «گەنا – ءبىز ءۇشىن ءبارىبىر چەمپيون»، «گەنا – سەن ۇزدىكسىڭ» دەگەن سوزدەردى ايتپاعان وتانداسىمىز كەمدە-كەم شىعار. ەرتەڭ ول ەلگە ورالعان سوڭ دا جانكۇيەرلەر قۇشاق جايا قارسى الىپ، تورىنە شىعارىپ، مينيستر-اكىمدەر كابينەتىندە جەكە قابىلداپ، كەۋدەسىنە تەمىر-تەرسەگىن تاعاتىن شىعار. ارينە، بۇل سپورتشى ءۇشىن ۇلكەن قولداۋ بولارى ءسوزسىز. دەگەنمەن، تەك مورالدىق قولداۋ كورسەتۋمەن شەكتەلىپ قالاتىن جاعداي ەمەس بۇل.
گەناعا ناقتى قولداۋ كەرەك. ول سپورتتىق عۇمىرى اياقتالعان سوڭ دا كاسىپقوي بوكس الەمىندەگى بەلدى، بەدەلدى تۇلعا بولىپ قالۋى ءتيىس. ونىڭ «GGG promotions» كومپانياسى قازىرگى وسكار دە لا حوييانىڭ «Golden boy promotions»، بوب ارۋمنىڭ «تop Rank»، ەددي ءحيرننىڭ «Matchroom sport» كومپانيالارى سياقتى كاسىپقوي بوكس سالاسىنىڭ باستى ويىنشىلارىنىڭ بىرىنە اينالعانى دۇرىس. ءقازىر ءتۇرلى پروموۋتەرلىك كومپانيالاردىڭ بوساعاسىندا جۇرگەن باتىر جۇكەمبايەۆ، دانيار ەلەۋسىنوۆ، قانات يسلام، جان كوسوبۋسكيي، يۆان دىچكو سىندى وزگە دە مىقتى جىگىتتەردى وسى «GGG promotions» كومپانياسىنا جيناپ، سولارعا جاعداي جاساسا. شەبەرلىكتەرى ەشكىمنەن كەم ەمەس مىقتى بوكسشىلارىمىز سوندا قۇلقىنىنىڭ قامىن عانا ويلايتىن وزگەلەرگە جەم بولماي، ەرتەڭ-اق الەم چەمپيونى بولار ەدى. جانە بولاشاقتا دا تالاي تالاناتتاردىڭ تانىلۋىنا جول اشىلار ەدى. بۇل جۇمىس جۇيەلى تۇردە جۇرگىزىلسە، الەمدىك كاسىپقوي بوكستا ءبىزدىڭ جىگىتتەر ەلەۋلى كۇشگە اينالار ەدى. جەڭىپ تۇرعان جەكپە-جەكتەرىندە جىعىپ بەرىپ، تاپا-تال تۇستە توناۋ بولماس ەدى. ءبىراق، وعان گەنانىڭ ءبىر ءوزىنىڭ شاماسى جەتپەسى انىق. وعان ەڭ باستىسى قوماقتى قارجى كەرەك. ءبىزدىڭ ءىرى كاسىپكەرلەر مەن كومپانيالار باسىندا قارجىلاي قولداۋ كورسەتىپ جىبەرسە، اياعىنان نىق تۇرىپ العان سوڭ وزدەرى-اق شارۋاسىن دوڭگەلەتە بەرەر ەدى.
«سامۇرىق-قازىنا» قورى سپورتتىق ناتيجەسى دە تومەن، يميدجدىك اسەرى دە شامالى جوبالارعا جۇمساپ جاتقان قاراجاتىنىڭ ءبىر بولىگىن وسىعان باعىتتاسا تەك ۇتار ەدىك. ويتكەنى، GGG برەندى قازاقستانمەن تىكەلەي بايلانىستى. گەنا ارقىلى كاسىپقوي بوكس الەمى قازاقستاندى تانىدى جانە مويىندادى. اتاقتى پروموۋتەرلەردىڭ قازاق بوكسشىلارىنا قىزىعۋشىلىق تانىتا باستاۋى دا - گولوۆكيننىڭ ارقاسى. ەلىمىزدىڭ حالىقارالىق ءيميدجىن جاقسارتۋدا ول قانشاما قارجى جۇمسالعان باعدارلامالار مەن جوبالاردان دا ارتىق قىزمەت ەتتى. ەندەشە، «GGG promotions» كومپانياسىنا ەل بولىپ قولداۋ كورسەتۋ گەنناديي گولوۆكيننىڭ ەرەن ەڭبەگىنە كورسەتىلگەن قۇرمەت قانا ەمەس، قازاقستاندى سپورتتىق دەرجاۆا رەتىندە تانىتا تۇسۋگە، الەمدىك بەدەلىن ارتتىرۋعا جاسالعان ناقتى قادام بولماق.
