استانا قالاسىنىڭ اكىمى باقىت سۇلتانوۆ جۇمىسقا جاياۋ بارۋدى ادەتكە اينالدىرعانىن ايتتى دەپ جازادى Qamshy.kz اقپارات اگەنتتىگى. وسىعان دەيىن ءبىز "الما جەگەن اكىم "جۇماقتان" قۋىلمايمىن دەسە ءبىزدىڭ كەڭەسكە قۇلاق ءتۇرسىن" اتتى ماتەريال جاريالاعانبىز. ءبىراق اتالمىش ماتەريالدا "اكىم اۆتوبۋسپەن ءجۇرسىن"، دەگەن ۇسىنىس ايتقان ەدىك. بۇگىن سۇلتانوۆ "ءۇيىم وفيسكە جاقىن بولعان سوڭ جۇمىسقا جاياۋ بارىپ ءجۇرمىن"، دەپ ماقتانعانداي بولىپتى. الايدا كەيدە تاكسيگە ءمىنىپ تە ءجۇر ەكەن. ءيا، اكىم بولۋ وڭاي ەمەس...

"جۇمىس كۇنىم قالانى ارالاۋدان باستالادى. مەن بۇرىن دا جۇمىسقا جاياۋ باراتىنمىن. ال ءقازىر ءۇيىم جۇمىسقا جاقىن. اكىم بولعاننىڭ ءبىر جاقسىسى — تازا اۋادا كوپ جۇرەسىڭ. ويتكەنى ەلوردا تىرشىلىگىن قامتاماسىز ەتەتىن نىسانداردى ارالاۋ كەرەك. بۇگىن مەنىڭ وسى قىزمەتكە كەلگەنىمە ءبىر اپتا بولدى. وسى ارالىقتا كولىك، قىسقا دايىندىق، جىلۋ بەرۋ ماۋسىمىنا دايىندىق قالاي ءجۇرىپ جاتقانىن تەكسەرىپ شىقتىم. اۋلالاردى اباتتاندىرۋعا قاتىستى ءبىرقاتار ماسەلەنى قاراستىردىق. قالا شەتىندەگى ەلدى-مەكەندەردى نازاردا ۇستاعان ءجون"، - دەپتى باقىت سۇلتانوۆ. 

نەگىزى ءوفيسى ۇيىنە جاقىن ادامدار جۇمىسقا جاياۋ باراتىن ەدى.  جارايدى، قازاقستاندا ەڭ بولماسا ءبىر اكىم قارا جاياۋ جۇرسە، جايلاپ-جايلاپ وزگەرىستەر ورىن الا باستادى دەپ سەنەيىك. 

سونىمەن بىرگە ەكس-مينيستر قازىرگى قارجى ءمينيسترى ءاليحان سمايىلوۆقا ءوزىنىڭ اقىل-كەڭەسىن دە اياماي ايتىپ ۇلگەرىپتى. 

"جاڭا قارجى مينيسترىنە دانالىق تىلەيمىن، ارينە. سەبەبى بۇگىندە قويىلاتىن تالاپ تا جوعارى، قاۋىپ-قاتەرلەر دە كوپ. ەلىمىزدى دامىتۋ بويىنشا قانشاما مىندەتتەر تۇر. سوندىقتان قارجى ءمينيسترى ۇنەمى ءار شەشىمىن اقىلعا سالىپ قابىلداعانى دۇرىس. ونىڭ بويىندا ساراڭدىق تا، قىڭىرلىق تا، ەلدىڭ قارجىلىق جۇيەسىن دامىتۋعا جاعداي جاساۋ ءۇشىن كورەگەندىلىك تە بولۋى قاجەت"، — دەيدى ەكس-مينيستر. 

ءبىزدىڭ مينيسترلەردە دانالىق قايدام، ءبىراق ساراڭدىق بارىنا سەنۋگە بولادى. سۇلتانوۆتىڭ نەلىكتەن بولاشاق مينيسترگە كوپتەگەن شەندىنىڭ بويىنان تابىلا بەرمەيتىن ادىلدىكتى تىلەپ، سوزگە تيەك ەتپەگەنىن تۇسىنبەدىك. ال ءبىز سۇلتانوۆتىڭ حالىقتى كۇلكىگە قارىق قىلاتىن ەمەس، حالىقتى سۇيسىندىرەتىن مالىمدەمەلەر جاساۋىن تىلەيمىز!