بۇگىن الماتىعا ارنايى ساپارمەن كەلىپ، پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋ بارىسىمەن تانىسقان «نۇر وتان» پارتياسى ءتوراعاسىنىڭ ءبىرىنشى ورىنباسارى وسىلاي دەدى.

ساپار بارىسىندا ماۋلەن اشىمبايەۆ جوعارى ءبىلىم بەرۋدىڭ قولجەتىمدىلىگى مەن ساپاسىن ارتتىرۋ باستاماسى بويىنشا سالىنعان جاتاقحانالارعا باردى. اتاپ ايتقاندا، ول س.اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتى مەن قازاقستان ينجەنەرلىك-تەحنولوگيالىق ۋنيۆەرسيتەتىنىڭ جاتاحانالارىندا بولىپ، ستۋدەنتتەرگە جاسالعان جاعدايمەن تانىستى.

جالپى الماتىدا اتالعان باستاما اياسىندا وسى جىلدىڭ سوڭىنا دەيىن 4 جاڭادان سالىنعان جانە 1650 ورىندىق قايتا جاڭعىرتىلعان 1 جاتاقحانا پايدالانۋعا بەرىلمەك. ودان بولەك، 2300 ورىنعا ارنالعان 3 جاڭا جاتاقحانانىڭ قۇرىلىسى باستالادى دەپ جوسپارلانعان.

سونداي-اق ماۋلەن اشىمبايەۆ «7-20-25» باعدارلاماسى بويىنشا سالىنىپ جاتقان جاڭا تۇرعىن ءۇي كەشەنىنىڭ قۇرىلىس جۇمىستارىمەن تانىسىپ، تۇرعىندارعا جاڭا باسپانالارىنىڭ كىلتىن تابىستاۋ سالتاناتىنا قاتىستى. وسى رەتتە الماتى قالاسى بويىنشا 2018 جىلى 1،9 ملن. شارشى مەتر باسپانا نەمەسە 15،1 مىڭ پاتەر پايدالانۋعا بەرۋ جوسپارلانعانىن اتاپ وتكەن ءجون.

– بۇگىن ەلباسىنىڭ بەس الەۋمەتتىك باستاماسى الماتى قالاسىندا ناتيجەلى جۇزەگە اسىرىلىپ جاتقانىنا كۋا بولدىق. مۇندا جاڭادان سالىنعان جاتاقحانالار ساپالى ءارى جاڭا قوندىرعىلارمەن جابدىقتالعان. «7-20-25» باعدارلاماسى بويىنشا دا شاھاردا جۇيەلى جۇمىس جۇرگىزىلۋدە. ۇيلەردىڭ ساپاسى دا تالاپتارعا ساي. سوندىقتان الماتى قالاسىندا ءار وتباسىن باسپانامەن قامتۋدى كوزدەيتىن باستاما ناتيجەلى جۇزەگە اسىرىلۋدا دەۋگە تولىق نەگىز بار. وسىنداي باعدارلامالارعا جاستار كوبىرەك قاتىسۋى كەرەك. مۇنىڭ بارلىعى ەلباسى ساياساتىنىڭ جەمىسى. بۇگىندە حالىق بۇل باستامالاردىڭ ناقتى ناتيجەسىن كورىپ وتىر. الداعى ۋاقىتتا دا «نۇر وتان» پارتياسى وسى باعىتتاعى ءوز جۇمىستارىن قارقىندى جالعاستىرادى، – دەدى ماۋلەن اشىمبايەۆ.

سونىمەن قاتار پارتيا ءتوراعاسىنىڭ ءبىرىنشى ورىنباسارى شاعىن نەسيە بەرۋدى كوبەيتۋ باستاماسى بويىنشا مەملەكەتتەن قاراجات الىپ، ءوز ءىسىن دوڭگەلەتىپ وتىرعان كاسىپكەرلەرمەن كەزدەستى. سونداي كاسىپكەرلەردىڭ ءبىرى دينارا قازييەۆا. ول اتالعان باستاما ارقىلى نەسيە الىپ، ءتىس ەمحاناسىن اشقان. ستوماتولوگياعا انايى بارعان پارتيا ءتوراعاسىنىڭ ءبىرىنشى ورىنباسارى ەلباسىنىڭ بەس الەۋمەتتىك باستاماسى دەر كەزىندە قولعا الىنىپ، حالىقتىڭ جاعدايىن جاقسارتۋعا يگى سەپتىگىن تيگىزىپ جاتقانىن ايتتى.