ق ر ۇلتتىق كىتاپحاناسىندا مەملەكەتتىك ءتىلدى دامىتۋعا ارنالعان «ءتىل – تاتۋلىق تىرەگى» اتتى بايقاۋ ءوتتى دەپ حابارلايدى Qamshy.kz اقپارات اگەنتتىگى.  

بايقاۋدا الماتى قالاسىنداعى ەتنو-مادەني بىرلەستىكتەردىڭ مۇشەلەرى – ورىس، ۇيعىر، كۇرد، وزبەك، اۋعان، تۇرىك، نەمىس جانە ت.ب. ۇلت وكىلدەرى قازاق تىلىندە ب ا ق سىنادى. قاتىسۋشىلار ءۇش تۋر بويى باسەكەگە ءتۇستى. ءبىرىنشى تۋردا ولار بيىل تۋعانىنا 125 جاس تولىپ وتىرعان اقىن ماعجان جۇمابايەۆتىڭ ولەندەرىن جاتقا وقىدى. ەكىنشى تۋردا «ۇلتتاردى ۇيىستىرعان قازاق حالقى» اتتى ەسسەلەرىن جۇرتشىلىققا تانىستىردى. ءۇشىنشى تۋردا قازاقشا ءان ايتىپ، بي بيلەپ، قويىلىم كورسەتتى.

احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور ەردەن قاجىبەك باستاعان قازىلار القاسىنىڭ شەشىمىنەن كەيىن 1-ورىن ۇلتتىق ۇلاننىڭ جاس جاۋىنگەرى الەكساندر مامىكينكە بۇيىردى. وعان نوۋتبۋك تابىس ەتىلدى. قازاق قىزدار مەملەكەتتىك پەداگوگيكالىق ۋنيۆەرسيتەتىنىڭ ستۋدەنتى فەرۋزا سۇلتانمۇراتوۆا 2-ورىن الىپ، پلانشەت يەلەندى. 3-ورىندى 10-سىنىپ وقۋشىسى رۋسالينا اسييەۆا الىپ، فوتواپپاراتتى قانجىعاسىنا بايلادى.

قالعان قاتىسۋشىلار دا قۇر قول قالمادى، ولار العىس حاتپەن جانە باعالى سىيلىقتارمەن ماراپاتتالدى.  ءىس-شارا اياسىندا قالاداعى ەتنو-مادەني بىرلەستىكتەر ۇلتتىق ەتنوستىق كورمەلەر ۇيىمداستىرادى.
سالتاناتتى كەشكە قازاقستان حالقى اسسامبلەياسى مۇشەلەرى، ۇلتتىق ينتەلەگەنسيا وكىلدەرى، جۋرناليستتەر، ستۋدەنتتەر مەن وقۋشىلار قاتىستى.

ايتا كەتەيىك، بايقاۋدى الماتى قالاسى ىشكى ساياسات باسقارماسىنىڭ قولداۋىمەن «ادىرنا» ۇلتتىق-ەتنوگرافيا بىرلەستىگى ۇيىمداستىردى.