الماتىدا جەدەل جاردەم كولىگىنىڭ جۇرگىزۋشىسىنە جۇدىرىق الا جۇگىرگەن تۇركيا ازاماتى تۋرالى جاڭا دەرەكتەر پايدا بولدى. 28 جاستاعى الي دەمير تەمىر تۇلپاردى 4 اي بۇرىن ساتىپ العان. وسى ۋاقىتتا بىرنەشە رەت جول ەرەجەسىن ورەسكەل بۇزىپ ۇلگەرگەن. ال بۇگىن ارىپتەسىنە تەمىر تۇلپار ساتقان وتباسى كولىكتىڭ اقشاسىن العانىمەن، قۇجاتتارى ءجوندى جاسالماعانىن ايتادى. سوندىقتان «جەلىگە الدەكىمدەر ءبىز تۋرالى جالعان اقپارات تاراتتى» دەپ وتىر. بۇل تۋرالى الماتى ارناسى حابارلايدى.

وزكىلىچتار وتباسىندا كەشەگى جاعا ۇستاتارلىق وقيعادان كەيىن مازا جوق. ايتۋلارىنشا، الەۋمەتتىك جەلىگە الدەكىمدەر كولىكتىڭ يەسى تۋرالى بار اقپاراتتى جۇكتەپ جىبەرگەن. وندا ايگۇل وزكىلىچ تۋرالى بار مالىمەت كورسەتىلىپتى. ال سودان كەيىن وتباسىعا بىرنەشە ادام حابارلاسىپ، سەس كورسەتكەن كورىنەدى. بۇعان شىداماعان ولار بۇگىن بار شىندىقتى جايىپ سالدى. ايتۋلارىنشا، الي دەمير وتاعاسىنىڭ بيزنەستەگى ارىپتەسى ەكەن. كولىكتى ساتىپ العانىمەن، قازاقستان ازاماتتىعى جوق جىگىت قۇجاتتى 4 ايدان بەرى راسىمدەي الماي جۇرگەن.

«انا كىسى مەنەن ماشينانى سۇرادى. مەن ساتتىم. تولىق اقشاسىن تولەدى. ماشينانى تىركەۋدەن شىعارىپ بەرەمىز دەگەن. ءبىراق كولىك تىركەۋدەن شىعارىلماي قالعاندا، ايەلى ەكىقابات بولعان، اۋىرىپ اۋرۋحاناعا ءتۇستى. ايەلى بوسانعاننان كەيىن دە كولىكتى تىركەۋدەن شىعارىپ ايەلىنىڭ اتىنا بەرە المادىق. جاي عانا سەنىمحاتپەن، ساقتاندىرۋ كۋالىگىندە ءاتى-جونىن جازدىرىپ، كولىكتى بەرە سالدىق»، – دەدى ەركان وزكىلىچ.

ءۇش بالاسى بار وتباسى جەكە دەرەكتى جەلىگە تاراتقانداردى جاۋاپقا تارتقىزباق. ءتىپتى، ارىز دا جازىپ قويعان. ولار تەمىر تۇلپاردى الي دەميرگە ساتقالى بەرى كەلەڭسىزدىك كوپ بولىپ جاتقانىن ايتادى. سوزدەرىنشە، جۇدىرىق الا جۇگىرگەن جىگىت ءجيى جول ەرەجەسىن بۇزادى ەكەن. شىلدە ايىندا شامامەن، 7 رەت ايىپپۇل الىپتى. ونىڭ قاتارىندا جىلدامدىقتى شامادان تىس اسىرىپ، باعدارشامنىڭ قىزىل تۇسىنە وتكەنى ءۇشىن ايىپپۇل دا كەلگەن.

«جامان جاعدايدا قالدىم. ۇيات ءىس بولدى. ول 60-تان اسقان ۇلكەن كىسى، ءوزىنىڭ اكەسىمەن جاستى. وندايعا باراتىن جىگىت دەپ ويلاعان جوقپىز. ون ساۋساق ءبارى بىردەي ەمەس قوي. وندايدى ءبىز دە كۇتكەن جوقپىز. ول كولىككە يە بولعالى بەرى، جول ەرەجەسىن بۇزعانى تۋرالى 6-7 رەت ايىپپۇل تۇبىرتەگى كەلدى. دەمەك، راسىمەن دە، جول ەرەجەسىن بۇزىپ جۇرگەن بولدى عوي»، – دەيدى ايگۇل وزكىلىچ.

ال زاڭگەر اسقار قايماقوۆ جەدەل جاردەم بريگاداسىنا وزدەرىن قورعايتىن قۇرال-جابدىقتار بەرىلسە دەگەن ۇسىنىس ايتتى. سونداي-اق، جۇمىسقا فيزيكالىق تۇرعىدان دايىندىعى بار قىزمەتكەرلەر الىنسا دەيدى.

«بۇل بۇگىن عانا تۋىنداپ وتىرعان ماسەلە ەمەس. بريگادا ناۋقاسقا شىققاندا جولدا ءتۇرلى كەدەرگىلەر تۋىنداتاتىن جاعدايلار بولادى. وزدەرى دارىگەر شاقىرىپ الىپ، تيىسەتىندەر دە بار. سول ءۇشىن ەكيپاجعا قورعانىپ جۇرۋگە ارنالعان ەلەكتروندى قارۋ، گاز باللونىن الۋعا زاڭدى تۇردە رۇقسات ەتۋ كەرەك. بىزدە جەدەل جاردەم كولىگىنە جول بەرۋ مادەنيەتىن قالىپتاسىرۋ قاجەت»، – دەدى زاڭگەر اسقار قايماقوۆ.

ەسكە سالا كەتەيىك، كەشە دابىل بەلگىسىن قوسىپ، ناۋقاس اكەلە جاتقان جەدەل جاردەم كولىگىنىڭ جۇرگىزۋشىسى سوققىعا جىعىلعان بولاتىن. جەڭىل كولىكتى تاقىمداعان جۇرگىزۋشى جول بويى 2 رەت جەدەل جاردەمنىڭ الدىن كەس-كەستەپ، جول بەرمەگەن. ونىسىمەن قويماي اشۋعا ءمىنىپ، جەدەل جاردەمنىڭ جۇرگىزۋشىسىنە جولدىڭ قاق ورتاسىندا جۇدىرىق الا جونەلگەن. جەلىگە تاراعان ۆيدەودا جاس جىگىتتىڭ نيكولاي كۋچمانىڭ جاعاسىنا جارماسىپ، كولىكتەن ءتۇسىرىپ العانى انىق كورىنىپ تۇر. سوققىدان جەدەل جاردەم جۇرگىزۋشىسىنىڭ قاباعى جارىلىپ، بىرنەشە جەرىنەن جاراقات العان ەدى.