اقتوبە وبلىسىندا وزبەكستاننىڭ 52 ازاماتى تىرىدەي جانىپ كەتكەن اۆتوبۋستاعى ورتكە جولاۋشىلار كىنالى كورىنەدى. بۇگىن سوتتا كىناسىن مويىنداماعان جۇرگىزۋشىسى وسىلاي دەپ مالىمدەدى. ول امان قالعان احراب ەسىمدى كۋاگەردىڭ كەسىرىنەن وتتىڭ تۇتانعانىن ايتادى. بەتتەستىرۋ ءۇشىن سونى سوتقا شاقىرۋدى سۇرادى دەپ جازادى Qamshy.kz اقپارات اگەنتتىگى كتك تەلەارناسى دەرەگىن نەگىزگە الىپ.
تۇركىستان وبلىسىنان بەينەبايلانىسقا شىققان جابىرلەنۋشىلەر سوتتالۋشى ماقسات پەرنەبەكوۆتى سۇراقتىڭ استىنا الدى. ويتكەنى كولىككە جاۋاپتى جۇرگىزۋشى – وسى. ونىڭ ايتۋىنشا، اۆتوبۋس قاقاعان قىستا جانارمايى قاتىپ ىرعىز اۋدانىندا تۇرىپ قالادى. قۇتقارۋشىلارعا حابارلاسپاستان ءوزى ۇيقىعا كەتەدى. تەك كولىك جانىپ جاتقاندا عانا ءبىر-اق ويانعان. ال وعان دەيىن وزبەك جولاۋشىلار ءوزارا توبەلەسكەن ەكەن. رەسەيگە جول باستاپ بارا جاتقان احراب ەسىمدى بريگاديرلەرىنە جابىلىپتى. ول بولسا اۆتوبۋستاعى جانارماي تولى بوتەلكەنى تەۋىپ قالعان. مۇنى ءتىرى قالعان ەكى كۋاگەردىڭ ءبىرى ايتىپ بەرىپتى. سول قوس كۋاگەر وسى ۋاقىتقا دەيىن ءجوندى تەرگەلمەگەن. ءتىپتى سوتقا جاۋاپ الۋعا شاقىرتا الماي وتىر. ولاردىڭ كۋالىك ەتۋىن سوتتالۋشىلار دا، جابىرلەنۋشىلەر دە تالاپ ەتكەن ەدى.
ماقسات پەرنەبەكوۆ، سوتتالۋشى:
- ءورت دەپ ايقايلادى. تۇرسام، وت شىعىپ تۇر. جاراقات العان كۇيى قاشىپ شىقتىم. 19-ى كۇنى كەشكە ەسىمدى جيناپ سۇراعان كەزىمدە ءتىرى قالعان وزبەك ازاماتى باكلاجكانى احراب تەۋىپ جىبەردى دەدى.
