كەشە عانا مۇحتار جاكىشيەۆ ءوزىنىڭ ناۋقاس اناسىمەن كەزدەسۋگە رۇقسات سۇراعان ەدى. الايدا بيلىك بۇل ءوتىنىشتى ورىنداۋدان باس تارتتى. 

"جاكىشيەۆتىڭ سىرتقا شىعۋىنا قىلمىستىق-اتقارۋ كودەكسىنىڭ "مەكەمەنىڭ شەگىنەن تىس جەرگە شىعۋ" تۋرالى 113-بابىنىڭ 5-تارماعىنا سايكەس رۇقسات بەرىلمەگەن. بۇل تارماقتا "تەرروريستىك، ەكسترەميستىك قىلمىستار ءۇشىن نە قىلمىستىق توپ قۇرامىندا جاسالعان قىلمىستار ءۇشىن، سونداي-اق جاس بالالارعا جىنىستىق تيسۋ قىلمىستارمەن سوتتالعاندارعا سىرتقا شىعۋعا رۇقسات ەتىلمەيدى"، — دەلىنگەن وتاندىق باق-تا جاريالانعان حابارلامادا. 

بۇگىن تاڭەرتەڭ 80 جاستاعى مۇحتار جاكىشيەۆتىڭ اناسى رايسا جاكىشيەۆا قايتىس بولدى دەگەن قارالى حاباردى ەستىدىك. اتتەڭ دەدىك ىشتەي... مۇحتار جاكىشيەۆ اناسىنان ايىرىلاتىنىن سەزگەندەي بىر-ەكى كۇن بۇرىن بيلىكتەن اناسىمەن كەزدەستىرۋىن وتىنگەن ەدى.  بيلىك ادامگەرشىلىككە سالىپ كەلىسىم بەرگەندە اناسى سوڭعى رەت ۇلىن كورىپ ۇلگەرەتىن بە ەدى، كىم ءبىلسىن؟ جىلدار بويى ۇلىن كۇتكەن، بيلىكتەن "بوساتادى"، - دەپ ءۇمىت كۇتكەن اناسى ارماندا كەتتى. مۇحتار جاكىشيەۆتىڭ اناسىن سوڭعى رەت كورۋگە مۇمكىندىگى بولعان.

تانىمال زاڭگەر ابزال قۇسپاننىڭ ايتۋى بويىنشا، قىلمىستىق اتقارۋ كودەكسىندەگى تالاپتارعا سايكەس ەت-جاقىن  تۋىستارى ءولىم اۋزىندا جاتقان كەزدە نە قايتىس بولعان جاعدايدا سوڭعى ساپارعا شىعارىپ سالۋ راسىمىنە اپارۋ قۇقىعى بەرىلگەن. الايدا بيلىك بۇل تالاپتى ورىنداۋعا مىندەتتى ەمەس ەكەن. 

"بۇل جاعدايدا جازاسىن وتەۋ ورگاندارى شەشىم قابىلدايدى. ولار زاڭ تالاپتارىن بۇزدى دەپ تە ايتا المايمىز. سەبەبى زاڭمەن ادامعا قۇقىق تا، مىندەت تە بەرىلەدى. جازاسىن وتەۋ ورگاندارى بۇل تالاپتى وتەۋگە مىندەتتى ەمەس، ءبىراق قۇقىلى ەدى. ءبىراق كوپتەن بەرى جاپا شەگىپ جاتقان ازاماتتىڭ اناسىمەن كەزدەسۋىنە رۇقسات بەرگەنى دۇرىس. بيلىكتىڭ وسى جاعدايدا ءوزىن جاقسى قىرىنان كورسەتۋىنە مۇمكىندىگى بولدى.  ءبىراق ولار سول مۇمكىندىكتى پايدالانا المادى. ءقازىر وسى جاڭالىقتى وقىعان حالىقتىڭ بيلىككە نارازىلىعى كۇشەيە تۇسەدى. جازاسىن وتەۋ ورگاندارى باسشىلىققا ءوز ويلارىن دۇرىس جەتكىزە الماعاندىقتان مۇحتار جاكىشيەۆ اناسىمەن كەزدەسە المادى. ەندى ەڭ بولماعاندا جاكىشيەۆكە اناسىن سوڭعى ساپارعا شىعارىپ سالۋعا اپارۋعا كەڭەس بەرەمىن. ءقازىر ءبىزدىڭ جۇيەدە تۇلعا قالعان جوق. سوت بولسىن، پروكوراتۋرا بولسىن. بارلىعى ورىنداۋشىلار"، دەپ پىكىر ءبىلدىردى ابزال قۇسپان. 

بيلىك زاڭ تالابىن بۇزباعانىمەن، ادامگەرشىلىكتىڭ شارتىن ورەسكەل بۇزدى. مۇحتار جاكىشيەۆتىڭ اناسىنان باسقا ەشكىمى جوق ەدى. اكەسى 2001 جىلى ينسۋلتتەن كوز جۇمعان، ەندى اناسى دا و دۇنيەلىك بولدى. ناعىز قىلمىسكەرلەردى شارتتى تۇردە بوستاندىققا شىعاراتىن زاڭنىڭ ءومىرىنىڭ 9 جىلىن تۇرمەدە وتكىزىپ، ءومىر مەن ءولىم ءۇشىن كۇرەسىپ جاتقان مۇحتار جاكىشيەۆكە ازاتتىق بەرمەي تۇرعانى جانعا باتادى. بۇدان كەيىن بيلىكتەن نە ءۇمىت، نە قايىر... ەندىگى بيلىكتىڭ ۇياتى ويانسا، مۇحتار جاكىشيەۆتى اناسىن سوڭعى ساپارعا شىعارىپ سالۋ راسىمىنە قاتىستىرادى دەگەن ۇمىتتەنەمىز.

Qamshy.kz اقپارات اگەنتتىگى مۇحتار جاكىشيەۆ پەن تۋعان-تۋىسىنا ورنى تولماس قازاعا بايلانىستى قايعىرا كوڭىل ايتادى.