قورعانىس ءمينيسترىنىڭ بۇيرىعىنا سايكەس قۇرلىق اسكەرلەرى اسكەري ينستيتۋتىنىڭ بازاسىندا 12 قىركۇيەك پەن 11 قازان ارالىعىندا ۆزۆود كومانديرلەرىن دايىنداۋ بويىنشا زاپاستاعى وفيسەرلەرمەن ءۇش اپتالىق جيىن وتۋدە. بەرىلگەن جيىنعا قازاقستاننىڭ بۇكىل ايماقتارىنان 300 زاپاستاعى وفيسەرلەر قاتىسۋدا. جيىن قاتىسۋشىلارى مەرزىمدى قىزمەت وتكەن، جوو-دا اسكەري كافەدرانى بىتىرگەن. جيىندا بارلىق باعدارلامالاردى ءساتتى وتكەن جانە جاقسى مىنەزدەمە العاندارعا كەزەكتى اسكەري اتاعى بەرىلەدى.

قازىرگى تاڭدا جيىنعا شاقىرىلعاندار كازارمالىق جاعدايدا. بارلىق اسكەري پاندەردەن پراكتيكالىق ساباقتار بەلسەندى وتۋدە. قازاقستان رەسپۋبليكاسى قارۋلى كۇشتەرىنىڭ جاۋىنگەرلىك جانە جۇمىلدىرۋ دايىندىعىن جەتىلدىرۋ ءۇشىن اسكەري مىندەتتىلەر دالالىق جاعدايدا وزدەرىنىڭ اسكەري بىلىمدەرىن شىڭداۋدا. جيىننىڭ بارىسىندا اسكەري مىندەتتىلەر ۆزۆود كومانديرىنىڭ ىس-ارەكەتتەرىن وقىپ ۇيرەنەدى جانە ولار موتواتقىشتار، تانك، ينجەنەرلەر، ماتەريالدىق-تەحنيكالىق قامتاماسىز ەتۋ اسكەرلەرى ماماندىقتارىن وقىپ جەتىلدىرەدى.

قۇرلىق اسكەرلەرى اسكەري ينستيتۋتىنىڭ پروفەسسورلىق وقىتۋشىلار قۇرامى رحق، تاكتيكالىق دايىندىق، اسكەري توپوگرافيا، بايلانىس قۇرالدارى، جالپى اسكەري جارعىلار بويىنشا ساباقتار وتكىزۋدە. سونىمەن قاتار، اسكەري مىندەتتىلەر اتۋ، جۇرگىزۋ كۋرستارىن جانە ساپتىق دايىندىقتى تەرەڭدەتە وقۋدا. ساباقتىڭ كوپتەگەن بولىگى جاۋىنگەرلىك جاعدايدا پراكتيكالىق تۇردە وتۋدە.

«مەن قاراعاندى وبلىسىنان كەلىپ وتىرمىن. وسىنداي جيىندارعا ءبىرىنشى قاتىسۋىم. وسى وقۋ ورتالىعىنا كەلىسىمەن ساباق كەستەسىنە بايلانىستى بارلىق اسكەري پاندەر بويىنشا ساباقتار بەلسەندى وتكىزىلۋدە. جاۋىنگەرلىك دايىندىق جانە اسكەري ءىس، قارۋ-جاراق جانە اسكەري تەحنيكا نەگىزدەرىن وقۋدامىز. مەنىڭ پىكىرىم، وسىنداي جيىندار مىندەتتى تۇردە وتكىزىلۋى ءتيىس جانە بۇل دەگەن ق ر ءار ەر ازاماتتارىنىڭ تىكەلەي بورىشى دەپ بىلەمىن. ويتكەنى ول وتانىنىڭ قورعاۋشىسى، ءوز ەلىنىڭ پاتريوتى»، - زاپاستاعى اعا لەيتەنانت بايمۇرىنوۆ سەرجان ءوز پىكىرىن ءبىلدىردى.

«جۇمىلدىرۋ جانە جيناقتاۋ كەزىندە ق ر قك ورىستەتۋگە قاجەتتى جاۋىنگەرلىك جانە جۇمىلدىرۋ دايىندىعىن ارتتىرۋ، اسكەري وقىتىلعان رەسۋرستاردى دايارلاۋ ءۇشىن جيناقتاۋ اۋداندارىندا زاپاستاعى وفيسەرلەرمەن پوليگوندا جيىن وتكىزىلۋدە. قازىرگى كەزدە جيىننىڭ بەلسەندى كەزەڭى وتۋدە. اتۋ، اسكەري تەحنيكانى جۇرگىزۋ، (بمپ-1، بمپ-2، بتر-80) تاكتيكالىق دايىندىق، بايلانىس قۇرالدارىن وقىپ جەتىلدىرۋ بويىنشا پراكتيكالىق ساباقتار كۇندە وتكىزىلەدى. بەرىلگەن باعدارلامانى مەڭگەرۋ بارىسىندا اسكەري مىندەتتىلەر اسكەري مىندەتتەرىن اتقارۋ ءۇشىن وزدەرىنىڭ كاسىبي بىلىكتىلىكتەرىن ارتتىرۋ قاجەت. جيىن اياقتالىسىمەن زاپاستاعى وفيسەرلەر ەمتيحان تاپسىرادى»، - دەپ قىسقاشا مالىمدەدى اسكەري مىندەتتىلەرمەن جيىنداردىڭ باستىعى پولكوۆنيك وسمانوۆ راشيد.

ساباقتاردى ساپالى ۇيىمداستىرۋ جانە وتكىزۋ، اسكەري مىندەتتىلەردىڭ ءومىر تۇرمىسىن جاقسارتۋ ءۇشىن پوليگوندا تاربيە جانە اقپارات بولمەلەرى دايىندالعان، مەديسينالىق پۋنكت جانە اۋىز سۋىمەن قامتاماسىز ەتىلگەن.

جيىن اياقتالىسىمەن زاپاستاعى وفيسەرلەر اسكەري-ەسەپ ماماندىعىنا جانە لاۋازىمىنا سايكەس وقۋ باعدارلاماسىن يگەرۋ بويىنشا ەمتيحان تاپسىرادى.