تۇرمەدە وتىرعان "قازاتومفروم" كومپانياسىنىڭ ەكس-پرەزيدەنتى مۇحتار جاكىشيەۆ اناسىنىڭ ارتىنان ءبىر ۋىس توپىراق تا سالا المايتىن بولدى دەپ جازادى Qamshy.kz اقپارات اگەنتتىگى. بۇگىن تاڭەرتەڭ اناسى قايتىس بولۋىنا بايلانىستى "اناسىنان ايىرىلعان مۇحتار جاكىشيەۆكە بيلىك ءبىر ۋىس توپىراق سالۋعا رۇقسات ەتە مە؟" دەگەن تاقىرىپتا ماقالا جاريالاپ، بيلىكتىڭ جاناشىرلىعىنان ءۇمىت كۇتكەن ەدىك. الايدا ۇكىلەگەن ءۇمىتىمىز اقتالمادى.
"قىلمىستىق-اتقارۋ جۇيەسى كوميتەتى (قاجك) باسپا ءسوز قىزمەتىنىڭ جەتەكشىسى عالىمجان حاسەنوۆتىڭ حابارلاۋىنشا، سەمەي تۇرمەسىنىڭ باسشىلىعى جاكىشيەۆكە اناسىنىڭ قايتىس بولعانى جايلى حاباردى جەتكىزگەن. كولونيا باستىعى كوڭىل ايتقان. مۇحتار جاكىشيەۆ قىركۇيەكتىڭ 19-ى كۇنى بولاتىن اناسىنىڭ جەرلەۋ راسىمىنە بارۋعا رۇقسات سۇراپ، ءوتىنىش جازعان. ءبىراق ءوتىنىشى قاناعاتتاندىرىلماعان. ونىڭ سەبەبىن قىلمىستىق-اتقارۋ كودەكسىنىڭ "مەكەمەنىڭ شەگىنەن تىس جەرگە شىعۋ" تۋرالى 113-بابىنىڭ 5-تارماعىمەن تۇسىندىرەدى. وندا "قىلمىستىق توپ قۇرامىندا جاسالعان قىلمىستارمەن سوتتالعاندارعا سىرتقا شىعۋعا رۇقسات ەتىلمەيدى" دەپ جازىلعان وتاندىق باق-تا جاريالانعان حابارلامادا.
